الاثنين، يوليو 10، 2006

النهاردة نتيجي يا جدعان


أنا قلت من ساعة ما شوفتها.. البت دي وشها حلو عليا.. وهتفرج إن شاء الله، وحياتي هتتغير على يدها.. وأهو حصل اللي كنت عامل حسابه.. والدنيا اتغيرت.. بس مكنتش أقدر أتصور أبدا أبدا.. إن التغيير يكون في ركن ركين من أركان حياتي.. السقوط في الكلية!

وش دعاء الحلو.. خلاني أنجح السنة دي.. بل وإيه.. أنجح في مواد وأجيب فيها تقدير.. يصل إلى "جيد"..

تليفون في وقت متأخر.. من واحدة زميلتي في الكلية.. "براء.. أنا برن عليك من يومين.. عايزة أقولك على حاجة مهمة"..

بهدوء شديد.. مديت صباعي تحت وداني.. ولمست الموبايل.. ووطيت الصوت قوي.. لإن محمد المعتصم وعلي عبد المنعم كانوا معايا في نفس العربية.. والموبايل بيخلي اللي في العربية اللي في آخر الشارع يسمع اللي بيتكلم معايا بيقول إيه..

رديت.. "خير.. في حاجة..؟"..

هي.."براء.. مبرووووووووك.. إنت نجحت السنة دي"..

حاولت أسورق بدون أي نجاح، حاولت أكذب وداني.. بس معرفتش برضه لإني بثق في وداني قوي.. حاولت أعيط ملقتش دموع ولا مناديل.. رديت بهدوء وكأني كنت متوقع النتيجة.. "الله يبارك فيكي.. الحمد لله.. قدر ولطف".. وبصيت لعلي ومحمد.. "يا جماعة.. أنا نجحت"..

الليلة اللي قبلها، كنت قاعد مع أخويا.. بقوله إني قررت أحول لمعهد سينما.. لإني أكيد هسقط السنة دي بعد العك اللي عكيته في الفلسفة وبعد ما شتمت الدكتور في وشه تقريبا.. وبعد ما الدكتور عرف اسمي، وقالي إنه عمره ما شافني من أول السنة.. وبعد ما رفعت الشعار التاريخي.. الكيميا غدارة.. والفلسفة أيضا!

أخويا رد عليا بكل تشاؤم (ربنا يسامحه).. يا أبني معهد سينما إيه.. إنت مينفعش تروح أي حتة، لإنك واخد الثانوية من أكتر من 3 سنين.. انسى!

وطبعا أنا منسيتش.. لإني كنت متأكد من سقوطي.. لكني الحمد لله.. نجحت!

من توابع النتيجة.. إني هحول بإذن الله لكلية الآداب قسم الصحافة والإعلام.. جامعة حلوان (أو حيوان زي ما بسميها) أو عين شمس.. أو بنها حتى.. أي حتة أقرب شوية من قنا..

يلا يا جماعة.. نتلقى تهانيكم في التعليقات.. ومفيش حد يقولي عايز بيبيس.. مفيش بيبس أو حاجة ساقعة.. مفهوم؟


هناك 8 تعليقات:

ام مليكة يقول...

الحمد لله انك واهد بالك عموما يلا بقى المثل بيقول لك "أعمل الخير وارميه البحر"
ههههههههههههههههههه
مبروك يابيرو ياربدايما حياتنا كلها نجاح وتطور وجمال يارب تكون دايما مبسوط وفي امان

Lasto-adri *Blue* يقول...

الف مبروك
وعقبالى يااااا رب

مُصْعَب إِبْرَاهِيم يقول...

مبروك

جبنة تلاجة

مابروووووووووووووووووووك

المستكشف/احمد محسن يقول...

ألف مبروك و عقبال متخلص من التعليم و سنينه

و ياريت تدعيلى عشان السنه دى أخر سنه لى و ربنا يعديها على خير

غير معرف يقول...

مبرووووووووووووك ياخفه

معتـز عبد الرحمن يقول...

مبروك

غير معرف يقول...

انتا طريقة كتابتك كويسة
بتحاول تقلد انيس و احمد رجب و طبعا عمنا الكبير محمود السعدنى
بس ولا واحد من دول بايحاول يغلط فى مكان محترم زى بيتم تقديم العلم فيه لالاف الطلبه و الى معظمهم مش فاشلين زيك
طبعا انتا معايا ان تغيير اسم جامعى حلوا الى حيوان قمة اله الزوق

محمد السيد..مش حاسكت يقول...

ألف مبروك ياريس ...

ولو إن شكلها متأخرة ... بس معلش ...

تعرف بالمناسبة دي ... لو جيت اسكندرية ..ليك عزومة محترمة .. بس انت تعالي ...

و لو عايز تجيب معاك كام واحد من عشرينات ... و تاخدوا فسحة ... عمركم ما حتنسوها ...

عموما ..مبروك ...

و إن كان من خبرتي في حلوان .. 5 سنين ... بأقول لك ....

قنا أرحم بكتييييييييييييير
يلا سلام