الخميس، مارس 09، 2006

عندي حالة "جنان"

هي دي الحقيقة المرة اللي محاتج إني أعترف بيها، فجأة (يا ريت تقراها بالشكل التالي فج أتن) لقيت نفسي حاسس إنه ضروري إني أكون مجنون.. كفاية بقى عقل، بقالي عشرين سنة وست شهور و18 يوم عاقل، عملولي إيه الكام يوم دول.. ولا حاجة ..

المهم.. قعدت أفكر يا ترى يا هل ترى يا واد بيرو لما تحب تجنن تعمل إيه..؟؟

الحقيقة أنا قدامي طرق كتيرة جدا للجنان، منها إني أخرج في مظاهرة للإخوان وبعدها على طول مظاهرة لكفاية.. بس الحقيقة اسلوب الجنان ده هيتبعه إن الحكومة والأمن هيتجننوا عليا، وأنا عن نفسي حابب إني أتجنن لوحدي من غير ما أشرك حد معايا، يعني الحكومة تبقى موش عازية تشترك معايا.. أغصب عليها..؟

طيب أنا بفكر في فكرة مجنونة موت.. (خد بالك من موت دي)، نويت آكل فراخ .. هروح المطعم المعتاد (أبو شعراوي الكبابجي) وأطلب فرخة واقعد آكل فيها قدام كل الزباين وأغيظهم كلهم.. فكرة تحفة موش كدة :)..؟؟

بقالي اسبوعين بروح المطعم، وكل يوم أطلب فراخ، والراجل يقولي مفيش.. لما كرهت الراجل والفراخ والجنان..

سيبكم من كل المقدمة البايخة دي.
"أنا عايز آكل فراخ يا جماعة .. والله العظيم وحشاني جدا"
بس خلاص

هناك 4 تعليقات:

مصـ( الخير )ـعب يقول...

كاك
كاك
كاك

و أنا كمان
كاك

عمرو عزت يقول...

تعالي يوم الخميس الساعة ستة في ميدان التحرير
http://www.manalaa.net/node/19668

هاتشوف الجنان عالي اصله

بنت امي الغالية يقول...

طيب ممكن نقضيها سمك يابيرو وبعدين ماهو السمك طعمه حلو برضه ، بس تصدق عندك حق الفراخ وحشتني انا كمان والراجل بتاع المطعم خلاص شلني وقررت ماروحش تاني قبل ما الفراخ تيجي وتقول كاك كاك كاك

محمد السيد يقول...

ألف مبروك يا ريس...........
واضح إن الراجل بتاع الفراخ وشه حلو عليكككككككككككك
كاك كاك كاك .........


mohamedmat@hotmail.com