I AVEO

للذين يفضلونه افتراضياً..

عن مواقع القاعدة على الإنترنت واستخدام تنظيم القاعدة الإعلامي والتنظيمي لشبكة المعلومات، تشاهدون الليلة ( الخميس) على شاشة قناة الجزيرة فيلم تحقيقي جديد يحمل اسم "مجاهدون افتراضيون".

الفيلم مدته 52 دقيقة، وتم تصويره في مصر والأردن وعاصمة عربية أخرى دون ذكر اسمها، وهو إخراج مشترك لـ"أحمد زين" و"البراء أشرف".

يظهر في الفيلم عدد من الضيوف، منهم الباحث ضياء رشوان، والباحث عبد الله الطحاوي، والصحفي إيهاب الزلاقي والمحلل عبد الرحيم علي.

أما من خارج مصر فنجد "مشعان الجبوري" مالك قناة الزوراء الفضائية التي تم إغلاقها بتهمة بثها لأفلام من انتاج شركة السحاب التابعة للقاعدة.. كذلك الأستاذ أيمن جاب الله نائب رئيس تحرير قناة الجزيرة، بالإضافة إلى عدد من الضيوف الأوربيين، وكذلك نائب وزير الداخلية المصري لشئون الإنترنت والمعلومات.

الفيلم على كل حال وجبة تحقيقية خفيفة وساخنة، والدعوة مفتوحة للجميع للمشاهدة على شاشة الجزيرة مساء اليوم الخميس، في الثامنة مسائا بتوقيت القاهرة ومكة المكرمة، وكذلك باب الآراء والتعليقات مفتوووووح هنا في المدونة لاستقبالها..

ما "براء" الخبر!

مش عارف أرفع الفيديو الواضح، اتفرجوا عليه هنا

لمن يجرؤ على الكلام

إذا كانت الصحافة في أبسط تعريف لها هي "فن مراقبة السلطة" كما يقول الصحفي الأمريكي روبرت فيسك في كتابه الأخير، وإذا كانت السلطة قد استطاعت أن تقيد الصحافة وتمنعها من مهمتها في المراقبة.. وإذا كانت الأمور لا تستوتي في أي بلد كان دون أن تكون هناك رقابة على السلطة.. تمنعها من أن تطلق يدها لفعل ما تريد وقت ما تريد وكيف تريد.. فإن الحاجة ماسة لطرق بديلة في المراقبة..

ويبدو أن تجربة المدونين في مصر كانت موحية لأخوة في الأردن لمحاولة تكرراها، وهو ما يبدأ اليوم في مدونة جديدة على "blogspot" تحمل اسم "من يجرؤ على الكلام؟" وهي امتداد لمدونة قديمة بنفس الاسم على "مكتوب"..

شخصياً، استفزني النداء الذي وجهه القائمون على أمر المدونة – وهم أكثر من شخص في تقديري – للمدونين المصريين بمد يد العون لهم، سواء بالأفكار أو النصائح على أقل تقدير.

أشعر بالفخر الآن، لكوني مدون مصري ساهم ولو بالقليل في إعطاء هؤلاء بعض الأمل في أن يصنعوا شيئاً ما لأنفسهم ولبلدهم..

على كل حال "كفاية رغي"، ومن رأى منكم إمكانية عمل أي شيء يمكنه التواصل معهم على مدونتهم.. والسلام ختام.. والأجازة لازالت قائمة..

أنت جيت.. يا رمضان

مثلا.. مثلا

من فيلم "فاعل خير" انتاج عام 1953 ومن إخراج حلمي رفلة، يغني محمد فوزي وصباح دويتو "أنا عايز مثلاً كدة مثلاً".. الأغنية إهداء لصديقي الذي أكتشفها وأخبرني عنها.. أحمد زين، وللأصدقاء السميعة..

هو : أنا عايز مثلاً.. كدة مثلاً

وبقول مثلا.. لو مثلا قلبك كان خالي

هي : مثلا

هو : مثلا

وشخص مثلا.. كدة مثلا

وبقول مثلا. كان قلبه كمان زيك خالي

هي : مثلا

هو : مثلا

في مانع لما يحبك

هي : مثلا

هو : مثلا

وتلاحظي انه يحبك

هي : مثلا

هو : مثلا

ترحمي شكواه

من نار كوياه

مدام في ايدك انتي دواه

وبشرفي مثلا

ده كله مثلا

ولا قصدي أبداً غير مثلاً

هي : والشخص ده مثلا يعني

يعني مثلا

مسكين كدة للدرجة دي؟؟

هو : مثلا

هي : ونار هواه يعني مثلا..

ملهوش دوا غير في فؤادي؟؟

هو : مثلا

هي : ولا راضي بأي حكيم؟؟

هو : مثلا

هي : والحالة في قلبه جيم؟؟

هو : مثلا

هي : جايز أداويه

لو كنت ألاقيه

وعلى الله أقدر كدة أشفيه

وبشرفي مثلا

ده كله مثلا

ولا قصدي أبدا غير مثلا

هو : لكن صاحبنا إن كان مثلا

يعني مثلا

اه عايش يا دوب على قد الحال

هي : نار الهوا آه مثلا

وبقول مثلا

مبتدواش بجاه ولا مال

هو : معناه أقوله يطمن

هي : خمسين بالمية

هو : لكن ده رايح يتجنن

هي : طب مية المية

هو : أطير أقوله أهنيه

هي : بس أوعى رد الفعل عليه

هو : وخايفة ليه؟؟، مدام ده مثلا

هي : وانا قلت إيه.. ما هو برضه مثلا

هو : وبشرفي مثلا

هي : وده كله مثلا

هو : ولا قصدي أبدا غير مثلا

.........

ولهواة الكليبات إليهم "إفرض مثلاً" لحكيم، والخبثاء يلاحظون "أميرة فتحي" في أول ظهور لها على الشاشة، قبل الزواج من منتج أفلامها.

المدرسة الذكية الوحيدة في مصر

من شهرين أو أكتر، وهناك شاب لطيف يقف على ناصية شارعنا "زغلول" بآخر الهرم، ويعرض علي بابتسامة ساذجة أن أتناول منه ورقة إعلانية صغيرة..

ولأني أعرف أن هذه الإعلانات عادة ما تكون لمدرسة أو نت كافية أو مقلة لب، فإني لم أجد أي قدر من الحماس لتناول الورقة خاصة وأني أعلم ان تصرفي الوحيد بعد تناول الورقة سيكون إلقاؤها بعيداً في مشاركة فعالة مني بحملة "حافظوا على نظافة مدينتكم"..

على كل حال، فإن الشاب بطريقة ما استطاع أن يقنع زوجتي باستلامها، وحيث أنها لم تهتم بقراءتها، فقد رأيت أن أقتل بعض الملل، واقرأها.. وقد كان..

وبطريقة ما أخرى، فقد وجدت هذه الورقة طريقها إلى جيبي.. ومن جيبي إلى الإسكانر، ومنه إلى المدونة.. وبدون أي تعليق أو تعقيب على محتواها الجبار..

باربي للتجميل.. أوعى الإيميل

ارحموا من في النت يرحمكم من في السماء..

الصورة دي بتجيلي يومياً على إيميلي.. بعنوان " For Ladies only"، بعتلهم أستلحفهم بالله كفاية، برضه بيبعتوا، بحولها على الـ"spam"، بتجيلي من إيميل تاني..

يمكن يكون الحل إني أروج لهم فيشوفوا المدونة ويعرفوا إني راجل وإني اقتنعت بفكرة جل الأظافر الطويل الأمد وهبقى أقول لمراتي عليها وأسفرها الدوحة مخصوص تروح تضرب ضوافرها وترجع..

يا ولاد بلدنا.. أنا بتجوز

- والفرح فين يا عريس؟؟

- في بيت أبويا.. في كرداسة!

- وفين كرداسة دي؟

................

الوصفة سهلة جدا، لو جاي مواصلات يبقى قدامك حل من اتنين.. الأول إنك تركب من قدام باب كلية آداب جامعة القاهرة، من هناك هتلاقي ملف تقف فيه تركب منه عربيات بتقول كرداسة، أوعى تركب عربيات صفط اللبن، أركب كرداسة بس..

طب لو جاي من فيصل، سهلة جدا، تنزل المريوطية، هتلاقي عربيات واقفة على اليمين، بتقول كرداسة، منشية لأ، تركب من هناك تنزلك كرداسة، ولو جاي من الهرم انزل مريوطية هرم هتلاقي نفس العربية..

طب والدائري؟؟..

سهلة برضة، تركب من الدائري أي حاجة رايحة ناحية الهرم، تنزل نزلة المريوطية أو صفط اللبن، ومن هناك هتلاقي عربيات بتروح كرداسة.. هي نفسها العربيات بتاعة الوصفةالسابقة، بس هي بتتقاطع مع الدائري عند المريوطية وصفط اللبن..

ده بالنسبة للمواصلات، طيب واللي جاي عربيات، يااااااااااااااه يا جماعة.. ده الطريق سهل بشكل، تركب الدائري، تنزل نزلة صفط اللبن أو المريوطية، تتبع الأسهم لحد كرداسة.. الموضوع سهل جدا..

طب ولو جاي من الدقي (عشان خاطر الناس بتوع إسلام أون لاين)، تفضل ماشي في فيصل، ومنه على المريوطية، ومن المريوطية على كرداسة، في طريق تاني سهل باستخدام كوبري ثروت، بس محتاج حد يكون مشي في الطريق قبل كدة أو يفضل يسأل كتير!

طيب، النقطة الأهم.. وصلت كرداسة عن طريق المواصلات أو العربيات أو البر أو الجو أو البحر.. تعمل إيه بقى جوه كرداسة.. ؟؟

اسأل على مسجد الرحمن، وعن حضانة مكة المكرمة.. ده بيتنا إن شاء الله.. الطريق للبيت سهل جدا، وعموما ساعات وهيكون في خريطة على المدونة بالطريق رغم سهولة الوصفة..

معلش يا جماعة عارفين إننا محيرينكم معانا.. بس عشمنا فيكم كبير إنكم تيجوا وتصنعوا فرحتنا.. نظرا لضيق الوقت فالدعوة عامة لكل بشري على كوكب الأرض.. وأخص بالذكر الأصدقاء والزملاء والمدونين والمدونات..

آه.. ثانية واحدة نسيت.. أنتوا عارفين الكلام ده هيحصل أمتى، يوم الجمعة الجاية 13-4، الساعة 8 هيبدأ الفرح ويخلص 10.. للإستفسار والحجز والإستعلام والرحلات... الإتصال على تليفوني الشخصي : 0101586595.. وأيا كان شخص اللي هيرد عليك، هيكون عنده معلومات كفاية إن شاء الله..

دمعة فرح

النهاردة.. وأنا في الميكروباص قعدت أتكلم مع دعاء عن الفرح، تخيلتكم كلكم جنبي.. شفتكم كلكم.. وفرحت بيكم قوي.. ولأول مرة.. نزلت مني .. دمعة فرح!

بالمناسبة دي إليكم صورتي أنا ودعاء في كتب الكتاب.. أنشرها حصريا قبل الفرح بأسبوعين بالظبط.. استنونا..

سيلانترو السعادة..

كنت قاعد هناك..

رن التليفون 3 مرات.. وفي كل مرة كان خبر حلو.. وأنا بصراحة بقالي كتير.. مسمعتش أخبار حلوة..

قعدت أنا أخلص شغلي على اللاب توب مستفيد من الـ"وايرليس" القوي، شوية.. دخل دريني وفؤاد.. قعدنا ساعتين.. خلصنا شغلنا.. وقمنا حاسبنا على الكيك اللي كلناه، وأنا دفعت تمن البيبسي كانز، وأحمد حاسب على القهوة الإسبريسو اللي طلبها.. قسمنا الحساب علينا.. وفؤاد حط من جيبه جنيه بقشيش.. ولما خرجنا اكتشفنا إن الدنيا كانت برد قوي.. رغم إنها كانت دافية وإحنا جوه!

قلت لدريني وفؤاد – بعد ما خرجنا - : أنا هسميه سيلانترو السعادة..

ضحكنا ومشينا..

الكلام ده كان من يومين..

النهاردة دريني بيكلمني وبيقولي : هنتقابل فين!

أرد وأقول : سيلانترو طبعا!

بوتجازات بنت المجنونة

شاشة سوداء.. مكتوب عليها "الطبخ على مر العصور".. وينطق الجملة السابقة أي شخص لكن على نفس الطريقة التي نسمعها في "ميلودي تتحدى الملل"..

تفتح الكاميرا على مشهد لرجل بدائي يمسك في يده حجر كبير وطويل كإنه جورنال.. مكتوب عليه بالعربي "البدائي اليوم" وينادي بكلمات غير مفهومة.. في حين تظر الترجمة على الشاشة.. "أنا جعان.. قومي إطبخيلي أي حاجة آكلها"..

تظهر زوجته جالسة أمام حجر آخر تمسكه كإنها مجلة مكتوب عليها "البدائية والطفل".. ترد عليه بنفس اللغة غير المفهومة.. "عايزني أطبخ قوم إصطاد أنت"..

(قطع)

نفس الرجل في المشهد السابق، لكن يبدو وكأنه من عصر متقدم (المماليك مثلا)، يجلس على أريكة وحوله فتيات جميلات.. يصرخ بصوت عالي "أطبخي يا جارية"..

تظهر نفس الفتاة في المشهد السابق وهي تقوم بالرقص له.. وتقول "كلف يا سيدي"..

(قطع)

يظهر نفس الرجل، يجلس على كنبة أميركان، وفي يده ريموت كونترول.. يقول بصوت عالي.. "حنان.. حنان.. أنا جعان يا حبيبتي"..

تظهر حنان أمام المرآة، تنزع الـ"هيد فون" عن رأسها وتقول.. "عايزني أطبخ.. تجيبلي بوتجاز بنت المجنونة"..

(قطع)

يظهر الرجل والفتاة في المطبخ بجوار البوتجاز في المطبخ.. ونسمع صوت يقول.. "بنت المجنونة.. اختيار المرأة المصونة".. شغاااااااااااااااااااااااااال

(قطع)
..............

+ هذه التدوينة من وحي مادة "الإعلان التطبيقي" التي تقوم بدراستي (ولا أقوم أنا بدراستها)..

+ بالنسبة لـ"ماري جرجس" المكتوبة على الكتاب، فالسبب هو إن صاحبة الكتاب أخت مسيحية فاضلة، وحيث أن "موسم بيع الكتاب الجامعي" يفوتني لأني أصل لـ"قنا" – بلد دراستي – في اللحظات الأخيرة قبل الإمتحان، يكون الحل الوحيد ساعتها هو تصوير كتب الغير.. مسلمين كانوا أو أقباط..

براء.. مع الباعة (فقرة إعلانية)!

إشارة مرور واقفة، كلوز على وش عسكري المرور وشكله مضايق ومرهق وعرقان جامد..

مشاهد متقطعة من سيارات تقف في الإشارة.. زوج وزوجة يتخانقوا.. شاب وزميله بيتكلموا في حوار مهم وملخومين في الكلام.. ناس واقفة جوه الأتوبيس مزنوقة.. راجل نايم في ميكروباص.. ركاب الميكروباص بيتخانقوا على الأجرة..

كلوز على وش راجل مبتسم قوي وهو بيقرأ الجورنال بدون أن نكشف ماذا يقرأ.. الراجل راكب في الأتوبيس الزحمة

صوت من بعيد رسالة موبايل.. كل الناس تتحرك ويحدث هرج ومرج كل واحد بيطلع موبايله وبيكتشف الجميع أن رسالة واحدة مرسلة لهم جميعا..

كلوز على الرسالة مكتوب فيها "كلمني شكرا"..

أصوات متداخلة تنطق كلمة "كلمني شكرا"..

الراجل النايم يستيقظ.. والزوج والزوج يمتنعان عن المشاجرة وينظر كل واحد لموبايله ثم يريه للآخر..

نقترب مرة أخرى من الراجل اللي كان بيقرأ الجورنال.. نجده مازال يقرأ.. نقترب أكثر.. نلاقيه بيقرأ صفحة "كلمني شكرا" في جورنال الدستور اللي بيحررها البراء أشرف..

يبص الراجل للكاميرا بابتسامة.. فيد تو بلاك.. وصوت بيقول.. كلمني شكرا.. كل أربع.. تابعوها