الخميس، مارس 30، 2006

دبلة فضة.. في إيدي اليمين


الحياة محطات.. طبعا ما كلنا عارفين إنها محطات، لكن يا ترى كل واحد فينا بيفكر في المحطات اللي "بيقف" فيها..

غريبة قوي إن المحطات الموجودة في حياتنا تبقى موجودة عشان نقف فيها، مع إن الأصل إنها موجودة عشان تمشينا أكتر لقدام وتدفعنا موش توقفنا..

في رأي بيقول إن الحياة مطبات، موش محطات، وبرضة الفكرة السابقة تنطبق عليها، يعني برضه الحياة عبارة عن شوية حاجات بتعطل سير المراكب السايرة..

طيب، بلاش فلسفة وخلينا نرجع لموضوعنا، يعني لو فرضنا إن الحياة محطات.. أو مطبات، فهل معنى ذلك إن في محطة جديدة (أو مطب جديد) حصلت في حياتي..

هو ده بالظبط اللي حصل، في مفاجأة كل الناس مكنتش متوقعاها (حتى أنا شخصيا)، حدث إني خطبت..

هو ده اللي حصل، خطوبة وقراءة فاتحة، وفجأة لقيت في إيدي اليمين دبلة فضة، وببص على إيد خطيبتي لقيتها فيها دبلة وخاتم و...

تعالوا نبدأ من الأول، كنت حكيت لكم من فترة على البنت اللي بحبها، "بنت البلد" لو تعرفوها، وكنت طول الفترة اللي فاتت منتظر إن أبويا العزيز يرجع من السفر عشان يخطبلي، وكنت أنا مستعجل فروحت لاهلها لوحدي وتعرضت لاختبار من أهم وأصعب اختبارات حياتي.. ورجع أبويا من السفر من يومين، وكإنه هو الجني اللي خرج من المصباح عشان يحققلي كل أمنياتي.,., مشكلة الشقة اتحلت، وجه معايا لبيت العروسة، واتكلم مع اهلها، وكل الجو كله وخلاهم يوافقوا على اني ابقى جوز بنتهم..

لأول مرة أعرف قد إيه الأب ده حاجة أروع من إنها تتوصف في كلمات، أو إنها تختزل في مواقف، فرحة أبويا وأنا بحكيله عن حبيبتي، ونظرة عينه وهو شايفني بلبسها الدبل، وابتسامته وهو بيستقبلني أنا وهي في مكتبه..

قبل كدة، كنت شايف إن أبويا ده شخص موجود في حياتي عشان يقيدني، لكن بعد وقفته جنبي وقدامي وورايا في خطوبتي، أدركت قد إيه إن التقييد موش لازم يكون حبس، لإنه غالبا كان بيكون خوف عليا.. وكفاية قوي في زمن زي اللي احنا عايشينه ده إنك تعرف إن في حد (أي حد) خايف عليك حتى لو كان أبوك..

أمي، زوجة والدي، إخواتي، زمايلي في الشغل، كل دول ناس شوفتهم قريبين مني قوي وهما فرحانين بخطوبتي، أجمل إحساس في الدنيا إني أكون قاعد في مكتبي وألاقي واحد زميلي في قسم تاني في الشغل ومعرفش اسمه أصلا داخل المكتب مبتسم قوي وهو بيسلم عليا وبيبوسني وبيقولي ألف مبروك وبيسأل كل الموجودين عن عروسة براء.. "هي فين دي اللي خلت براء يقرر إنه يخطب في سنه الصغير ده..؟؟"

مدير قسم تاني جنب القسم اللي بشتغل فيه، كلمني على التليفون الداخلي، وقالي تطلع حالا مكتبي، طلعتله، قعد يكلمني كلام أبوي جدا، استغربته جدا، اللي استغربته قد ايه الراجل ده كان قريب مني من غير ما آخد بالي..

موش عايز أطول عليكم، لكن فجأة حسيت إني كبرت، ورغم إن كل اللي حصل مجرد دبلة فضة في إيدي اليمين، إلا إن معناها أكبر بكتير من مجرد دبلة، كفاية أقولكم إني أول 3 أيام صحيت بالليل وأنا حاسس إن حد ماسكني في إيدي، وبعدها أكتشف إنها الدبلة اللي لسه متعودتش عليها..

عرفت الفرق بين الحب والجواز، إنك تحب واحدة فده شيء عادي جدا، لكن إنك تخطبها وتنوي تتجوزها فهتلاقيها ملت عليك الدنيا، والنظرة الواحدة ليها بترجم أحاسيس كتير جواك إنت نفسك متعرفهاش..

بحاول أستفزكم عشان تخطبوا، وبحاول أخليكم تدعولي إن ربنا يتمم على خير، قولوا أمين..

هناك 10 تعليقات:

Hazem يقول...

مبروك ربنا يتمم على خير :)

ahmad يقول...

مبروك يا سيدي

عبدالله مفتاح يقول...

الف مبروك يا براء وربنا يتمم على خير ويخليكوا لبعض

غير معرف يقول...

مبروك يا سي دي


وربنا يتمم على خير

ام مليكة يقول...

وانا كمان بقى عندي دبلة في ايدي اليمين بس دي اجمل حاجة في الدنيا محبوسة اه بس احلى حبس في الوجود ، هو احنا صحيح فجأة لقينا نفسنا اتخطبنا ولبسنا دبل وفجأة برضه بقينا مسئولين وبعد كام شهر هانتجوز ونجيب عفش وشقة وحاجات كده، بس بجد احلى حاجة في الدنيا انك تلاقي حد تكون مطمئن معاه ومرتاح قوي وانت جنبه
نصيحة من بنت بلد اللي ما خطبش يخطب بسرعة

المـ(همس)ـشاعر يقول...

عرفت ان براء و بنت البلد اتخطبوا من مصعب .. رب الكيى بورد و الماوس .. فرحت باركت على طول على الماسنجر ما شفتش البلوج .. لسه شايفاهم الاتنين الناهرده .. بجد عيطت اوى لما قريت الى براء كاتبه
حسيت فعلا قد ايه جميل اوى ان الواحد يحب و فجاءه يخطب و يكون عنده حبيب قدام الناس و قدام ربنا .. و الناس كلها تكون عارفه

ربنا يباركلكوا يا رب يا براء انت و دودو و يتمملكم على خير .. و عقبال كل الشباب و البنات يا رب ان شاء الله على الخير

غير معرف يقول...

عقبالى انا ونونو حبيبتى
ادعولى يااخوانا

غير معرف يقول...

انا كمان حصلى كده وبرضه اكتشفت حب بابا ليا وقفته جنبى وعقبال كل الشباب وعقبال ما كل المخطوبين تتنقل من اليمين للشمال ويبقوا متجوزين

Mahmoud Hermes يقول...

مبدائيا انا كانت قرفن عشان اما مبحبش قلت الادب او الكلام البلبوص بتاعك :) لاني مش عارف بس مبرتحش المهم كملت النوت عشان مبحبش انتقد حد من غير لما اقراء موضع لا اخر ول تجولت شويه لقيتك قايل مش حبب انتقاد لان دي حياتي انا قولت ماشي شدتني قوي وروحت فرار النوت بتاعتك من شعات الوادي الجديد و بكامل مبسوط اني بتعرف علي حقيقت شخص معرفوش من سطور في اجنده بني جاتله هديه من مامته مبروك علي الخطوه في النوت ديه وهبراكلك علي ملاك في النوت بتعتها متزعلاش من اول سطرين بس انا بحب الصراحه زيك يبتاع الكلام البلبوص حلوه قوي الكلمه ديه :)

غير معرف يقول...

ومن الواضح ان هناك الكثير لمعرفة ذلك. أعتقد أنك قدمت بعض النقاط الجيدة في ميزات أيضا. الاستمرار في العمل ، عملا عظيما!