عارفة.. (قصة قصيرة قوي.. ومعروفة)

كإن في كلام جوايا عايز أقوله ومش عارف..

على العموم أنا بحاول أكتب.. عملا بنصيحة قديمة بتقول إن الكتابة أسهل كتير من الكلام.. باعتبارها (الكتابة) أعظم وأهم اختراع للبشرية زي ما عمنا جمال فهمي بيقول في الدستور.

سيبك من البداية اللي مش رومانسية دي.. ومين قال إن كلامي هيبقى رومانسي.. أنا متأكد إني مبقتش رومانسي خالص الأيام اللي فاتت.. بلدنا الحال فيها بقى بيحاصر الرومانسيين، سواء اللي بيحصل في عبد الخالق ثروت في وسط البلد، وفي أول شارع ضيق شمال وإنتي داخلة من شارع رمسيس، هناك هتلاقي نادي القضاة، صغير محندق، وعلى بابه، بتتقتل كل يوم الرومانسية، وعلى سلم المبنى الأصفر الضخم اللي جنبه، دي النقابة يا حبيبتي، بيتم اغتصابها، وفي وسط الشارع، بيتهتك عرضها..

بلاش كلام في السياسة.. أنا عارف إنك مبتحبيش السياسة وحكايتها، وإننا أصلا مختلفين قوي، إنتي بتحبي كفاية، وأنا من يومي بكره اللون الأحمر والعلم الأحمر والأفكار الحمرة.. وحتى الشتيمة القبيحة بتاعة.. (..) حمرة!

عارفه، بعيد عن السياسة، في حاجات تانية كتير بتخليني أبقى مش رومانسي..

في الشغل، انتي عارفة اللي بيحصل، المدير وعاميله، وشغل النسوان عمال على بطال، والزن بين الموظفين والموظفات، فاكره أول ما حبيتك، كان لازم تسيبي الشغل بعد أسبوع بس.. نظراتهم بتخنقنا، وهمسهم كل يوم وإحنا خارجين سوا بتزعق في ودانا وبتخليكي تعيطي كل يوم في التليفون.. لازم تخطبني!

حتى في الخطوبة..

طبعا إنتي عارفه الجزء ده كويس قوي

عارفة طبعا.. مامتك واللي عملته معايا أول زيارة، مع إنها كانت تعرفني، والأستاذة سعاد قريبتك دي اللي شغالة معانا في الشركة صاحبتها، وهي كلمتها قبل ما أزوركم، وشكرت لها في أخلاقي، لكن مقابلتها معايا خلتني أظن إن مدام سعاد مشكرتش في أخلاقي، لأ دي عملت حاجة تانية على وزن "شكرت" برضه.. بس عيب إني أقولهاك.. بس إنتي عارفاها!

فاكره ماما قالت إيه ولا أقولك.. إنتي عارفة يا حبيبتي وفاكره كمان..

مامتك قالت : يا بت ده تخين قوي..!

ومن يومها وإنتي بتزني عليا كل يوم أروح الجيم اللي جنب الشغل، وإنتي عارفه برضه إن الجيم ده بـ200 جنيه في الشهر، وأنا مرتبي كله 750، أمي بتاخد مني 400 أول كل شهر للجمعية، وإنتي بتاخدي 50 جنيه بستلفهم منك كل شهر.. وعمرك ما بتسامحيني فيهم، رغم أن الأكل كل يوم على حسابي، وتذاكر السينما، وأجرة الميكروباص، والتاكسي لما تكوني تعبانة أو كعب الصندل مكسور، مع إني قلتلك بطلي تلبسي كعب، وإني بحبك وإنتي قصيرة..

أروح الجيم وأخس، ولا أحوش عشان أشتري أوضة النوم اللي فيفي قريبتك جابت زيها من محل اسمه طويل ورخم أنا مش فاكره، مع إن أبويا بيأكدلك إن الأوضة نفسها موجودة في دمياط بنص السعر.. وإنتي عارفة أنها فعلا موجودة.. بس إنتي بتحبي فيفي قوي، ونفسك تجيبي أوضة زيها لإنكم حلمتم سوا بكدة وإنتم بنات صغيرة بتلعبوا سوا قدام بيتكم في أمبابة..

فاكرة إنك من إمبابة، وإنك كذبتي عليا أول ما عرفتك وقولتيلي إنك من المهندسين، وكنتي بتنزلي معايا كل مرة أروح أزور فيها جدتي وتمشي من ميدان سنفكس لحد وزارة الثقافة وتركبي من هناك عشان معرفش مكان بيتكم..

ولما جيت أزورك أول مرة..

خليتي مامتك تقابلني في بيت أم فيفي قريبتك، واللي اكتشفت بعدها إنها لا قريبتك ولا حاجة، وإنها كانت بتاخد معاكي درس في إعدادي وثانوي، وإنها خطفت منك أول ولد كان بيحبك، لإنه كان من المهندسين.. جارها!

إنتي عارفه كل ده.. وعارفة كمان إني عارف.. بس أنا مكنتش بحب أقولك.. كنت فاكر إني رومانسي.. ولازم أسكت عشان مجرحش مشاعرك..

بس أنا مش عارف أبقى رومانسي يا هوبة خالص..

يا هبة أنا مش عارف أعمل أي حاجة زي ما أنا عايزها..

أديني مستني كل الحاجات تيجي لوحدها.. منتظر كل حاجة..

صاحبي اللي جاي من أبو ظبي عشان يشغلني معاه في الشركة اللي هيفتحها بتحويشة غربته، والجمعية اللي مش عارف أسدد فلوسها وأمي مش عايزة تساعدني ومفروض أقبضها كمان أربع شهور وأشتري البوتاجاز والسخان وطقم المعالق..

طقم المعالق يا هوبة..

أنا اللي هشتريه يا هبة.. رغم إنك عارفة كويس.. أيوه إنتي عارفة كويس.. بلاش إنكار.. إنتي عارفة كويس إن طقم المعالق على العروسة مش على العريس... صح يا هوبة ولا لأ.. بس إنتي قلتيلي إنه على العريس.. ومامتك كمان قالت كدة.. وأنا أمي زعلت قوي لما عرفت إني هجيبه، وأنا ضحكت عليها وقلتلها إني خلاص مش هجيبه.. بس إنتي عارفه يا هوبة إني هجيبه..

وعارفه كمان إنك رفضتي أجيبلك شوية معالق من وسط البلد بدل العلبة اللي بـ 400 جنيه، اللي إنتي اخترتيها آخر مرة كنا في معرض السلع المعمرة بتاع نقابة الأطباء.. لما هنشتري باسم الدكتور عزت قريب أبويا..

يومها إنتي قعدتي تلفي كتير قوي، واختارتي العلبة دي بعناية، وقلتيلي ساعتها إنها نفس اللي عند فيفي.. ولما قلتلك إنها مش عجباني.. قلتي برومانسية شديدة.. مش مهم!

فاكرة.. وعارفة.. وامبارح تقوليلي إنك يا مطاوع مبقتش رومانسي زي زمان..

طيب أبقى رومانسي إزاي يا هوبة..

إنتي عارفه.. وأنا كمان عارف، ومامتك، وفيفي، وجوزها اللي كان بيحبك، وأمي، ومدام سعاد، وزمايلنا في المكتب.. كل الناس دي عارفه..

عارفة يا هبة.. وإنتي كمان عارفة..

إنك اتصلتي بجوز فيفي.. محسن، وطلبتي منه يشغلك معاه في شركته اللي فتحها من فلوس أمه بعد ما خلص جامعة خاصة في أكتوبر..

اشتغلتي معاه من غير ما تقوليلي إنتي اشتغلتي فين بعد سبتي الشركة اللي كنا شغالين فيها سوا..

فيفي كلمت مدام سعاد، ومدام سعاد لمحتلي، لكن ابن اختها سيد صاحبي قوي، وهو حكالي على كل حاجة..

فيفي حاسة بعاطفتك ناحية محسن، محسن بيستعبط لإنه واد معفن من يومه، وإنتي رايحه معاه وجاية ومش هامك حد.. وأمي عرفت لما شافتك في كارفور وهي بتشتري طلبات البيت بالـ 400 جنية اللي أنا بدفعهم لها كل شهر عشان الجمعية وهي بتضحك عليا وتروح تشتري بيهم سمنة وزيت وبرجر وبطاطس نص مقلية.. أمي شافتك إنتي وهو ، وإنتي كنت بتضحكي جامد معاه، وكنتي لابسه الجيبة الجينز الضيقة من ورا اللي أنا مش بحبها، واللي اتفقت معاكي قبل كدة إنك مش هتلبيسيها تاني..

فاكرة.. وعارفة إني عرفت.. لإنك شوفتي ماما، وإنتي عارفة إن ماما مش بتحبك من ساعة حوار فستان الخطوبة اللي ضهره عريان، وإنتي عارفه كويس.. أيوة عارفة إن ماما عملت قبل كدة عمرتين وحجت مع خالي سعيد اللي قاعد في الكويت من 20 سنة واللي مش عايز يبعتلي الفيزا، لإني مبحبش فاطمة بنته، واللي عايز يجوزهالي بالعافية..

إنتي يا هوبة اللي مبقتيش رومانسية زي زمان..

إنتي يا هوبة اللي نستيني عشان الواد محسن..

واللي بعتي الخاتم أبو ألفين ونص جايزة النقابة السنة اللي فاتت في القصة القصيرة ورحتي اشتريتي بيها لبس عشان شغلك الجديد مع محسن، إنتي يا هوبة اللي نسيتي أحلامنا.. بس لعلمك.. أنا عارف إنك هترجعي.. وإنك عارفة إنك هترجعي..


صح يا هوبة..

عارفة.. أنا بحبك قوي، ونفسي نتجوز بقى، ونقعد نبني في بيتنا ونسدد أقساط أوضة النوم اللي هنشتريها بالتقسيط.. من المحل أبو اسم طويل ورخم، بعد ما محسن بيه اتوسط عشان ناخدها بالتقسيط، مع إنك عارفه، وأنا عارف، إنه هو اللي دفع الفرق، وكمل على الخمس تلاف اللي كانوا معانا، وقالنا إنها بالتقسيط، وكل ده عشان خاطرك يا هوبة..

يا هوبة أنا لسه رومانسي..
لإني عارف كل ده وساكت..
ولأنك إنتي كمان عارفة.. سايباني لوحدي..

خطيبك : مطاوع
من مكتب جريدة الحقيقة بسوهاج، بعد ما مدام سعاد قررت تنقلني، لما محسن كلمها، وقالها، إن مرتبي لازم يزيد، حتى لو هيتم نقلي.. والمرتب زاد الحمد لله، وبقى 825... أنا راجع أول الشهر.. استنيني..!