الأحد، يوليو 09، 2006

شهدت الناس عليك.. يا واحد


للأستاذ "واحد من الناس"..

سا الخير عليك أولا.. ومتشكر جدا إنك لقيت في وقتك مساحة إنك تزور بلوجي الفقير إلى تعليقك الكريم..

أنا بس في حاجة بكرهها قوي..

الكرسي في الكلوب.. مش فاهم.. أفهمك يا سيدي

أنا يا عم بعمل دعاية لنفسي.. ليه يعني.. عشان قولت إني عايز أعمل فيلم لخالد صالح.. صحيح أنا مكتبتش سينما.. وكل علاقتي بيها إني اتفرجت على شوية أفلام.. وقريت شوية عنها.. لكن بقول كان حلم.. حلم.. حلم.. كابوووووس!

لإني بصراحة مكنتش أعرف إن البلوجات كمان بقى فيها هيئة مراقبة الأنفاس (على رأي أحمد زين)..

يا عم أنا لا بعرف أعمل دعاية لنفسي، ولا بعرف أعمل حاجة غير الكتابة وبس.. بدليل إني أصلا بدأت أكتب من 3 سنين، وإن مرتبي زي ما هو من ساعة ما أشتغلت.. وإني لسه مبقيتش رئيس تحرير ولا كاتب سيناريو ولا حاجة مهمة!

وبالتالي فأنا أظن إنك وجهت نصيحتك للشخص الخطأ.. ويشرفني إني أتعب نفسي في البحث عن الشخص الذي يستحق كلامك..

الحاجة المهمة.. واللي أقصد بيها الكرسي في الكلوب.. هو إن سيادتك مشرفتنيش بالتعرف على شخصك الكريم.. يعني "واحد من الناس" ده مش معروف ولا هو علم.. اللهم ما إلا يكون اسم آخر أفلام بلال فضل، ويكون ده رمز.. لكن معلوماتي عن بلال إنه واحد من الناس اللي بتعرف تعمل دعاية لنفسها وبالتالي لو حب يعلق في بلوجي أكيد هيكتب اسمه.. إلا لو كان ليه غرض تاني..

شوفت إزاي يا عم.. خلتني أشك في الناس.. اللي أنت واحد منهم.. مش تقولي كدة إنت مين وتعرفني منين وتعرف أسماء الناس في إسلام أون لاين إزاي..

على العموم رأيك لطيف.. وظريف.. لكنه مش مقنع قوي.. أنا بصراحة حبيت أرد عليك في بلوج مخصوص.. عشان تعرف إني مهتم قوي بكلامك.. وإنه للأسف ضايقني.. رغم إن دعاء (خطيبتي المصونة) قالت إن كلامك مش عيب.. وإنه في ميزاني.. بس هو ضايقني وخلاص.. وأنا مش عارف السبب..

تيجي أقولك على حاجة..

ربنا يسامحك.. ويسامح كل الناس..

يا عيني على التضحية والعطاء.. أحب أشكر نفسي.,. العفو!

هناك 4 تعليقات:

ياء يقول...

وحدوا الله يا جماعه ميصحش كده عيب
انتو مدونين ذى بعض وزى مدخلنا على النت بالمعروف نفصل بالمعروف وياوندوز ما دخلك شر ( فيرس ) وحدالله فى قلب يا براء وامسحها فى اى مدون تانى
لاكن ميصحش ترفع كيبورد فى وش حد


هو انت كنتو بتتعركوا ليه ؟ وليه

واحد من الناس يقول...

بص ياعم براء...
انا مكنتش فاكر ان الموضوع ممكن انه يضايقك كده .. بس انا معتذر بجد
وعلى فكره انا مقبلتكش قبل كده خالص !!...استغربت صح !!

بس صدقني ...الموضوع وما فيه اني لما قريت البلوج بتاع خالد صالح ...التعليق الوحيد الي لقيته هو الي كتبته ... يعني الموضوع لا هو حقد ولا غيره ولا دياولو ...زي الاخت الي علقت على كلامي إلي قالت كده...ودافعت عنك بإستماته وكأنها مالكية اكتر من مالك !!

وعلى فكره...انا ممكن اكون زودتها حبتين او تلات حبات... بس هو ده الي انا شوفته مع الاسماء الي ذكرتها في تعليقي على البلوج الي فات ... بس في امر مهم ان الموضوع لا يمس ذمة حد منهم ولا اخلاقه ولا احترامي انا شخصياً ليهم كلهم وليك انت كمان هو اسلوب مش اكتر وكل واحد حر ...الكلام ده بجد مش فض بلوج والسلام!

امر اخير ... بالنسبة ليه شخصياً انا بعيد خالص عن اسلام اون لاين وعن مصر .. ولكن حصل فترة واتعاملت مع بعض العاملين في الموقع بحكم بحث كنت بأعده عن الانترنت وده كان انطباعي عنهم الي قلت انه لا يقلل من شأنهم ولا اخلاقهم ولا احترامي ليهم

ومره اخيره انا بعتذر لو كنت سببت ليك اى ازعاج ...ولو عايز اعتذرلك على رؤوس البلوج انا مستعد ...بس شوف انت طريقة وممكن تنشر الكلام ده على الصفحة الرئيسية للبلوج لو عايز !


بس في امر اخير ..معلش اسمحلي

مش ملاحظ ان موضوع فيلم دي واسعة شويتين :))


كشرت ليه كده وقلبت وشك انا بهزر معاك :)
..مش واسعة ولا حاجة انت ادها وادود ..لأن الموضوع مش كميا...وانت راجل اسلوبك في الكتابة جميل وراقي ومن الناس الي بتابع شغلهم !

على فكرة انا باحث وصحفي في مركز ابحاث خارج الوطن العربي واضيقت جداً من اسلوب الاخت الي اتكلمت عن حقد وغيره وكلام بصراحة يخنق !!

أعتذر مرة تانية مش عارف ولا تالتة بس بجد انا مكنش قاصدي اني اسببلك اي ازعاج مجرد غلاسة من اخوك الكبير ...ارجو انك تكون مسامح لأن بجد الموضوع ده خلاني اراجع امور كتيرة ملهش علاقة لا بيك ولا بالموضوع !

واحد من الناس

البراء أشرف يقول...

مسامح يا عم.. والمسامح كريم.. وأنا ليا واحد صاحبي اسمه كريم بيحب يكتب سينما ووعدني لو بدأت أكتب في الفيلم هيكتبه معايا.. يعني القفة أم ودنين يشليوها اتنين.. وانت كمان ممكن تكتب معانا لو حابب.. الفكرة جاهزة وعايزة بس الكتابة.. ودي سهلة شوية مدام النية طيبة.. واتت شكلك راجل طيب.. خلاص يا جماعة.. بلاش تعوروه.. حصل خير.. الراجل طلع ميقصدش شتيمة..

بالنسبة للأخت اللي ضايقتك دي يا سيدي خطيبتي .. وبصراحة هي مش بتقبل عليا كلمة واحدة.. وبترد على أي حد كدة.. فمتزعلش يا غم.. تحب أبوسلك راسها.. يا ريت.. بس احنا لسه مكتبناش الكتاب.. مش تقولي مبروك..؟

سلام يا واحد..

والله وحده هو الواحد..

شادي يقول...

و الله زي العسل يا براء
إمضاء واحد تاني م الناس