الجمعة، يوليو 14، 2006

عن عادل.. الذي ينظف الحمامات.. ومرتبه بالدولار


في طريق رجوعك من الساحل الشمالي، ولأن بيتك ليس فيه طعام لأنك غادرته منذ أسبوع، ستكون في حاجة بالتأكيد إلى التسوق لدقائق، تشتري فيها ما تحتاجه لوجبة الغذاء.. خصوصا وأنك عدت في منتصف النهار.. أي أنك في شوق لوجبة غداء سريعة ومشبعة!

ولأنك تجلس في السيارة عينك على الطريق منذ ما يزيد عن الثلاث ساعات.. فستكون في حاجة لأن تجيب نداء الطبيعة وتدخل الحمام لتريح نفسك وجسدك الذي أرهقه الجلوس في الشمس كل هذه المدة..

........

بجوار بوابة بداية الطريق من القاهرة إلى الأسكندرية، وأنت خارج من البوابة في طريقك للقاهرة، ستجد على شمالك مبنى من طابقين.. عليه لوحة ضخمة جدا، مضاءة بالنيون والليزر.. ومكتوب عليها.. كارفور!

في كارفور.. ستشتري ما تحتاجه.. وفي الحمامات الملحقة به ستلبي نداء الطبيعة..

كل هذا طبيعي..

تدخل الحمام.. تقضي حاجتك.. وتخرج..

غير الطبيعي هو الشخص الذي قف في الحمام ليقول لك مساء الخير يا أستاذ ويناولك قطعة مناديل صغيرة وينتظر منك نص جنية فكة.. وطبعا تكون حجتك أنت جاهزة بإنك.. معكش فكة!

هذه المرة لن يطلب منك شيئا.. ولن يعير لوجودك أي اهتمام.. وسيستمر في مسح الأرضية.. ويهتم بتلميع الزجاج.. وكأنك مش موجود أصلا!

ركز في ملامحه.. اقترب منه.. دقق النظر...

تتذكر أنك في القاهرة.. التي هي عاصمة مصر.. التي هي دولة ثالثة من العالم الثالث.. التي هي فيها 80 مليون نسمة.. منهم 9 مليون عاطل..

كل هذه الأشياء تجعلك تدقق أكثر.. وتكتشف الكارثة.. الباشا اللي بيمسح الإزاز.. في كارفور.. اللي جنب بوابة الكارتة شمال.. في الحمام الرجالي.. سيريلانكي!!

..........

- "
يو اسبيك أربيك؟؟"..

-
أيوة..

-
أنت من الهند.. صح؟

-
لا من فضلك.. أنا من سيريلانكا!!

-
وبتعمل إيه هنا يا أخ؟

-
بشتغل في الحمامات..

-
طيب أنت بتشتغل هنا من أمتى؟؟

-
من شهر واحد..

-
وأنت لوحدك هنا.؟

-
لا إحنا أربعة من سيريلانكا.. اتنين مشيوا لإن المرتب معجبهمش.. وفضلت أنا وواحد تاني..

-
أنت بتقبض كام..؟

- 100-120
دولار.. حوالي 750 جنية!!

-
طيب أنتوا ليه فكرتوا تيجوا تشتغلوا في مصر رغم إنها دولة فقيرة وفيها بطالة وشبابها نفسهم مش شغالين؟؟

-
أنا لقيت فرصة عمل محترمة، وأنا مجتش وأنا عاطل.. أنا جيت لإني عرفت إن في شغل ليا.. يعني ظبطت الشغل قبل ما آجي..

-
أنت اسمك ايه صحيح؟

-
عادل..

-
يعني مسلم.. طيب ممكن آخد صورة!؟

-
ممكن طبعا..

.........

جهزت الموبايل، وأخذت الصورة.. وفي اللحظة التي فكرت فيها أن أطلب منه أن أأخذ له صورة وهو يمسح الحمامات ويؤدي عمله.. دخل علينا شخص آخر، ببدلة وكرافتة.. إنه الأستاذ محمد.. مدير الشيفت الليلي في الإشراف على الخدمات (أمثال عادل..(

شاهدني وأنا أصوره.. أقترب في حذر.. وسألني إنت بتعمل إيه يا حضرت!!

-
أنا صحفي من موقع عشرينات.. وكنت بعمل تحقيق عن العمال الأجانب في مصر..

-
وهتقول إيه في التحقيق ده..

-
مش هقول والله يا بيه.. أنا بس مستغرب شوية إن مصر فيها اجانب من الهند وجنوب شرق أسيا.. وبيشتغلوا في مهن معاونة.. يعني أكيد في مصريين يرضوا يشتغلوا نفس الشغلانة بالمرتب المغري اللي هو بيقبضه!!

-
عندك حق.. بس عادل عنده خبرة كويسة في المجال، وإحنا مش بنجيب أي حد..

....

شكرته علنا.. ولعنته سرا.. هو وعادل والخبرة.. يا ولاد الـ(...).. هي مصر لاقية تاكل عشان تأكل غيرها..

استفزتني الكلمات التالية.. "فرصة عمل – 100دولار – خبرة – مجال".. حاسس إني في لندن..

يلا.. أنا عملت اللي عليا.. ومحبتش أشتم في الموضوع.. لكن هنتظر آرائكم في الموضوع.. في التعليقات طبعا.. واللي هيشتم.. هنحذف تعليقه..

البراء أشرف.. مراسلكم من حمامات كارفور الرجالي..

*
ملحوظة:

فكرت إني أشوف كدة الحمام الحريمي فيه سيرلانكيات ولا لأ.. بس قلقت شوية.. لإن حجة إني صحفي عايز يعمل تحقيق مش هتكون مقنعة قوي!!

هناك 17 تعليقًا:

Mr-Biboooo يقول...

والله حقك تسب و تلعن كمان

يا سلااااااااااام

انا اول واحد مش قادر ينكر انى بحقد على الاخ السيرلانكى و اللى غايظنى اللى مشيوا عشان مش عاجبهم المرتب

ثانيا خبرة ايه طب ايه رأيك انى لما هروح كارفور هبهدلهم الحمام و يالا بقى عشان يعرفوا ان مصر لسه بخير
هوريهم خير بلدنا و ريحتها الاصيلة

sherehan84 يقول...

كارفور ده مول يعني بيدخله الطبقه المتوسطه والأعلى منها ومن الممكن إن يدخله حد من أولاد .. ولاّ بلاش ..أولاد الناس اللي واكلين البلد يبقى ليهم حق يجيبوا سريلانكي ينظف علشان عينيهم ما تتأذاش بمنظر واحد مصري فقير .. أو يمكن علشان ميفوقوش من الكدبه بتاعت مصر بلد الرخاء يفضلوا واهمين نفسهم بيها

علاء السادس عشر يقول...

يوجد ملايين المصريين الذين يعملوابالخارج سواء فى بلاد غنية مثل امريكا وأوربا مروراَ ببلاد فقيرة مثل العراق والأردن واليمن و كل هذه البلاد أيضاً بها نسب بطالة مختلفة, لماذا من حقنا وليس من حق غيرنا؟ على فكرة أهم موارد مصر هى تحويلات المصريين بالخارج.

علاء السادس عشر يقول...
أزال أحد مشرفي المدونة هذا التعليق.
Lasto-adri *Blue* يقول...

750
يابجحته.. ومش عاجبه كمان؟؟؟؟!! يا بجحته تانى مرة


دلوقتى الواحدة تخلف وتقول لابنها.. "روح يابنى.. عقبال ما أشوفك سيريلانكى"
عجايب

Gid-Do - جدو يقول...

بيرو
انت كتبت الاجابة بنفسك حتى شوف كدة

غير الطبيعي هو الشخص الذي قف في الحمام ليقول لك مساء الخير يا أستاذ ويناولك قطعة مناديل صغيرة وينتظر منك نص جنية فكة.. وطبعا تكون حجتك أنت جاهزة بإنك.. معكش فكة!

هذه المرة لن يطلب منك شيئا.. ولن يعير لوجودك أي اهتمام.. وسيستمر في مسح الأرضية.. ويهتم بتلميع الزجاج.. وكأنك مش موجود أصلا!

بس خلاص ـ شغل الشحاتة بتاع العمالة المصرية فى المطارات والاماكن السياحية حاجة تقرف بجد ـ دة مش معناة ان نستورد عمالة لكن لازم نبطل شحاتة ـ سلام

محمود ماجد يقول...

صبح صبح يا عم البراء

تدوينة جميلة

تعرف يا عم البراء ابويا صرف علي آلافات واستحمل دم اهلي اللي زي السم طول حياتي علشان يشوف حاجة واحدة بس ..يشوفني محاسب قد الدنيا

مش ابويا ده لو كان جدع كان طلعني واحد مسيئاتي قد الدنيا

مرتب الأخ السريلانكي اللي بينظف حمامات ده تقريبا قد محاسب خبرة خمس سنين والله

يلا ما هي بلد عبيطة خلي العالم ياكلوا عيش على قفانا

قلم جاف يقول...

تنظيف حمامات كارفور يذكرني بحكاية أيسوب القديمة : حكاية الجرس الذي يجب على الفئران تعليقه على رقبة القط.. من من الفئران سيجرؤ على ذلك؟

(علشان محدش يفهمني غلط .. مبشبهش نفسينا بالفئران!)

لكن.. في المقابل..

في شغلانات تانية وأماكن تانية فيه أجانب ، مش علشان همة سوبر لا سمح الله ، علشان عندنا تعليم متخلف وثانوية عامة هي غاية المراد من رب العباد ، مبيقدمش ناس تصلح للشغل في المجال نفسه ، وبيستمر التخلف للآخر لغاية ما بقينا عدد في الليمون ولا شغل ولا يحزنون ..

وطبعاً مفيش حساب ولا رقيب على سياسات الرابسو ورغاويه وجنرالات الجامعات الذين حولونا إلى أمة متخلفة..

أُكتب بالرصاص يقول...

أول مرة ألاحظ حكاية العمالة الاجنبية في مصر ،

وعمار يا مصر

ahmed ezzat يقول...

الحقيقة انا مدايق...بس مش مستغرب,لو نفتكر مع بعض من حوالي سنتين او اكتر لما مصر اللي ماليانة خير وكروش تستورد زبالة وخ...من امريكا...يبقي ندايق بقه من واحد بيغسل خير بلدنا عشان نستورد خير من امريكا...يمكن السرالنكين ليهم خبرة في التنظيف لكن ايه الخبرة في الزبالة والخرا...!
مش عارف

dr hatem el bitar يقول...

تسلم ايدك حبيبي موقع جميل
وتستحق التقدير
واتمني لك مستقبل باهر ومزيد من التقدم
ياريت نكون اصحاب منتظر ايميلك وبناء جسور الصداقة بينا
ويا ريت تشوف موقعي وتقوللي رايك
www.timo1.jeeran.com/timo/
www.hatom1.jeeran.com/bitar/
http://coolman0120c.jeeran.com/timo.html
http://www.enashir.com/blogs/timo/
وانا اقبل بتبادل الاعلانــــــــــات
وارجو ان تنشروا مواقعي بموقعكم الجميل
mboile: 002-010-5684344
للتفاوض بخصوص الاعلانات ارجو اضافتي على المسنجر
timo_dentist1@yahoo.com
والايميل التالي
sambo200437@yahoo.com
my foto
http://www.realpics.net/user_photos/37801/22_492364.jpg

غير معرف يقول...

دلوقتي يجيلك واحد شيوعي يقولك يا عمال العالم اتحدوا وان مشكلتك مش مع العامل ده وان مافيش حاجة اسمها بياخد وظيفة واحد مصري وان اصحاب العمل هما الاشرار اللي بيقمعوا العمال في العالم كله وان نظرتك للعامل ده نظرة عنصرية متخلفة انه جه بلدك وبيشتغل وانت مش لاقي وبياخد اكتر منك
لو جالك واحد من دول قول له ** أمك

farida_farawlah يقول...

السلام عليكم
عجبني قوي تعليق جدو
ودي الحقيقة بغض النظر هل ده نقبله أو لأ
العمالة المصرية أصبحت من أسلوب الشحاتة دي مغضوب عليها مثلا في البلاد العربية ولو إنهم غلابة ماهم ماأتبعوش أسلوب الشحاتة دي إلا من غلو الحياة في مصر فضيعة ماء وجههم
فيه شئ كمان .. كارفور الرئيسي أصلا أصحابه هنود في أكبر مستعمرة هندية لبلد عربي وهي الإمارات
وهم غير إنهم مفضلين كعمالة هناك لإنهم يعملوا بجد في أصعب الظروف هناك وبأقل الإجور لكن ماحدث في كارفور هنا هو تكملة لزحفهم على الأقطار العربية كلها وتشغيل العمالة الشرق أسيوية .. سيريلانكا جنوب الهند ياأخوانا يعني منهم فيهم ومن الواضح أن مشروع كارفور زحفه على مصر وإفتتاح كل الفروع دي بعد شوية ح نلاقي فيه غالبية العمالة شرق اسيوية

ياسين يقول...

سلام
شفت برنامج الجزيرة اليوم ودورت على المدونة دي
أولا, أنا من روسيا, من موسكو
وعايز أقوللكو حاجة مهمة قوي
أثارت بعض التعليقات هنا غضبي بسبب رائحتها العنصرية
احنا هنا نشاهد صعود الفاشست الجدد واليمين المتطرف ونسمع تقربيا نفس الكلام كل يوم - من 5 أيام قام بعض الأفراد بتخريب محلات وبيوت شيشانية في مدينة روسية شمالية بزعم أن حد من الشيشان قتل روسيا وأن جميع الشيشانيين مجرمين
ياجماعة, عايزين أيه بعد كده؟
نعم, أنا اشتراكي وعارف بالظبط ان سبب المشاكل الاقتصادية والاجتماعية مش في العمالة الاجنبية وانما في النظام السائد - المستبد والاستغلالي - وهو النظام الرأسمالي الاستعماري
المشكلة في طغيان الرأسمال لا في سريلانكي أو شيشاني غالبان

ياسين - igor@socialism.ru

bent za7mma يقول...

experience in what??!! m

and he is getting paid by Dollars??!!m

احمد سعد ابو الوفا يقول...

عن عادل الذي ينظف الحمامات ومرتبه بالدولار
يااااااااااااااااااه
انا اعرف عادل ده واعرف المشرف الاستاذ محمد سليبس بيقولوا عليه كدة
مش فاكر هو ده الاسم ولا لا
انا كنت شغال هناك عامل نظافة مع عادل وكنت باخد 750جنيه
انت كنت هناك من امتي
اصلي اللي اعرفه ان عادل ساب الشغل
علي فكرة ان مكنتش مصدقني
ابقي روح هناك واذا قبلت عادل ده تاني ابقي سلملي عليه

انا مكنتش متوقع ان كارفور هتبقي ملفته للانظار كدة
ده انا بحثت علي النت عن كارفور لقيت ناس بيتكلموا عليهاوالشغل
معجبين بالشغل هناك خالص

صدفه سعيدة يا استاذ رامي
علي فكرة انا لما هروح تاني لازم اسئل عادل ده هو في واحد جيه سألك عن كذا وكذا ودخل عليكو المشرف بتاعك وهو بيصورك
سلام

احمد سعد ابو الوفا يقول...

عن عادل الذي ينظف الحمامات ومرتبه بالدولار
يااااااااااااااااااه
انا اعرف عادل ده واعرف المشرف الاستاذ محمد سليبس بيقولوا عليه كدة
مش فاكر هو ده الاسم ولا لا
انا كنت شغال هناك عامل نظافة مع عادل وكنت باخد 750جنيه
انت كنت هناك من امتي
اصلي اللي اعرفه ان عادل ساب الشغل
علي فكرة ان مكنتش مصدقني
ابقي روح هناك واذا قبلت عادل ده تاني ابقي سلملي عليه

انا مكنتش متوقع ان كارفور هتبقي ملفته للانظار كدة
ده انا بحثت علي النت عن كارفور لقيت ناس بيتكلموا عليهاوالشغل
معجبين بالشغل هناك خالص

صدفه سعيدة يا استاذ رامي
علي فكرة انا لما هروح تاني لازم اسئل عادل ده هو في واحد جيه سألك عن كذا وكذا ودخل عليكو المشرف بتاعك وهو بيصورك
سلام