الأحد، أكتوبر 29، 2006

شطة.. ولمون (1)

- آسف بشدة على إهمالي في مدونتي الفترة اللي فاتت.. أفكار كتيرة لتدوينات أكتر.. فكرت أكتبها.. ولقيت إن من الأنسب كتابتها كلها مرة واحدة.. كل سنة وإنتم طيبين..

* بين كل الإشكالات التي تواجهني في حياتي.. ظهرت خلال رقدتي بالسرير أثناء العيد لظروف مرضي إشكالية أخرى أكثر تعقيدا..

إشكالية أن يكون المطرب المفضل لدى جارك هو سعد الصغير.. وتكون أمه أهدته ستريو جديد وهي راجعة من العمرة.. ويكون جارك لديه شغف كبير.. بتجربة الأشياء الجديدة.. وبمعرفة الفروق بين النسخة الأوريجنال من اغنية العنب.. ونسخة سعد الصغير!

جرب الوصفة السابقة.. واستمتع بالنوم في المسافات بين الأغاني.. أو في اللحظات التي يقرر فيها جارك أن يبدل الشريط الحالي بشريط آخر.. أكثر شعبية.. وأعلى ضجيجا..


* أخبرني بمنتهى الثقة.. أن النساء الحوامل يعانين في فترات الحمل الأخيرة من كوابيس في نومهم من أن يرزقن بطفل مشوه.. أخبركم أنا بمنتهى الشك.. أن الرجال يعانين من الكوابيس ذاتها.. في الأسابيع الأربعة الأخيرة.. التي تسبق.. كتب الكتاب..

أتلقى المباركة على إيميلي وموبايلي وماسينجري.. والمناسبة.. كتب كتابي المقرر عقده الجمعة القادمة بمنزل العروسة.. في كفر الشيخ..

* في الأسبوع الأخير من رمضان.. وبعد أن أدى صلاة المغرب.. وعاد ليستكمل فطاره مع سيدات عجائز من حي العجوزة.. سمع جمال مبارك هذه الكلمات.. "أنا عارفة يا ابني إن هما بيحاولوا يأكلوك كويس عشان تتخن.. بس أنا بقولك لأ.. متتخنش.. كدة حلو"..

شاب عنده أربعين سنة.. ومرشح لأنه يكون رئيس مصر عن طريق الوراثة.. ولسه متجوزش.. لما يسمع من ست كلام من عينة "كدة حلو".. مش يمكن يفتن.. والنبي يا جماعة.. اللي يقابل منكم جيمي يفهمه إن كدة مش حلو.. أحسن يستحلاها.. إحنا مستحملين بالعافية..

* إفيه يتناقله الأصدقاء.. عن سائق تاكسي مقهور من الحر والزحمة والتشريفات وسعر البنزين.. ركب معاه زبون مقهور.. قاله.. "يا ريس كل حاجة في البلد دي بتغلى.. ما عدا البني آدم".. رد عليه السائق بمنتهى الثقة وقاله.. "على فكرة.. البني آدم هو كمان بيغلى.. البني آدم النهاردة وصل سعره لـ160 قرش".. رد الزبون وقاله.. "اشمعنا".. رد السائق وهو يتابع الطريق أمامه.. "لإن البيضة بقت بـ80 قرش"!!

* يقال أن هيئة الأمر بالمعروف والنهي عن المنكر السعودية تدرس عرض فيلم "كيف الحال" أول فيلم سينما سعودي.. وتفكر الهيئة أن يتم عرض الفيلم – بعد حذف الأجزاء الخليعة منه طبعا – بجميع دور.. العبادة طبعا!!

* الأسبوع الأخير من رمضان.. سمعت أكبر كم من الإفيهات ممكن يسمعها بني آدم تعليقا على اسمه.. والسبب هو الحلقة رقم 27 من مسلسل "تامر وشوقية".. ورغم أن الحلقة من تأليفي.. وكان ينتظرها كل أصدقائي وأقاربي.. فإن غلطة مطبعية بسيطة.. جعلت اسم "ولاء شريف" زميلي في ورشة الكتابة مكان اسمي.. رغم إن الراجل لم يكتب الحلقة معي فقد كتبتها وحدي.. لكن يبدو أن كاتب التترات شك أن يكون في بني أدم في الدنيا اسمه "البراء أشرف".. وفكر إن ده مقلب من فريق الكتابة.. فكتب الاسم الأقرب لاسم "البراء".. وكان اسم "ولاء" هو سعيد الحظ..

الأصدقاء الراغبين في التريقة كانوا يكلموني ويبدأوا المكالمة بـ" الأنسة ولاء شريف موجودة؟؟".. وطبعا الإفية كان بيرتد مرة أخرى ليهم.. لما يعرفوا إن ولاء شريف ده راجل وكائن حي موجود وبيعيش ويتعايش..

الحمد لله الحلقة طلعت لطيفة.. وفي ناس كتير قابلتها بتشكر في ولاء اللي كتب حلقة جامدة اسمها "داليا حامل".. حاليا أدرس تغيير اسمي.. وفي انتظار أسماء مقترحة!

* يبدو أن أفكار التحقيقات التي يكتبها الزميل محمد الدسوقي رشدي في جريدة الدستور انتهت الحمد لله.. وبدأ محمد يدور على أفكار خلاقة وأكثر إبداعية..

فعلى طريقة السؤال التقليدي.. "ليه لأ؟؟".. محمد كتب يتسائل عن السبب الحقيقي وراء عدم حصول الرئيس مبارك على جائزة نوبل.. ورغم إني غير مقتنع بالأسباب فهناك مليون سبب لحصول مبارك على نوبل.. إلا أن السؤال نفسه يفتح الباب أمام أسئلة أخرى من نوعية "لماذا لم يصعد مبارك إلى القمر؟؟.. ولماذا تزوج الرئيس مرة واحدة؟؟.. ولماذا لا يمثل مبارك في أفلام هوليود؟؟.. ورغم أن كلها أسئلة مشروعة لو خرجت من دماغ دسوقي.. إلا أني أعلن إني لن أشتري الجورنال لو سألها دسوقي أو غيره.. لإني مش عايز أعرف..

جريدة الدستور التي أنتمي لها كقارئ بدأت خلال الفترة الأخيرة تطرح أسئلة غريبة وغير منطقية.. وحتى مانشيتات الصفحة الأولى فيها أصبحت ذات نكهة مختلفة ورائحة مش حلوة.. الأسباب تهمس بها مصر كلها.. بداية من رحيل مجموعة كبيرة من الكاست الرئيسي بها.. ونهاية لإنشغال إبراهيم عيسى في قضيته.. عموما.. من حق الجريدة على قارئها أن تسمع رأيه فيها.. وقد قلت رأيي.. وهو رأي في الجريدة كلها مش في دسوقي بس لإن محمد صديق عزيز وهو عارف طبعا إني مقصدوش هو بالذات..

بس والنبي يا دسوقي.. بالنسبة للرئيس مبارك.. بيشغلني سؤال تاني ياريت تحاول تجاوب عليه.. لماذا لم يرحل مبارك عنا رغم وجود فرص كثيرة لفعل ذلك منذ أن كان نائب.. جتنا نايبة في حظنا..

* كام مرة تركب ميكروباص من قلب الموقف.. ويأتي شاب جينتل يخبرك بإن العربية مش طالعة عشان هتطلع مأمورية.. تحاول تقنعه بإنك ابن حد مهم.. أو إنك صحفي وتكتب موضوع تشتم الشرطة فيه إنها بتاخد عربيات الشعب عشان تقبض فيها على الشعب.. ولا حياة لمن تنادي..

آخر أمين شرطة بدأت أهدده.. واضح إنه خاف فعلا.. قعد يكلمني خمس دقايق عن إن المأموريات بقت بتطلع في ميكروباصات تطبيقا لشعار الشرطة الجديد.. الشرطة والشعب في خدمة الوطن.. وبالتالي فإنهم فكروا يخلوا المواطنين شركاء بتنازلهم عن حقهم الميكروباصي.. الذي هو حق لأي مواطن في أي دولة أخرى.. بشرط إنها تكون بتمنع الشراكة بين الشرطة والشعب حتى لو كانت في خدمة الوطن..

* الأسبوع الماضي عرفت للمرة الأولى إن "زين محمود" عضو فرقة الورشة هو نفسه صاحب أغنية يبكي ويضحك التي غنتها فيروز للمرة الأولى بلحن آخر وتوزيع مختلف..

زين غنى هذه الأغنية في فيلم باب الشمس لـ"يسري نصر الله".. ولحن الأغنية ووزعها "تامر كروان" الموسيقي المصري المعروف.. قابلت تامر صدفة بعد أن عرفت أنه ملحن الأغنية.. وشكرته جدا على جمال الأغنية.. فرحة كبيرة أن تشكر فنان لديه القدرة على أن يجعلك مستمتع بفنه.. اسمعوا الأغنية وقوللي رأيكم..

* الذين شاهدوا فيلم "تمن دستة أشرار" كان لديهم سؤال واحد فقط.. الدستة تساوي 12 وتمن الدستة واحد ونص.. ومفيش أي حاجة في الفيلم بتشير إلى الرقم واحد ونص.. صديق لي قالي إن الدستة في رواية أخرى تساوي 24 وبالتالي الأشرار مفروض يكونوا تلاتة.. وهذا ما لم يحدث أيضا.. دخلت الفيلم واتفرجت عليه.. وعرفت إن اسم الفيلم صحيح جدا.. لإن الفيلم كله عبارة عن.. "غلطة في الحساب"..

* الباحثين عن ساعات من النوم العميق.. أو حتى دقائق.. أنصحكم بالتالي.. صلاة العشاء في الحسين.. زيارة الضريح.. ثم النوم بعمق في أي ركن من أركان المسجد على أصوات حلقات الذكر الموجودة في المسجد طول اليوم..

جربت الوصفة السابقة دون ترتيب.. وأجمل ما فيها كان رفقة "أحمد الدريني".. الذي حكى لي بإخلاص فريد.. قصص عبقرية عن سيدنا علي كرم الله وجهه.. وعن الحسن والحسين.. وعن اختلافات السنة والشيعة التي أشهد أنني لم أكن اعلم عنها الكثير حتى أخبرني بها أحمد..

لو فيكم حد يعرف أحمد.. يبقى ياخده معاه..

* على قهوة البورصة أعطاني أحمد فؤاد عدد 2 سي دي.. وقالي إن عليهم حلقات كنت عايزها من مسلسل فريندز.. وشوية إعلانات فيها كوميديا.. الكلام ده حصل من أسبوعين.. ويوميا كان أحمد بيسألني.. "شوفت الحلقات؟؟.. اتفرجت على الإعلانات؟؟".. وكان ردي الدائم بالنفي نظرا لإني كنت مطحون في الشغل.. امبارح كانت المرة الأولى اللي اتفرج فيها على السيديهات.. والحمد لله.. لقيت الإتنين فاضيين.. أحمد نسي يحرقهم.. شكرا يا عم أحمد.. المقلب وصل..

هناك 16 تعليقًا:

قلم جاف يقول...

1-بالرفاء والبنين والبنات إن شاء الله..

2-استضافت قناة "ليبرا" وهي قناة خليجية مغمورة على النايل سات مطرب العنب الأصلي وهو علاء بعرور ، وعلى الجانب الآخر - وليس في نفس المكان - استضافت حلمي بكر اللي هات يا تريقة ويا استظراف زي ما عودنا دايماً.. أما التاني فكانت تصرفاته غريبة ، الأول يحرف لك مقطع الحشيش بس علشان سواد عيون مشاهدي القناة اللي ما يجوش كام ألف ، إللي ما شالها في الشريط اللي سمعه كام مليون بني آدم!، وإيه ..ميعرفش يفسر لك حكاية "لحم تاكله ولحم ياكلك" في مقطع ملحمة العنب تكعيب..

3-الصراحة .. زعلت لما عرفت إنك متورط في موضوع تامر وشوقية .. توقعت منك ما هو أفضل بكثير..

4-الدستور بدأت تكررها بشكل ممل ، وبدأت الناس تتركها إلى الغد التي ما زالت على زعيقيتها بعد أن ترأس أحمد فكري تحريرها ، عقاباً له على الملحق الشهير إياه.. شوف بقى لما العقاب إنك تبقى رئيس تحرير .. أمال لو حب "ساخب المخل" يكافئك.. حيعمل فيك إيه؟

5-بمناسبة جيمبو ، بتوع روزا مزودينها قوي قوي قوي .. ليه التعمد الفج للدعاية لجيمبو في برنامج تليفزيوني ، وحسب معلوماتي المتواضعة إن التليفزيون مش مدرج ضمن الأبعادية .. وليه هؤلاء مبيعملوش فصول الدعاية لولي العهد في جاهمولكية مصر العربية في قنوات الجاز اللي ماليينها ومن بينها الإيه آر طين وروتانا ..

للتذكير : المشرف على البيت بيتك محمد هاني هو المعد الملاكي لبرامج هالة سرحان!

قلم جاف يقول...

تذييل:

الموضة الجديدة إن الشكاوي والطلبات تتبعت لجمال مبارك شخصياً .. يبقى أن أذكر أن جمال مبارك لم يحظ بعد بمنصب تنفيذي!

ام مليكة يقول...

على فكرة يابرو انا كمان بتجي لي كوابيس يعني كمان عند البنات ، اما مووضع احمد الدريني ده خلاص يا استاذ هانت قوي كلها كم يوم وسيتم منعك من النزول الى البورصة وكل ما يخص اسواق المال

أحمد فؤاد الدين يقول...

ربنا يقويك يا عم ولاء قصدي براء بالنسبة للسيديهات فحضرتك اللي اختارت السي ديهات دي انا اديتك اربعة قلتلك فيهم اتنين فاضين رحت رافع السي ديهات بفوق و بنظرة خبير الماظ في عصابة اللعب الخفي قلتلي هما دول المليانين ...ده مقلب صناعة محلية جه من عندك عشان ما تعملش فلحوس تاني ..مرة تانية ربنا يقوييييييييك و ألف مبروك عقبال ما أشوفك جدو براء

غير معرف يقول...

ألف مبروك...
اسعدني التعرف على مدونتك..ممتعه جدا واسلوبك بجد اكثر من رائع
بالتوفيق دائما ان شاء الله

غير معرف يقول...

بارك الله لكما

وبارك عليكما

وجمع بينكما في خير

والله وقعت في القفص يا حلو

مجاهد شرارة

love4u يقول...

بوست جميييييل جدا


و احلى حاجه فيه انه كذا فكره و برجرافات قصيره مركزه

و اهداف رائعه يا براء

غير معرف يقول...

يا نهار أبيض دي بوست عبقرية فعلا برافو عليك خليت بطني توجعني من كتر الضحك

مبروووووووك على دعاء

ياء يقول...

سعد الصغير احسن من كتير كان ممكن جارك يحبهم واغنيه العنب اللى تحسسك انك قاعد فى وكاله للفاكهه احسن بكتير من اغنيه كعبه كعبه حبيبى وانا الاعبه

مبروك كتب الكتاب يا بطل
بارك الله لكما وبارك عليكما وجمع بينكما بخير
وعقبال كل اللى عايز يتجوز

غير معرف يقول...

bara2 alf mabrook lek enta w do3a w rabna yekremkom ana kaman kont 7a3ayat wana ba2ra kalam mos3ab
7'ale balko mn b3d

Dananeer يقول...

da ana bs el comp ra7'em

دسوقي يقول...

ألف مبروك عالجوازة ياعم براء

مبروك ياخطيبة ( ءاسف أقصد يامدام براء)

بارك الله لكما وبارك عليكما

وجمع بينكما في خير

غير معرف يقول...

دى أول مرة أشوف البلوج بتاعك و أول مرة أعرف أنك من مؤلفين تامر وشوقية.. طبعا بسبب الغلطة.. بس ماتزعلش أنا بدأت مقالة على الويكيبديا عن تامر و شوقية و عدلت الخطأ المطبعى ده!

ياريت تزورها و تضيف أى معلومات عن تامر وشوقية

على فكرة حلقة الضرايب دى من أفضل الحلقات بالنسبة لى هى و داليا حامل كفاية أن هيثم راح العمرانية!!

غير معرف يقول...

المشكله مش هوه سعر الانسان غلي بقي 160 قرش ولا حتي مية جنيه المشكله ان في مطربات او بالاصح مؤديات بتبيع نفسها ببلاش علي قنوات الدش كل يوم عشان الفلوس وبيصدعوا دماغنا بكلام ولحن هايف وكمان مناظر ش ولابد

غير معرف يقول...

حلوه قوى المدونه يابراء

غير معرف يقول...

بسم الله الرحمن الر حيم
العلاج الد عاء قبل الصلاه يعد الراتبه
الله ثم اشفني في بدني ثلاث مرات الله ثم اشفني انت الشافي لا شفا ء الا شفاك شفاء لا يغادر سقما ء يا رب الناس اذهب البا س وشف فانت الشافي لا شفاء لا شفاك/ والطمانيه في الصلاه قراه القران وعدم الوسوسه
وشكرا لجميع