السبت، نوفمبر 11، 2006

الله يكرمك يا باشا.. معلش المرة دي يا باشا..




(1)

سؤال على مدونة دماغ مالك.. سؤال نصه يقول : هو إحنا حيوانات.. ؟

إجابة أتطوع بها.. : أيوة.. إحنا حيوانات..!!

(2)

من فيلم "تيتو"..

الباشا : عارف يا أبو السيد.. إنت أكيد تسمع عن جهاز كشف الكدب بتاع أمريكا.. إحنا عندنا واحد هنا زيه بالظبط.. بس بلدي.. اسمه الخرارة.. سلكتين.. واحدة بتوصل بلسانك.. والتانية بتوصل في مكان تاني أنت عارفه كويس.. وخر يا باشا براحتك..

أبو السيد : خلاص يا باشا أنا هتكلم!!

.............

من فيلم "عمارة يعقوبيان"

الظابط : نرجع لموضوعنا.. تعرف إيه عن حاتم رشيد؟؟

طه الشاذلي : هو لا مؤاخذة.. لا مؤاخذة شاذ..

الظابط : شفت بقى يا طه إننا نعرف كل حاجة.. أهو أنت يا طه لو متكلمتش هنعمل فيك زي ما بيتعمل في حاتم رشيد..

(3)

قسم شرطة مصري..

الباشا: هنصورك وكل الناس هتعرف إنك خـ.. ومـ..

المواطن : الله يكرمك يا باشا.. معلش المرة دي يا باشا.. آه.. آه.. آه..

(4)

محمود ساعي المكتب الذي يدخل على مكتبي فجأة ليجدني أشاهد الفيلم السابق.. يسمع الجمل السابقة.. أضغط أنا على زر الإيقاف بسرعة حرصا على مشاعر محمود.. يسألني محمود في براءة شاب مصري تربى في أمبابة ولم يعرف غيرها "عاصمة لجهنم".. كما يظن محمود نفسه.. يسأل محمود.. "ده فيديو من العراق يا أستاذ براء؟؟"..

أستاذ براء : "أيوة يا محمود.. فيديو من العراق"

محمود "مرة أخرى بعد أن تخلى عن براءته" : أيوة بس الراجل اللي بيتعذب ده مصري.. لإنه بيتكلم مصري..

براء "بعد أن تخلى عن لقب أستاذ لإن كذبته انكشفت" : هو يا محمود مصري بيتعذب في العراق.. أكيد ده فيديو من العراق يا محمود..

محمود : بس يا أستاذ براء..

براء "يحاول أن يجد أي مخرج" : اقفل الباب وراك يا محمود وأعملي شاي الله يكرمك..

(5)

أم : غير الأندر بتاعك بسرعة وألبس واحد جديد قبل ما تروح المدرسة

ابن : ليه يا ماما.. القطعة اللي في الأندر صغيرة ومش هتبان.. وبعدين هتبان قدام مين يعني.. أنا مش بقلع البنطلون غير في البيت أو في التواليت في المدرسة.. والاتنين ببقى لوحدي.. لما أرجع يا ماما هبقى أغير الأندر.. اتفقنا..

أم : لأ ما اتفقناش.. تغير الأندر يعني تغير الأندر..

ابن "بصوت خفيض" : هو أنا يعني حد هيقلعني البنطلون غصب عني

(يستدير ليدخل غرفته)

أم "بصوت خفيض أكثر" : يا خوفي !!

(6)

كلية الحقوق – محاضرة القانون المصري

الدكتور : ويعاقب القانون المصري في جريمة التحرش الجنسي بأنثى.. بعقوبة الحبس والغرامة.. وفي حالات بعينها.. تصل العقوبة إلى الإعدام..

الطالب : بعد إذنك يا دكتور.. هي العقوبة بتطبق في حالة إن المتحرش به يكون أنثى.. يعني لو تم التحرش براجل.. بتكون إيه العقوبة..

(ضحك في القاعة.. ويقوم الدكتور بطرد الطالب صاحب السؤال ويقول في سره : أعوذ بالله.. أستغفر الله العظيم.. هو ممكن الفجور يوصل لكدة؟؟)..

صوت من خارج الكادر : ممكن يا دكتور!

(7)

هي لخطيبها : إزاي يعني يعذبوا محمد الشرقاوي بوضع كرتونة في مؤخرته؟؟

خطيبها : ممكن يحطوا أي حاجة.. كرتونة. حديدة.. أو حتى عصاية مقشة..

هي مرة أخرى لخطيبها برضه : وبتوجع..

خطيبها (محاولا التهوين عليها) : مش قوي!!

(8)

أمجد مختار حسين : "بعدها.. بصلي الظابط وقالي.. يا ابن الـ(...).. أنا ياض مش بتاع نسوان.. أنا بتاع رجالة"..

زميل في ميكروباص جلس بجواري وأنا اقرأ صفحة في جريدة الفجر مكتوب فيها شهادة أمجد : نقدر نقول وإحنا مستريحين.. إن الحكومة هاجت على الشعب!!

(9)

أنا : وإيه اللي يحصل ساعتها يا مولانا؟؟

الشيخ : ساعتها السماء تهتز مرتين.. مرة لإنه لواط.. والمرة التانية لإنه ظلم يقع على إنسان دون أن ينصره أحد..

أنا : وإيه رأيك لو حد قال بعدها إن الشرطة في خدمة الشعب..

الشيخ : يبقى السماء هتهتز 3 مرات.. وربنا يستر بعدها.. قوم يلا نصلي

(10)

من مدونة "الوعي المصري"..

قبل مشاهدة الفيديو أنصحكم بمراجعة أنفسكم.. الفيديو لمواطن يتم تعذيبه بإدخال عصا في مؤخرته.. لا داعي لضعاف الأعصاب أن يشاهدوه.. ولا ينصح بمشاهدته للآنسات والسيدات مرهفات الأحاسيس.. ولا حتى الرجالة.. ولا إنس ولا جان.. يا ماما أنا عارف إنك بتصحي الصبح تبصي على موقعي.. لو سمحتي ما تتفرجيش عليه.. وحسبي الله ونعم الوكيل...

* ودي كانت أول مرة وائل عباس يكتب تعقيبا على فيديو فيه انتهاكات يقول فيه.. "حسبي الله ونعم الوكيل"..

هناك 9 تعليقات:

أحمد فؤاد الدين يقول...

أنت ليه عملتهم 10 مشاهد !!!!!

عبدالله مفتاح يقول...

مشاهد حلوة بجد
شر البليه ما يضحك

Ahmed Shokeir يقول...

مشاهد منتقاه بعناية كلها بتمهد للمشهد الأخير

بصراحة تدوينة غير تقليدية عجبتني

أما عن لُب الموضوع فقد زادت الحكاية عن الحد وفاقت كل تصور وشهادة الساعي التلقائية اكبر دليل على ذلك ، ومطلوب فعلا مزيدا من كشف الضوء والتعرية والاستمرار في فضح تصرفاتهم

غير معرف يقول...

جامدة جدا التدوينة دي ...

دلوقتي بقى (مع احترامي ليوسف وهبي)
"شرف الولد زي عود الكبريت"
ول أملك إلا نصيحة واحدة لأي حد يشوف أي ضابط في أي حتة في مصر "المحروشة" :
Run for your pride.. Run for your lives

ياء يقول...

عجبت لمن لا يجد قوت يومه لماذا لا يخرج على الناس شاهرا سيفه

مقوله قديمه

غير معرف يقول...

هو في سؤال غريب بيلح عليه بقاله اكتر من شهرين
شرائط التعذيب الي موجودة حالياً على المواقع والمدونات ...ظهرت فجأة وبصورة مكثفة الفترة الى فاتت ..ليييييييييييييييه؟!

إيه السر في ان الشرائط دي اتسربت الفترة دي بالتحديد

اظن ان الغرض منها خبيث...

محمد م ح

غير معرف يقول...

حسبى الله و نعم الوكيل

المصري أفندي يقول...

يا ترى المواطن اللي اتعمل فيه كده حد عرفه حد قال له يعمل إيه يروح لمين ؟ بلاش هو طيب أي واحد فينا لو لا قدر الله تعرض لمثل هذا يعمل إيه؟ وده قبل ولا بعد ما يقتل اللي عمل فيه كده

روحي و روحي يقول...

ملحوظة ملهاش علاقة أوي بالموضوع: بحس إن وائل عباس من أعلي المدونين إنسانية و يمتلك إحساس عالي بجد و بجد فضل وائل علي كل المدونات لا يمكن إنكاره
Samar