الثلاثاء، نوفمبر 14، 2006

البت دي جدعة قوي.. يا أمه!

مزعلها..

أيوة أيوة.. هي دي الحقيقة.. والتدوينة دي معمولة عشان أصالحها.. لو مبتحبش تقرا الحاجات الشخصية قوي يا ريت تقفل الويندو.. ولو دمعتك قريبة.. جهز علبة الكلينيكس..

كنت قاعد بتكلم مع أمي عن دعاء من حوالي سنة.. كانت الفترة دي هي بداية معرفتي بدعاء.. لا لا.. بمعنى أدق بداية قربي من دعاء ووجود بينا علاقة (أو عولاقة على رأي اللمبي)..

كنت بحكيلها عنها.. عن البنت اللي بحبها وعايز أتجوزها.. رغم إن من شهرين بس كنت بتخانق معاها يوميا..

تخيل معايا منظر بنت قصيرة ومش باينة من الأرض تدخل عليك شغلك اللي بتشتغل فيه من 3 سنين واللي ليك مركزك ومقامك فيه.. واللي مديرك نفسه بيعمل لك حساب وبيحافظ عليك ومش بيضغط عليك لو كنت مضايق أو "مقريف"..

تخيل بقى البنت القصيرة دي.. تدخل فجأة المكتب.. وتتكلم مع كل الناس اللي في الدنيا.. ونظرا لإني أصلا بني آدم مش حبوب ولا بدي فرصة لأي حد يتكلم معايا خصوصا في الشغل ومع الأشخاص الغرباء.. فزي ما تقول كدة البت كشت مني ومتكلمتش.. بس عملت ما هو أفظع.. جرت شكلي..

قربت.. وسألتني في براءة متناهية.. وفي استفزاز يلائم قامتها القصيرة.. وفي ابتسامة سمجة تدعوك للتفتيش بمنتهى الأمانة عن بندقية من بتوع زمان.. اللي هي فيها فتحتين للرصاصة.. بحيث لو ما ماتتش من الرصاصة الأولى.. الرصاصة التانية تجيبلها شلل نصفي..

قربت مني المحروسة الننوسة وقالت : إيه.. أنت مش مركز ليه.. إنت مش بشتغل ليه.. إنت طول الوقت كدة قاعد تتكلم؟؟

أنا!!؟.. أنا بتكلم.. أمال إنتي بتعملي إيه.. إنتي مين أصلا.. إنتي مالك.. وبعدين.. أنا اشتغل براحتي..

حاول أحمد نصر الدين (مديرنا وقتها)أحمأ التخليص ما بينا.. حاول إنه يفهمها إن هو نفسه مش بيحاسبني على شغلي لإنه واخدني اشتغل بعبلي بسرحاني بكلامي الكتير.. لكن تقول إيه بقى.. يلا مش مهم..

ثم تأتي الأمورة للعمل معي في نفس المكتب.. ثم في نفس الشغل.. ثم لما ربنا يفرجها عليا وأبدأ أنفذ مشروع ولاد البلد.. تكون هي "الرجل الثاني".. وتشتغل معايا..

6 شهور يا مؤمن بتسألني الأسئلة نفسها.. هو أنت ليه بتتكلم.. اقعد اشتغل.. لازم تركز.. أكتب أكتر.. لأ وإيه.. تيجي تقف جنبي وأنا بكتب.. تقولي الجملة دي مش حلوة.. أكتبها من جديد باسلوب مختلف.. والمصيبة إني أسمع كلامها.. واكتشف إنه صح..

فكرت في كل الحلول الممكنة اللي ممكن تخليها تحل عن سمايا.. دورتلها على شغل تاني.. قلتلها على أفكار تعملها تودي في داهية.. لكن أبدا.. حصانة يا ابني ضد كل حاجة..

ثم في ذات يوم لا أذكره على وجه التحديد.. قعدت مع مصعب على قهوة المهدي اللي على أول الطوابق في فيصل.. وقلتله.. "مصعب.. أنا لقيت الحل الوحيد اللي ممكن يخليني أتخلص من البت دي.. أنا هتجوزها وأقعدها في البيت وبالتالي أبقى أتجوزت بت زي القمر بحبها بيني وبين نفسي ومش هلاقي زوجة أحسن منها.. وفي الوقت نفسه تحل هي عن سمايا وتقعد في البيت وتسيبني أشتغل براحتي".. وقد كان!

نرجع للقعدة اللي كنت قاعدها مع أمي في البلكونة بحكيلها فيها عن دعاء.. عن حبيبتي!

"البت دي جدعة قوي يا أمه..

راجل لا مؤاخذة.. يعتمد عليها.. إيدي بإيدها هعرف أعمل معاها دنيا حلوة.. هي قصيرة كدة بس جبارة.. تضربيها في الحيط ترد في إيدك تاني.. باختصار.. هي دي اللي تنفعني"..

ترد الأم بحكمة الأمهات المعروفة.. وبوقار معتاد نعرفه جميعا..

"يا منيل أنت مش عايزه واحدة زي دي.. انت عايز واحدة من بتوع سمعا وطاعا.. تبص في الأرض.. وتقولك حاضر يا سيدي.. ما أنا عارفاك يا عبيط.. زي أبوك.. عايز تعيش في عصر الجاهلية"..

يا سلام يا ماما.. كلامك زي السكر..

صمتت قليلا ثم قالت..

"روح يا روح أمك اتجوزها.. وهتطلع عنيها معاك.. يا ابني بنات الناس مش لعبة.."..

أي أم تقولك بنات الناس مش لعبة.. تعرف على طول إنها مقدمة لسرد حكايتها مع أبوك.. ثم قضيت الليلة كلها في البلكونة إياها أستمع للقصة المكررة التي سمعتها بترجمتين.. الأولى لأمي.. والثانية لأبويا.. مع الاحتفاظ بالطبعة الشعبية ترجمة أنيس عبيد التي يتم سردها في كل لقاء عائلي للحفاظ على صورة الأسرة الكريمة أمام الأعداء.. عفوا. الأقارب!

...............

هل كانت ماما تتنبأ..؟؟

ربما.. من الواضح إني أعاني من مشاكل في التعامل مع البنات.. أو مشاكل في تعامل البنات معي.. أو مشاكل تواجه البنات وأنا عندما نبدأ في التعامل سويا..

عموما.. أنا عرفت غلطتي.. واتضح أن دور سي السيد براء ليس هو المناسب لي..

والنبي يا حاجة حقك عليا.. وخليكي جدعة معايا زي ما عودتيني.. والسلام ختام.. ولموا الإزاز اللي اتكسر عشان ما يدخلش في رجلين العيال.. أنت ياض يا محسن.. إلبس شبشبك وبطل تخرج الصالة حافي.. جتكوا القرف.. هاتي الشاي في البلكونة يا دعاء.. وإكويلي القميص.. ورتبي الدولاب.. و..... بلاش تزقيني من البلكوووووووووووووووونة!

....................

طبعا التدوينة السابقة فيها شيء من الخيال.. لكن الواقع بيقول إنها زعلانة مني بعد أول أسبوع كتب كتاب.. وهذه محاولة لمصالحتها.. حقك عليا..

لماذا البت دي جدعة قوي..؟؟

للأسباب التالية طبعا..

* لأنها تعتقد أني مختل عقليا.. وفالت بأعجوبة من حملات مكافحة المختلين.. ورغم ذلك.. وافقت تتجوزني..

* لإن الأغنية المفضلة عندها هي "أنا عندية"... وعارفة إني مش بحب الأغنية دي..

* لإنها بتسامحني لما بغلط.. بس بترجع في الغلطة اللي بعدها تسمع لي كل غلطاتي معاها منذ فجر التاريخ..

* لإنها بتحاول تطول على ما تقدر.. كعب عالي شغال.. تقف على الرصيف وهي بتكلمني.. ومؤخرا.. بدات تخليني أعدي بسرعة قدام العربيات.. يمكن واحدة منهم تخبطني يعملولي عملية بعدها تقصرني.. وتبقى المشكلة اتحلت..

* لإنها بترجع دايما في كلامها.. تقولي آخر مرة نتخانق.. ونرجع نتخانق تاني.. وكإن مفيش حاجة حصلت.. لدرجة إني حبيت الخناق..

* في أحلك الأوقات (حلوة أحلك دي).. مش بيهون عليها إني أكون زعلان..

* لما بنزعل من بعض.. بنبطل نتكلم مع بعض حتى وإحنا ماشيين في الشارع سوا.. بنسكت خالص.. وكل واحد بيصمم إن التاني يتكلم الأول.. وبعدين أنا بخمن بيني وبين نفسي إنها عمرها ما هتتكلم.. وإني زي العبيط هتكلم الأول وأطلع نفسي غلطان.. البت دي جدعة لإنها عمرها ما خيبت ظني أبدا.. وعمرها ما اتكلمت الأول

* لإنها بتحبني.. رغم إني بعمل حاجات كتير مش لطيفة.. بس هي مستحملة.. البت دي جدعة.. لإنها دعاء الشامي.. مراتي.. الدمعة هتفر من عيني.. وقد كان!
- لو عايز تعرف سبب الهايبر لينك الكتير.. أنا أقولك.. أحمد دريني في مرة قالي خطيبتك بتحبك قوي عشان كل ما بتكتب اسمك في مدونتها بتحط تحتها خط.. لو الحب بالخطوط.. أنا هقعد أشخبط لبكرة..

هناك 18 تعليقًا:

غير معرف يقول...

براء كويس انى اول تعليق

بجد القصة دى شبة قصتى مع خطيبى برضة انا طويلة شويتين وهو برضة تنك وماحدش بيكلمة حتى مديرة

حتى فى الخناق برضة كل مرة نقول مش هنتخانق ونرجع نتخانق

بس فية فرق بينا انا بروح اصالحة وهو يرفض وبعدين يجى يصالحنى
عبط بقى
الف مبروك يا براء


براء ممكن اطلب منك طلب بلاش مشاهد التعذيب دى مش عارفة انام من امبارح بجد
كرهت ابن خالتى الظابط
وجوز صاحبتى
جارنا الصبح الظابط بيصبح عليا بيقولى صباح الخير
قولتلة اهو صباح وخلاص حسبى الله ونعم الوكيل قالى نعم قالتلة البواب مارماش الزبالة لمؤاخذة قالى طيب ومشى

بجد يا براء بليز حاول تخفف
عارف ان انت قلت البنات مش يخشو بس اكيد انت عارف الستات ومخهم تقول يمين يقولو شمال

براء ادعيلى انا وخطيبى نتصالح بقالنا اسبوع مش معبرنى حتى فى الشغل

ادعيلى يا روءا

منبري يقول...

ربنا يخليكو لبعض ويوفق بينكو

غير معرف يقول...

هايلة

غير معرف يقول...

وانت مزعلها ليه اساسا..اكيد غصب عنك..اكيد غصب عنه يا دعاء والواد مأثرش اهو حاطط 787686787 هايبر لينك في التدوينه يعني بيح�

Purple Rose of Cairo يقول...

الدمعة فرت من عينى يا براء ... بصراحة هى بت جدعة قوى و انت واد جدع عاجبانى صراحتك و شجاعتك بس ربنا يستر و الوالدة باشا ما تدخلش البلوج
حتجيب لروحك الكلام فى المستقبل

عبدالله الطحاوي يقول...

يابني احمد ربنا ان فيه واحده رضيت بيك ومش عارف قالت ايه لامها تخين اقوي يامه انا مشفتش ابرد من كده تخين ومتداخل وليك ابعاد ثلاثية ومكعبر وكمان مش عاجبك احمد ربنافي ناس تانيه اول مايخطو بس يخطو لبيت الغروسة تبدا الشهقات والنظرات ثم ياتيك الجواب الموضوع قسمه ونصيب مشكلة اذا كنت عريس تخين وطالب تخين ومسافر تخين لكن جديدةدي تخين ويتريق وعلي راي اتوبيس 928الاحساس نعمة
عبدالله الطحاوي مؤسس بدناء ضد التمييز

عمرو عزت يقول...

بس أنا ماحستش إنك أطول منها كتير يا براء

أنا جاي أهدي النفوس

علي العموم اهدي لها اغنية شكوكو

غير معرف يقول...

و لنا هنا وقفه
هي مدام دعاء اكبر منك بسنتين؟
و لا البروفيل بيكذب؟

غير معرف يقول...

البروفايل بيكذب طبعا.. ستات الدنيا عموما أصغر من رجالة الدنيا إجمالا.. مفيش بنت أكبر من ولد.. كل البنات صغيرة وكل الولاد كبار

radwa osama يقول...

اه طبعا انت تلاقي فين بس واحده زي دعاء ..وبعدين ايه كل اللينكات اللي انت حاططها ده ..الحب مش باللنكات انما بشكوكو زي ما قال عمنا عمرو عزت

غير معرف يقول...

thx

غير معرف يقول...

أنا عندى مشكه تانية خالص
انى طويلة جدا
المشكله بقى ان خطيى اطول
جيل العمالقة قادم فى الطريق

غير معرف يقول...

الاغنية دي جميلة اوي يا مان
الاول نتفق
انا جاي اهدي النفوس
نخش بقي في الموضوع
انت صعبان عليا اوي
ايه يا ابني الحب دة كله
اعذرني
انت شكلك عبيط
ليه بقي ؟؟؟؟؟؟؟؟
لانها ببساطه مبتبادلكش نفس الحب
ودة واضح اوي في تدوينه
بيت الدميه
مش هناقشك بقي وبتاع وكدة
زي ما قلتلك
انا جاي اهدي النفوس
نصيحة احيرة
حاول تبقي اشد واكثر قسوة
يعني شخصية
ايوة يا سيدي سي السيد
واللي مش عاجبة يطق
لانها بصراحة ومن غير زعل هتركبك
ولهجتها مش عجباني
وانا جاي اهدي النفوس

Dananeer يقول...

مسخره كالعاده يا براء
ربنا يخليكوا لبعض
انا قريت بوست دعاء الاول و لقيتنى باشجع
بس مقدرتش طبعا اول ما قريت عريضتك

معرفة قديمة..قوي يقول...

مش هقول التدوينة حلوه والكلام البروتوكولي إلي جميع من علق قاله وساب اصل الموضوع واتفرغ لخفة دم براء واسلوبه اللذيذ في الكتابة لأن في امور اهم ..ولاوني مكنتش عايز اقدم النصيح على الملأ في موضوع خاص ولكن ما باليد حيله نظراً لأني بره مصر حالياً وبداية معرفتي بيك قديمة شوية فأنا قابلتك تقريباً في أولى ثانوي ووقفت معاك وكلمتك ما يقرب من نص ساعة وعرفت الخطوط العامة لشخصيتك وبعد كده قابلت والدك بعدها بثلاث سنين وكان الكلام ده بره مصر في معرض دولي للكتاب في دولة خليجية ومن خلال كتاباتك اتعرفت عليك اكتر ومن هنا هقدم ليه نصيحة بناءً على المعطيات الي فاتت:
1- حاول تتجاوز الماضي بجميع مشاكله ومتخلهوش يأثر فيك واعتقد انك نجحت في كده
2- قدر المستطاع اتبنى وجهة نظر زوجتك ومش لازم كل نقاش ينتهي بهزيمة احد الطرفين
3- بلاش فكرة نشر المشاكل والمشاعر على الملأ من خلال مدونتك او من خلال كتاباتك عموماً ولو عايز تكتب يا أخي اكتب في موضوع تاني ...البيوت اسرار ونشر الامور الاسرية بيعمق المشاكل ومبيخليش حرمة البيت عزيزة.. وهنخلي كل من هب ودب يتعرف على تفاصيل حياتك من غير لازمة ويتحول بيتك لمشاع للناس وبيفتح باب للثرثرة وممكن الكلام يتطرق لأمور تانية مش محبب أو تصل لحرمانية الكلام فيها
4- حاول قدر المستطاع التعجيل بالجواز وتستقر انت وهي في بيتكو ونخرج بقى من طور المراهقة إلي احنا عايشيين فيه دلوقت لحياة تانية ليها ابعادها وتفاصلها المختلفة خالص عن لعب العيال الي عمالين نلعبه ده
5- الكلام ده بفلوس وبعتهولك ببلاش فرجاء تحاول الالتزام بيه قدر المستطاع
6- انصحك انك تخرج معاها وتروحو حديقة الحيوانات "جونينة الحييوانات" على رأي ستي عديلة رحمها الله خصوصاً في اليومين دول وابعد عن يومي الجمعة والاحد ...جنينة الحيوانات رهيبة في الشتاء إلي انا محروم منه حالياً لظروف السفر

love4u يقول...

.. لو الحب بالخطوط.. أنا هقعد أشخبط لبكرة..


انا قعدت اشخبط لحد ما القلم خلص و محصلش حاجه
لا الموبيل رن و الا الحب جه و لا ميسد كول حتى

و المحل الى تحت بيتنا قفل و البقالا معندوش قلمه
اروح لمين و قول يامين ينصفنيى منك

روحي و روحي يقول...

البوست ظريف جداَ يا براء و ألف مبروك على الجواز و متخافش أكيد زعلها مش حيطول

غير معرف يقول...

حلوة كتير يا براء برافو عليك