الأربعاء، أبريل 11، 2007

يا ولاد بلدنا.. أنا بتجوز


- والفرح فين يا عريس؟؟

- في بيت أبويا.. في كرداسة!

- وفين كرداسة دي؟

................

الوصفة سهلة جدا، لو جاي مواصلات يبقى قدامك حل من اتنين.. الأول إنك تركب من قدام باب كلية آداب جامعة القاهرة، من هناك هتلاقي ملف تقف فيه تركب منه عربيات بتقول كرداسة، أوعى تركب عربيات صفط اللبن، أركب كرداسة بس..

طب لو جاي من فيصل، سهلة جدا، تنزل المريوطية، هتلاقي عربيات واقفة على اليمين، بتقول كرداسة، منشية لأ، تركب من هناك تنزلك كرداسة، ولو جاي من الهرم انزل مريوطية هرم هتلاقي نفس العربية..

طب والدائري؟؟..

سهلة برضة، تركب من الدائري أي حاجة رايحة ناحية الهرم، تنزل نزلة المريوطية أو صفط اللبن، ومن هناك هتلاقي عربيات بتروح كرداسة.. هي نفسها العربيات بتاعة الوصفةالسابقة، بس هي بتتقاطع مع الدائري عند المريوطية وصفط اللبن..

ده بالنسبة للمواصلات، طيب واللي جاي عربيات، يااااااااااااااه يا جماعة.. ده الطريق سهل بشكل، تركب الدائري، تنزل نزلة صفط اللبن أو المريوطية، تتبع الأسهم لحد كرداسة.. الموضوع سهل جدا..

طب ولو جاي من الدقي (عشان خاطر الناس بتوع إسلام أون لاين)، تفضل ماشي في فيصل، ومنه على المريوطية، ومن المريوطية على كرداسة، في طريق تاني سهل باستخدام كوبري ثروت، بس محتاج حد يكون مشي في الطريق قبل كدة أو يفضل يسأل كتير!

طيب، النقطة الأهم.. وصلت كرداسة عن طريق المواصلات أو العربيات أو البر أو الجو أو البحر.. تعمل إيه بقى جوه كرداسة.. ؟؟

اسأل على مسجد الرحمن، وعن حضانة مكة المكرمة.. ده بيتنا إن شاء الله.. الطريق للبيت سهل جدا، وعموما ساعات وهيكون في خريطة على المدونة بالطريق رغم سهولة الوصفة..

معلش يا جماعة عارفين إننا محيرينكم معانا.. بس عشمنا فيكم كبير إنكم تيجوا وتصنعوا فرحتنا.. نظرا لضيق الوقت فالدعوة عامة لكل بشري على كوكب الأرض.. وأخص بالذكر الأصدقاء والزملاء والمدونين والمدونات..

آه.. ثانية واحدة نسيت.. أنتوا عارفين الكلام ده هيحصل أمتى، يوم الجمعة الجاية 13-4، الساعة 8 هيبدأ الفرح ويخلص 10.. للإستفسار والحجز والإستعلام والرحلات... الإتصال على تليفوني الشخصي : 0101586595.. وأيا كان شخص اللي هيرد عليك، هيكون عنده معلومات كفاية إن شاء الله..

هناك 27 تعليقًا:

elkamhawi يقول...

دى وصفة سهلة ..دى وصفة هايلة
طيب واللى هيجى بعربية يمشى ازاى
اقولكم انا امشوا ورا عربيت احمد رفعت

الحلم العربي يقول...

لولولولولولولولولوي
ألف مبروووووووووك
عقبال عندك يا ست كوثر ...الله يخليكى يا ست ام فاروق
.........
أيها الساده جاءنا البيان التالى: تم عقد قران الأستاذ البراء أشرف على ربة الصون و العفاف الأنسة دعاء الشامى و العاقبة عندكم في المسرات ..شكرا
متزوقينى يا ماما قوام يا ماما
ده عريسي هياخدنى بالسلامة يا ماما
و في نهاية البرنامج أحب اقولكوا
بارك الله لكما و بارك عليكما و جمع بينكما في خير
و ربنا يكفيكوا شر عين الحاسدين

غير معرف يقول...

1000000001206590 مبروك يا براء
انا معزوم طبعا وهاجى عند حضانة مكه المكرمه
على فكره انا من كرداسة وللتفصيل الادق انا اسمى /محمود احمد الدوح
على العموم انا لو مقدرتش اجى بقولك هنا مبروووووووووووك

Organica يقول...

Mabrook. And I really wanted to come, but you know mafeesh mawasalat min amereeka li 3andokom.

:-)

مُصْعَب إِبْرَاهِيم يقول...

ههههههههههههه
ما حدش يمشي ورا عربية أحمد رفعت وإلا هيسافر..

مبروك يا حبيبي

غير معرف يقول...

alf mabrrrooooooook

:)

غير معرف يقول...

الف الف مبروك
وربنا يتمم بخير

BackBone يقول...

الف مبروك يابوب انا متخانق حالياً معا المدام بس لو اتصلحنا النهارده او بكره قبل معاد الفرح انشاء الله هنيجي

بكره عندي كتب كتاب في مسجد الصديق بمساكن الشيراتن الساعه 2بي ام
وفرحين واحد في دار المدفعيه و انت انشاء الله الدوخله التانيه

شوفت بقه ازاي انه موسم تزاوج

غير معرف يقول...

الرائع براء

والله فرحان لك بزاف أخويا

وكنت أتمنى أن أحضر معكم ،لكن المسافة بعيدة وعندي امتحانات

لكن أعدك
في وقت العرس سأشغل موسيقى تليق بالمقام

وأرفض عليها إلى العاشرة بتوقيتكم
وأبعث لك بالتحايا حينئد

عش كما تستحق
وتواضع لتقبل حب مثلي

غير معرف يقول...

نرقص عليها***

نحبوك ونموتو عليك أزين

Abd El Rahman Magdy يقول...

ألف مبروك يا باشا

هاحاول آجي إن شاء الله

قول يا رب

السلحفاة تطير يقول...

ألف مبرووووووووووووك يا براء
هيه هيه هيه هيه

Dananeer يقول...

مبروووووووووووووك

غير معرف يقول...

مبروك ألف مبروك

Aml Ghonaim يقول...

الف مبرووووووووووك
لبراء ولدعاء
ربنا يتمم عليكم بخير
بارك الله لكما وبارك عليكما وجمع بينكما فى خير

Unknown يقول...

ألف مبروك :)

غير معرف يقول...

الاستاذ براء والاستاذة دعاء
الف الف مبروك
فرحت بيكم جدا والله العظيم ، بس للأسف معرفتش بالخبر السعيد ده الا بعد صلاة الجمعة والله .
عموما بارك الله لكما وبارك عليكما وجمع بينكما فى خير .

-_- يقول...

الف مبروك يا باشا

غير معرف يقول...

طيب و اللي هينزل في مطار القاهرة الدولي...هههه...مبروك عليكم يا أحبة...براء من فضلك شوف رقم تلفونك لانه و على ما يبدو تلخبط بالفرحة...منذ الصباح و انا احاول الاتصال...اما تجيبني السيدة المحترمة بان الرقم غلط و نأسف لعدم تمرير مخابرتكم...او يكون الخط مشغول...و آخر النكت أن سيدا طيبا يجيبني بالفرنسية...فرانس تلكوم بونجووورر...

أخي براء لو لم تكن المسافة بعيدة...لوجدتنا عندك انا و حمزة"غاندي الابن"...لكن ان شاء الله نستقبلكم هنا عندنا بالمغرب يوما...وفقكما الله "و خزى العين"...كل سعادة العالم...متمنيات مكتوبة على امتداد المسافة بين المغرب و "كرداسه"...نحبكما و كونا كما تستحقان

نورهان مفيد يقول...

الف مبرووووووووووووووك
ويارب يجمع بينكم في خير يارب

نورهان مفيد يقول...

الف مبرووووووووووووووك
ويارب يجمع بينكم في خير يارب

Anas Emad يقول...

اخيرا اجوزتم ...

ألف ألف ألف ألف ألف مبروك ...

بارك الله لكم و بارك عليكم وجمع بينكم في خير ان شاء الله ...

و في نقطة مهمة جداا
حبيب قلبك عبد المنعم محمود

اللي مطارد حاليا

افتكر كده وسط المعازيم حد كان مستخبي و عمل ماسكات ولا لابس عمامة و وجلابية صعايده و مستخبي وجاي يبارك لك ..

انا حاسس انه جالك وهو مستخبي ....

لانه للاسف مطارد حاليا ...
ممكن يكون وقف يتفرج علي الفرح من بعيد

وماعرفش يجي يسلم عليك ويبارك لك
للاسف لانه مطارد

نيابة عنه مليون مبروك ...

وعقبال مصاعيبكووو

و بقية الشلة كلها ....

ياعريـــــــــــــــــــــــــــــــــــــــــــــــــــس

ننتظر تدويناتك بعد سنة العسل قصدي شهر العسل

nohamy يقول...

مبروك يا باشا

eldoctor يقول...

بارك الله لكما و بارك عليكما و جمعكما على طاعته و بره

قلم جاف يقول...

ونقص عزاب مصر رجلاً من أعز الرجال ، من أوفى الرجال ، ....الخ.. :-)

بارك الله لكما وعليكما وجمع بينكما في خير..

غير معرف يقول...

الف مبروك يا دعاء يا ورده عشرينات و الف مبروك يا براء يا جمل عشريناتى و التهنئه دى منى و من البت هبهوب لانى كنت بكلمها و لسه عارف و الله ..سيبونى افقع الزغروته بقى..نيفين نيفى نوفا

كردساوى5 يقول...

ألف مبروووووووووك
معاك ابو عبد الرحمن
ش مصطفى محمود
كرداسة