الأحد، مايو 06، 2007

نفسي.. أدخل سينما مع أبويا..



يبدو أن أعراض الأبوة تصيبني قبل أن أصبح أباً..

أنا الآن أفكر في أبي كثيراً.. دون سبب واضح!

أتخيلني – وهو – جالسين في الأماكن المحببة إلى قلبي..

نجلس سوياً على البورصة، ويتبطأ يدي سائرين في وسط البلد يدهشنا زحام الناس وألوان الفتارين..

لكني رغم ذلك، أشعر أني في شوق لشيء ما..

نفسي أدخل سينما مع أبويا..

أجلس في القاعة المظلمة، وأشاهد معه فيلم كوميدي جديد، أو فيلم أجنبي أكشن من النوع الذي يحبه وينتظره (قبل ظهور الدش) مساء كل جمعة على القناة الثانية الأرضية..يجلس على سريره الواسع، يبتسم، ويقول في حماس : "أنا شفت الفيلم ده قبل كدة، البطل ده هيموت، والبطلة دي هتتجوز أخوه.. وبعدين أنت عارف أصلاً.. "..

لكنه الآن يقول أنه لم يعد يحب الفرجة على هذا النوع من الأفلام، حتى مع ظهور قناة مثل "أكشن" يبتعد عنها حين يقلب بالريموت قائلاً : "الأفلام كلها بقت شبه بعضها"..


لكني سأخجل – كالعادة – من عرض الأمر عليه..

هو دائماً يكره السينما.. وأدخل معه في جدال طويل حولها.. لكن قلبي يحدثني أنه ربما يستجيب الآن بعد أن تزوجت، أو ربما تصنع الظروف فرصة لأن نكون ثلاثة.. أنا وهو.. وحفيده أو حفيدته..

أخبرت دعاء أني أبي تغير بعد أن ظهرت هي في حياتنا..

الآن.. اكتشف أنني أنا الذي تغيرت...


هناك 12 تعليقًا:

مصـ( الخير )ـعب يقول...

أكتر حاجة بتعبني فيك يا براء براءتك..
اعرض عليه وهو هيوافق إن شاء الله

احمد رفعت يقول...

ايه يا بيرو الومانسية ديه
بجد اتأثرت بالبوست ده اوي .
بس فعلا مش والدك الكريم بس اللي اتغير كلنا اتغيرنا ولو انت بصيت على براء هتلاقى براء نت سنتين مكنش بيحب حاجات بقى يحبها وحاجات كان بيحبها اصبح مش بيحبها .
عارف يا بيرو انت ممكن حنيت للايام ديه علشان كنت ساعتها مرمي في حضن بباك دون اي مسؤلية غير ان مطلوب منك ما تتأخرش برة البيت وطبعا تذاكر وتنجح .

دوام الحال من المحال
بس على فكرة انا لسه واخد بابا وماما بالعافية فلوكة في النيل يوم الجمعة كانوا معارضين اوي بس بعد ضعط بابا وافق ولما راح كان مبسوط اوي .

حاول وهتبسطة.

ويجعلة عامر

بنت امي الغالية يقول...

بابا انا موافقة خلاص انك تدخل مع ابوك سينما....؟ ههههههههههه طبعا انت هتقول لي وانت يا رخمة مالك ومالي انا وابويا هارد عليك واقول لك بابا هيوافق طبعا لو انا طلبت منه وهيوافق اكثر لو عزمته على سينما ولو انت خجول زي ما مصاعيبو بيقول انا هاعرض عليه واوعدك انه هيوافق

غير معرف يقول...

للاسف مقدرتش اقعد اكتر من كده مبعتلكش تعليق بقالي كتير بفكر اني اعلق علي موضوعاتك بس بقول بيني وبين نفسي اصبر شويه علشان اول تعارفنا يكون في موضوع كبير.
حاولت ابعتلك في موضوع اسكتش المرشد وقلت لا يمكن يكون في موضوع اكبر.
فكرت ابعتلك اقولك مبروك علي صفحه كلمني شكرا برضه قولت استني.
وهكذا موضيع كتير اولها زمان واخرها دلوقتي
بس انت قدرت تجبيرني اني ارد عليك في موضوع والدك
اولا انا هعلق علي ردود مصعب واحمد ودعاء وبعدين هقول رائ
مصعب كالعاده الدمعه كانت هتفر من عينيه وهو بيقرا الموضوع ومقدرش يعلق غير بكلمتين وبس
احمدرفعت العقلاني رد عليك رد موضوعي وفي مكانه ووصفلك بالظبط الحاله الي انت بتمر بيها
دعاء بعفويتها وروحها المرحه حاولت تشجعك علشان تقدم علي الخطواه ديه
اما العبد الفقير الي الله فاسمحلي اقولك يا بخت اي اب في الدنيا عنده ابن زيك.
سلام

محمود

e7na يقول...

تصدق اول مره اشوف واحد نفسه يدخل سينما مع ابوه
الله على البراءه

e7na يقول...

انت مش ناوى تزورنا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

REEMOO يقول...

كتير الانسان لما بيتحمل المسؤوليه ويغير نمط حياته المعتاد بيبتدى يبص للأمور بطريقه مختلفه
ويحس باللى حواليه بطريقه غير اللى اتعود يحس بيها طول عمره
وده اكيد اللى حصل معاك دخول دعاء فى حياتك وجوازك وتفكيرك فانك تبقى اب ده خلاك تبدى تتأمل فى اللى حواليك وخاصه علاقه بوالدك
احساس المسؤوليه خلاك اتمنيت ترجع تانى لايام جميله كانت بدون المسؤوليه دى
واحساس الزوج والحياه الجديده خلاك تفكر فى الحفيد اللى اكيد هيسعد والدك ويخلق علاقه من نوع جديد بين الجد والحفيد
اكيد لو عرضت عليه هيوافق ولو رفض شويه محايله صغيره صدقنى هيرضى
ربنا يكرمك ويسعدك مع دعاء ويديك الابن او الابنه اللى بتتمناها
بالتوفيق

اصرار أمل يقول...

أخبرت دعاء أني أبي تغير بعد أن ظهرت هي في حياتنا..

الآن.. اكتشف أنني أنا الذي تغيرت...



أجمل كلمات هذه التدوينة ......

Mohamed Samir يقول...

تحياتي لك يابراء

elfagreya يقول...

يااااااه..بجد التدوينة دى جميلة جدااااا

واثرت فى جدا

وافتكرت ذكريات مع أبى بقالها زماااان وحاجات لسه حاصلة

ووقت تمشيتنا الساعة 6 الصبح وشباقات المشى وكلامنا

يلا..ربنا يفك اسره قريبا ان شاء الله

واعرض على والدك..واظن حتى وان ابدى فى الاول عدم موافقة فغالبا هيكون سعيد بالطلب نفسه

Tesla يقول...

ah walahy enta fakrtny b ayam zaman ama kan aboya lesa fady w balo raye2....nice post

Nostalgia يقول...

فضلت أقرأ الجملة الأخيرة من التدوينة يمكن ميت مرة ..
دياماً بكون فكر ان الناس هي الي تغيرت بس بكتشف اني انا الي تغيرت ..
واتغيرت اوي كمان