الخميس، يوليو 19، 2007

صباح الفل عليكم جميعاً (2)

أكتب بالعامية ولا الفصحى...؟؟، السؤال الأسوأ في تاريخ جلوسي أمام الشاشة وفوق الكيبورد.. (أمثالي يجلسون عادة فوق الكيبورد بميلهم للأمام وضغطهم بقوة على الأزرار، على كل حال.. هذا هو السطر الثاني وأجدني أكتب بالفصحى.. إذن هي الفصحى).

نعود للبدايات، هي دائماً تنذر بشكل النهايات، وأنا عادة لا أحب النهايات السعيدة، لكني أحب السعادة في البدايات..

البداية هنا كانت مجرد جولة على الإنترنت الواسع الشاسع يسع من الحبابيب ملايين، ولا حدود للإختلاف في وجهات النظر، خاصة وأن مساحة "الحجر" والمنع محدودة.. وعلى رأي عشرينات "فارس لفارس.. والإنترنت واسع"..

"زقزوق" عامل مدونة، شيء لطيف والله، أصل الأستاذ زقزوق بطريقة ما يرقد اسمه على ماسينجري المتواضع، ولأنها عادة سيئة تعلمتها منذ أن كنت أدخل النت في سايبر بـ2 جنيه الساعة، فإنه كان واحداً من هؤلاء الذين أرسل لهم لينك بكل جديد كتبته على عشرينات أو mbc أو المدونة.. حتى كان يوم أرسلت له اللينك، فرأى أن يفتح معي كلام، وكان كلامه للحقيقة أقل من أن يفتحه أحد.

"أنت ليه بتبعتلي اللينك، المدونة دي مش مفضلة بالنسبة لي، وأنا شايف إن مش من حقك تبعتلي الليلنك"..

كعادتي في الظروف اللي بالشكل ده، أرفع شعار "فلنحلق رؤسنا قبل أن يحلقها لنا الآخرون"، سألته أصلاً ايميله الكريم بيعمل إيه على ماسينجري، بالإضافة إلى سؤال بديهي، "يا عم لما أنت مجهز القلل، وهتكسرها ورايا أول ما أعملك بلوك، ما تعملي بلوك وتخلص.. ونبقى وفرنا القلل"..

الحقيقة رده ثبتني، قال إن دي نقرة ودي نقرة، فأنا قلتله إني بصراحة مش هعمله بلوك، لكن كل ما أكتب حاجة جديدة هبعتهاله على الماسينجر، ولو هو معترض، ممكن يفارقنا ويرحل.. خاصة وإني أصلاً مش فاكر إحنا تبادلنا الإيميلات في أي ظروف.

إذن، فلما الأستاذ زقزوق يعمل مدونة، فإنها لابد وأن تستحق الزيارة من شخص مثلي، طعنه زقزوق في أعز ما يملك في عالم التدوين، وبالتالي، نزور المدونة ونتعلم فنون التدوين من الأخ زقزوق.. دخلت.. وعجبني الجو شوية.. خلفية زرقاء، وكلام لطيف، واهتمام مشترك بالفيس بوك، ثم "فخور بإني مدون إسلامي".. وماله يا أخويا.. أفخر واتفشخر، عادي جداً والله.. بس أنا فعلاً عايز.. "أفهم".

كتبت ما كتبت، وبأسلوبي الذي يعرفه كل من قرأ لي يوم، ساخر متهكم، باعتبار أن السخرية والتهكم لم يدرجا بعد في لائحة الأفعال الإنترنتية المحظورة، ولأثبت أن الأمر أزعجني جداً، تدخلت بالفوتوشوب في البانر، وأضفت كلمة مش إسلامي، وأنا مقتنع تماماً بما كتبت.. وبما فعلت.

ثم دخل الأخ زقزوق ليرد، وسأل :" مش اسم مدونتك "وأنا مالي"؟ يبقى وانت مالك فعلا؟ ده السؤال".. والحقيقة إن "مالي ونص كمان".. لكن تلك نقرة أخرى ربما تقرأ عنها قريباً..

ثم يدخل الاخ زقزوق مرة أخرى ليقول : " مكنتش أحب أرجع هنا تاني، بس اللي بيقول كفرت ولو حتى بهزار فمش مستحب خالص الموضوع يوصل لكدة، لأن بمنتهى البساطة براء مكفرش وفي نفس الوقت الكلمة دي هتتنسب لحد حاطط يافطة فخور بأني مدون إسلامي..


على فكرة يا براء، فيه تدوينة عندي بتوضح وجهة نظري عن مصطلح إسلامي، ورغم اني مبحبش أدعو الناس اللي علاقتي بيهم سطحية لقراءة مدونتي بلينكات في الماسنجر أو عبر تعليقات في مدوناتهم، فأنا بس هعمل كدة المرة دي"..

ماشي ياعم .. نروح نشوفه كاتب إيه.. ونلاقي في كلامه ما يلي " كثر القيل والقال من الجاهلين أو المستجهلين، أعداءه وبغباء فريد ينتقدونه، ويوضح له جهله بالمنطق، أسئلتهم المعتادة والتي لا تلقى صدى مثل صياح الديكة فوق الأسطح، بل يكتفي بالتهكم كي يظهر خفيف الظل لا كي يفضح من يراهم على خطأ، وإن كان هو يريد كشف الخلل فينا، فليتركنا نكشف ما به من كوارث أولا".

لا يا شيخ.. أنت تقصدني.. يعني أنت بترد عليا أنا.. لأ وإيه.. بترد في مدونتك الإسلامية الحنيفة.. يا عم صلي على النبي.. إسلامية مين اللي تخليك لما تختلف مع حد ترد بالشكل ده.. عموماً الحق مش عليك.. الحق على مين طيب؟؟، هبقى أقولك مرة تانية على إنفراد!

شوف يا سيد.. أنا شخصياً عندي مشكلة في إنك ترفع اليافطة دي، يمكن لإني مدون بدافع عن "التدوين" وده حق مشروع لأي مدون في العالم، بدافع إن التدوين يفضل تدوين، وإن صديقي عبد المنعم محمود لما يتقبض عليه يتقبض عليه لإنه إخواني ناشط، مش لإنه مدون".

بدافع عن نفسي، إني أتنفس شوية حرية في التعامل مع ناس مش رافعين يفط، خاصة وإن كلامهم وجيه وأحياناً بيكون عبقري، لكن هتجبرني ليه إني أقرأه داخل إطار..

عموماً، أنا شخصياً واخد موقف مبدئي، بإني أبطل أزور أي مدونة مكتوب عليها إن صاحبها "فخور بإنه مدون بوذي" حتى.. خلينا أروح لعلاء ومنال ولوائل عباس وعمرو عزت ومالكوم إكس وهكذا رضوى وبنت بلد وبنت مصرية ومصعب الخير وقضية عم أحمد وأحمد يقولها على طريقته.. خليني أتعامل مع ناس ملهمش إطار أتصدم بيه، ولو كان عندهم.. فهم مكتفين بوجوده، وليس لديهم نية لإبرازه بهذا الشكل "الفج".

الغريب إن زقزوق دارس إعلام، وعارف كويس الفرق بين "اللطيف" و"الفج"، لكن دي مشكلته الشخصية..


يخلص كلامنا مع الأخ زقزوق اللي نور مدونتي مرتين، واللي أنا كمان نورت مدونته مرتين.. وبكدة نكون خالصين!

نروح للأخ "عياش".. وقد أعطاني درس لن أنساه!

في الوقت اللي بطلب فيه بشكل ساخر إنه يتحاكم على البانر اللي صممه، يدخل هو على تدوينة قديمة إسمها "صغيري"، ويقول تعليق لطيف.. ويشكر في أسلوب الكتابة..

الحقيقة محدش عادي يعملها، وفعلاً اتعملت منها كتير..

كلامك يا عياش على عيني وراسي، ومردود عليه بمسألة الإطار، لكن اعذرني إنه يمكن يكون مش مقنع شوية، بالإضافة إلى أنه قديم ومستهلك.. وربما حتى لا يلائم طبيعة الوسيط الذي نلتقي خلاله.. (الانترنت / التدوين).

عموماً، نكمل النقاش مع عياش على الماسينجر، وكفاية وجع دماغ للناس..

نيجي بقى للأخ بتاع "الكفر"..

صباح الفل يا ريس.. قابلني لما تفوق.. عايزك في سبوبة تكفير على خفيف..

..

* من ساعة ما بدأت أدون وأنا مش برد على التعليقات، يمكن قلة وقت، ويمكن قلة ذوق، ويمكن قلة فهم، على كل حال بعتذر لأي شخص انزعج من هذه الصفة، ويمكنكم الآن الاستمتاع بردي على التعليقات على التدوينة الأخيرة "قابله".. حيث يهاجمني "مجهول" آخر بسبب غلطة إملائية بسيطة.. ابكوا معنا..


* الجزء الأول من هذه التدوينة، هي أول تدوينة كتبتها على هذه المدونة.. وهي تعني لي الكثير!

هناك 9 تعليقات:

Amr Fahmy يقول...

ههههههههههههههههههه

بص يا براء خليني أقول إني سعيد بردك ده جدا، لأن لو أنا غلطت فعلا وقلت كلام ميصحش أو ضايقك فانت مغلطتش وكان سلوكك أحسن مني

على فكرة موضوع الديكة والصياح والكلام ده لو قريت النص كويس هتلاقيه بيشار بيه للعلمانيين، وعلى حسب ما عرفتي معرفش هل انت علماني ولا لأ

اللي انا قلته ليك فعلا بخصوص موضوع الشعار في أول فقرة إن جاهل بالفكرة، والجهل مش شتيمة أو سب أبدا، لأني أنا نفسي جاهل، صحيح انا حر أقول على نفسي زي ما أحب بس مقولش على حد تاني لكن الكلام ده لو شتيمة، وجاهل مش شتيمة، وخلي بالك فيه فرق بين وصف فعل بإنه كذا ووصف الشخص القائم بالفعل، يعني أنا مثلا لعبت مباراة بشكل سيء لكن هل أنا لاعب سيء في المطلق؟ أكيد تفرق، فلو أنا وصفت فعل من أفعالك بخصوص النقاش المتبادل ده يبقى مابوصفكش انت شخصيا


الشتايم هتلاقيها في الفقرة الأخيرة وكلها للعلمانيي

عموما أرجع وأقول تاني معنى إن فكري إسلامي إني مش ملاك بجناحين مش هيغلط، في الأول وفي الآخر أنا شاب وعصبي وبيتنرفز وهيرد ويغلط زيه زي أي شاب تاني، بس مش هسب الدين مثلا، أنا بعتذر لك هنا عن أي كلمة لو كانت ضايقتك، ولو قارينا بين الردود هنلاقي فعلا إن تعاملك مع الموضوع كان الأفضل ودي حاجة أحييك عليها

معلش كدة خليناها 3 زيارات هنا وزيارتين عندي، لما أنا قلت مكنتش عايز أرجع كنت أقصد للتدوينة إياها مش لمدونتك ككل، يلا سامحني لو زعلتك إن مكنتش سامحتني بالفعل، خليك تبقى "مسلم" أكتر مني حتى لو مش "إسلامي" زيي، شفت الفرق؟

غير معرف يقول...

قد ما كلمة إسلامي مش لذيذة..

قد ما كلمة مسلم حلوة

الكواكبي يقول...

رغم اني لم أقرأ التدوينة براء ولا التعليقات عليها بس سعيد برضه برد عمرو الجيد والمهذب ولو اين بيني وبين اسم زقزوق حساسية من ايام ما كنت باقرأ ميكي بس مش مهم . . المسامح كريم ويا بخت من بات مغلوب ولا بات غالب؛ واللي خدته القرعة تاخده ام الشعور فضلاً عن أن مبروم على مبروم ما يلفش؛ والبنت مالهاش غير بيت جوزها وضل راجل ولا ضل حيطة
ابقوا زورووووووناااااا

e7na يقول...

ولا تشغل بالك بحكاية الرد على التعليقات
المهم تكتب ونلاقى بوستاتك الجديده كل ما ندخل
وتزور مدوناتنا

انت كاتب حلقات فى الجزء التانى من تامر وشوقيه؟

غير معرف يقول...

يهاجمك مجهول بسبب غرورك وتكبرك على الآخرين لانك عايش دور الجهبذ العبقرى المثقف اللى مفيش زيه
ولكن سبحان الله
وقعت فى غلطة املائية ساذجة
ياريت تكون اتعلمت..
مهم انك تتعلم الكتابة
لكن الاهم انك تتعلم التعايش والذوق والادب والتواضع
وربنا يهدينى ويهديك
وحاسب نفسك وحاول تغير نفسك للأحسن

غير معرف يقول...

هو حضرتك بترشح ولا بتفسر التعليقات
ما هى مكتوبة بالعربى وكلنا شوفناها
المشكلة انك جيت عند اهم تعليق
وهو تعليق الاخ
AbdElRaHmaN Ayyash
لان بجد تعليقه كان بسيط ومعبر
والبانر اساساً ما كانش محتاج عبقرى عشان يفسره
الراجل هو اللى عمل البانر ورد عليك
ياريت نشوف ردك عليه..اذا كان عندك رد
وشكراً

Mariam يقول...

يارب المياه تكون رجعت لمجاريها يارب
أنا عارفة براء كويس أوووووووووووي من خمس سنين وأعرف زقزوق كويس أوي من سنة واحد بس وبصراحة الإتنين من أفضل الناس اللي اتعاملت معاهم في الشغل وبشكل شخصي

فأتمنى بجد إن كل واحد فيكم متفهم رد التاني وتدوينته

سعيدة أووووي بتدوينتك دي يا براء
وسعيدة بردك هنا جداً ياعمرو
نا كنت كتبالك تعليق على تدوينتك الأخيرة وأدخل أكتب تاني بعد ما قريت تعليقك هنا وتدوينة براء

شكراً يا جماعة ... شدتونا وأمتعتونا

AbdElRaHmaN Ayyash يقول...

سلاامو عليكم
ازيك يا مستر بيرو
على فكره انا اللي ضايقني في موضوعك ده هو اني علقت على الموضوع بتاع صغيري
يا عمي و الله انت لو عرفت انا علاقتي بيك من امتى هتدهش و تذبهل
:D من أول ان انا تخين و بنضاره
مرورا بإن أنا كنت خايف أضيفك على الايميل من زمااان من حوالي سنة ونص عشان كنت عرفت انك مش بترد على حد
و ضفت مصعب عادي و اتكلمنا كتير و عرفت مصعب شوية .. مقدرش اقول كتير
بس فعلا كان نفسي اتعامل معاك بشكل شخصي ,, ممكن لو عرفتك أكتر او انت عرفتني أكتر ابقى اوضح لك ليه
عموما شرف ليا اني اتابع تدويناتك و مصعب و تدوينات دعاء من زمان اوي ..

يا باشمهندس فعلا انا فخور بكلامك ده

النقطة التانية الاساسية بتاعة البانر

البانر يا سيدي انا صممته بناء على طلب البراء الاناضولي .. لأنه كان له فكرة ان ما دام كل الناس بتعلن عن هويتها ليه كمان احنا منعلنش عنها
أما الكلام فعلا مستهلك انا مقتنع بكده .. لأني مش هجيب حاجه من عندي .. كل الكلام معروف و الردود جاهزه.. لكن رأيك انه غير مقنع .. دي نسبية و تخضع لطريقة تقبلك للفكرة أو عرضي لها .
و تعليق عمرو عجبني بصراحه خصوصا انه كان بعت لي بيقول انه حاد و دمه بيفور :):):)
أنا مش معترض اطلاقا على وصفك لنفسك بانك مش اسلامي .. ده ممكن يقلل مساحات الالتقاء بيننا بس لازم هنلاقي مساحات أوسع نتقابل فيها و نتكلم .
لكن تعرف .. الوسيط اللي احنا بنلتقي من خلاله ممكن يكون أنسب مكان نقول فيه الكلام ده
لكن أنا معاك فعلا ان احنا عاوزين صيغة جديدة للكلام اللي بنقوله عشان يقنع اخواننا المثقفين في المجتمع و على رأسهم جيل عشرينات
عموما ان شاء الله انا هحاول أبدأ في ايجاد الصيغة دي
ربنا يوفقك ياباشمهندس
و ان شاء الله نتقابل قريب
سلام
-----------
بالنسبة لأول تدوينة .. :):) انا كمان بعاني من الموضوع ده
بس أول تدوينة ليا كان فيها اسمك
:D شايف متأثر بيك من امتى

البراء أشرف يقول...

شكراً ليك يا عبد الرحمن (أخجلتني جداً، وبعدين أنا عمري ما نفضت لحد أنا على طول برد).. شكراً ليك يا عمرو.. شكراً ليك يا عم المجهول.. وطبعً شكراً لصديقي العزيز إسلام لطفي.. والزميلة العزيزة مريم المعتصم..

بالنسبة للرد على كلامكم المهم.. أقترح نقله للماسينجر.. لما فيه من "سترة".. وتوفير للوقت..

شكراً مرة كمان..