الخميس، يونيو 15، 2006

درس العقل.. بيطلعلي!

بدأت أخاف جدا الكام يوم اللي فاتوا.. والألم بدأ يزيد..

ورغم إن أعراض الخوف والألم شيء طبيعي ومعتاد في حالتي ومعروف عن كل من يصابون بـ"طلوع" درس عقلهم إن الأعراض السابقة من خوف وألم تصيبهم..

رغم ذلك فإن خوفي وألمي مختلفين "سنة" عن خوف وألم أي شاب وأي فتاة (بطريقة اللمبي) بيطلعله درس العقل..

أولا خوف من الأسم.. فلفظ "العقل" يوحي بأني على مشارف مرحلة جديدة في عمري، مرحلة هتخلى فيها عن جنوني السابق، وهيتم سلب مني حرتي وفطرتي في إني أعمل أي شيء بدون ما تكون ليه حسابات منطقية أو.. عاقلة!

الشيء الثاني.. إني أصلا بخاف من كل شيء جديد "طالع"، خوف غريب من "المطالع"، وحب أزلي للـ"منازل"..

الألم بقى سببه إن درس العقل حضرته لما فكر إنه يطلع، قرر إنه يكون هو والدرس اللي جنبه متلازقين جدا، وطبعا الدرس اللي جنبه لإنه مش عاقل زي صاحبنا، رفض إنه ينزاح بسهولة قليلا حتى يطلع العقل وهو مرتاح، وهو ما عمل بينهم مشاكل كتيرة.. وطبعا أنا الخسران الوحيد في معركتهم غير العاقلة..

على العموم.. درس العقل بيطلعلي.. إدعولي

هناك 13 تعليقًا:

Lasto-adri *Blue* يقول...

لكن الغريب ان اللى اسهل من طلوع "ضرس العقل" خلعه
تصدق دى؟؟

كنت فى اشد هياج حالة الرعب لما رحت اخلعه من كام اسبوع كدة
ولحد دلوقتى مش متخيلة ازاى ما حستش باى الم نهائيا لما خلعته
!!!

غير معرف يقول...

هو الدرس لسه هيطلع الان

Dananeer يقول...

3anet last year zayak ya baraa
mn mado3 el 3a2l w el waga3 el fazeee3
yalla kadar b2a
bas el aw7ash lama teb2a mn 3'er shenan ya bne (">)

ياء يقول...

ربنا يزيدك عقل على عقلك

karakib يقول...

سلامتك الف سلامه :) انت شبه واحد صاحبي من اسكندريه اوي علي فكره
انتوك

ام مليكة يقول...

على الله بس تعقل انت والضرس يكون بفايدة
اصلي بصراحة شاكة ان حته درس يعقلك
كان غيره اشطر

غير معرف يقول...

I have it toooo, it's soo painfull

SOLITUDE® يقول...

غريبة!!!
انت مش عندك 20 سنة؟!!!
لسة ضرس العقل هيطلع لك!!!!!!

soosa el-mafroosa يقول...

طب ده ضرس واحد و عملتله موضوع ع البلوج ..امال التلاته الباقيين لما يطلعوا?...اكيد هتعملهم قناه فضائيه..بس لو سمحت ابقى شفرها....بهزر طبعا...الف سلامه عليك

وشكرا على زيارتك للبلوج بتاعي

معتـز عبد الرحمن يقول...

ألف سلامة عليك
وكمان هو الضرس منعك من الكتابة ولا أيه؟؟
-----------------------------------
http://egypt-student.blogspot.com/

Tagreed يقول...

لالاتخاف
لان درس العقل
بيوجع العقل
ويزيدك هباله
افرح ياعم

Tagreed يقول...
أزال أحد مشرفي المدونة هذا التعليق.
sherif يقول...

كده كده يا اسطي هتعقل بمزاجك او غصب عنك .... او ما تتدبس يا نجم و تنقل الدبله و تمضي علي القايمه هتعقل عقلان الحنين في حضن الضنا


و ابقي قول موزعاتي قال