الاثنين، يوليو 10، 2006

مش كل البشر.. فرحانين


رغم إني لا أمر بحالة اكتئاب.. ولا أنا طهقان زهقان مضايق.. ولا حد مزعلني (لإن أصلا محدش يقدر) ولا دعاء منكدة عليا ومقموصة مني، ولا أنا مفلس ومعييش غير تلاتة وعشرين جنية خمسة وسبعين قرش لآخر الشهر، ولا محروم من شراء الجرايد والمجلات للتوفير في بند المصروفات الشخصية في ميزانيتي..

ولا لإني محبط في الشغل شوية.. ومش عارف أكتب من فترة.. ولا لإني النهاردة واحد كلمني على التليفون بشكل وحش جدا وعاملني معاملة الخدامين.. ولا لإن واحد تاني أول امبارح رزعني تعليق بايخ قوي ع البلوج، ولا لإن تظبيطات السفر للدوحة باظت تقريبا أو في طريقها للبوظان، ولا لإني فاصل من كل حاجة.. وعندي شغل كتير مفروض أعمله ومش عارف أجمع كلمتين على بعض..

للأسباب دي كلها لقيتني فجأة.. بردد وأدندن.. بكلام بحبه قوي.. كتبه عمنا جاهين.. لما كان حاسس بحاجات زي اللي أنا حاسس بيها..

ساعات أقوم الصبح قلبي حزين

أطل بره الباب ياخدنى الحنين

اللى لقيته ضاع..

واللى اشتريته انباع

واللى قابلته راح وفات الأنين

وارجع واقول

لسه الطيور بتفنّ

والنحلايات بتطنّ

والطفل ضحكه يرنّ

مع ان مش كل البشر فرحانين

حبيبى سكر مر.. طعم الهوى

فرق ما بيننا البين ماعدناش سوا حرام عليك يا عذاب

نبقى كدة اغراب

ده البعد والله جرح من غير دوا

آدى اللى كان.. وادى القدر والمصير

نودع الماضى و حلمه الكبير

نودع الأفراح

نودع الأشباح

راح اللى راح ماعدش فاضل كتير

ايه العمل فى الوقت ده يا صديق

غير اننا عند افتراق الطريق

نبص قدامنا

على شمس أحلامنا

نلقاها بتشق السحاب الغميق

وارجع واقول

لسه الطيور بتفنّ

والنحلايات بتطنّ

والطفل ضحكه يرنّ

مع إن مش كل البشر فرحانين

هناك 9 تعليقات:

مُصْعَب إِبْرَاهِيم يقول...

خليتني أفرح حزينا ... أو أحزن فرحان ..

مش عارف أنهي المظبوط فيهم!!

Tamer يقول...

الفرح حالة مهمة فى حياة الانسان .. بس لازم عشان نحس بالفرح لازم نحزن شوية ونكتئب ونتضايق ونتخانق عشان نفرح بعدها ونحس الفرح حلو قد ايه

ربك كريم ويعدها ان شاء الله
بمناسبة كلام جاهين .. دى اغنية طبعا لماجدة الرومى فى فيلم عودة الابن الضال ليوسف شاهين وكانت من الحان كمال الطويل
دا لينك للاغنية اهو .. رفعتهالك عشان تحس الحالة دى كاملة :d
http://www.savefile.com/files/9364211
تحياتى

مـحـمـد مـفـيـد يقول...

والله تجسيد للحياه احييك

غير معرف يقول...

السلام عليكم ورحمة الله وبركاته
ازيك يا ابراء.. انا بقى زعلانة!
بس خلينى اتفلسف شوية!
دايما دايما احنا جوانا كل نقيضين، يعنى حتى وانت زعلان بيبقى فيه حتة جواك فرحانة!

يمكن الحتة دى هى بتخليك تحس باليسر اللى مع العسر

يمكن حتة الزعل اللى جواك ساعة الفرحة هى اللى بتحميك من الاغترار بالدنيا...

المهم ان الواحد دايما عنده استعداد يفرح ويزعل
* وانه هو اضحك وابكى*

السلام عليكم ورحمة الله وبركاته

العـابــــــــره يقول...

فعشت ولا ابالى بالرازايا لأنى ما انتفعت بأن أبالى
تأكد إن كل شىء بيعدى مهما كان......

sherif يقول...

مبروك يا بيرو عقبال ما تخرج من عنق الزجاجه و تبقي خريج قد الدنيا ........

خبر حلو و بالتوفيق

شريف عبد السلام

ام مليكة يقول...

ياااااااااااااااه انت حساس قوي يابيرو مش باين عليك تصدق..انا بهزر طبعا اوعة تزعل مني
الف سلامة عليك من الزعل يارب اي حد تاني او ثالث او اي حد غيرك بعد الشر عليك من الزعل والخنقة والزهق بس ياريت لو مخنوق تفضفض ..مشيها فضفضة

bent za7mma يقول...

sala7 jaheen w magda el romy ...great choice bara2

غير معرف يقول...

الله يرحمك