الأربعاء، نوفمبر 15، 2006

تتجوزيني.. ؟؟



قليلون فقط هم الذين عرفوا القصة..

لذلك سأحكيها من البداية..

شاب مصري زي وزيك.. واضح إنه اتخانق مع حبيبته أو البنت اللي هو ماشي معاها.. فكر في طريقة يصالحها بيها.. اتفرج على فيلم "السلم والتعبان" وأخيرا قرر يستخدم طريقة حازم في مصالحة ياسمين.. وبدل ما يأجر يافطة واحدة ويكتب عليها كلمة رقيقة زي "تتجوزيني".. لأ، يلجأ لطريقة تانية وهي التشويق والإثارة.. واللف والدوران.. وعلى رأي المثل.. أقصد التحريف الراقي للمثل.. (كحرت البت تحبك.. حب البت تحكرتك)..

فكر هذا الشاب في أن يكحرت البت ويحبها في الوقت ذاتها..

يعمل إيه.. يعملها يافطة كبيرة جنب نادي الصيد.. يقولها والنبي يا حبيبتي حقك عليا.. وأنا عاملك مفاجأة.. لو عايزه تعرفيها روحي للحتة الضلمة اللي كنا بنتقابل فيها على كوبري المنيب بعيد عن الكمين عشان محدش يشوفنا وإحنا قاعدين في العربية بنسمع سوا أغاني أجنبية محدش فاهم منها حاجة..

تروح البنت الزعلانة.. وتلاقي يافطة حمرة كبيرة.. مكتوب عليها كلام بالإنجليزي ملحقتش أقراه الصراحة لإن الميكروباص كان ماشي بسرعة.. وكلمة كبيرة قوي.. (تتجوزيني؟؟)..

قصة لطيفة فعلا.. أنا فاكر إني قلت لدعاء (تتجوزيني؟؟) دي في رويال باكري.. وده كافيه لطيف وصغير جنب الشغل.. وشربنا شاي ومانجة ودفعت 20 جنية وكنت مضايق..

عموما لو كنت لسه متجوزتهاش كنت هاخدها من إيدها في أي تاكسي.. ونطلع على المنيب.. وأدفع العشرين جنيه للتاكسي وأوقفها قدام اليافطة وأقولها فتحي عنيكي.. تروح هي تتفاجئ من المفاجئة (حلوة تتفاجئ من المفاجأة.. أومال هتتفاجئ من إيه يعني).. وأقعد أكلمها عن الإعلان، وأوصفلها ده كلفني قد إيه.. وإني دفعت اللي قدامي واللي ورايا عشان الإعلان.. وعشان كدة أنا معيش فلوس أتجوز.. أنا بس معايا فلوس أقول (تتجوزيني؟؟)..

يا نهار أبيض يا جدعان... يعني هي فلوس الجواز كانت قليلة قوي بحيث نزودها إحنا تاني..

بعد كدة الشاب لو عايز يتجوز لازم يبقى جاهز من مجاميعه.. فلوس الشقة والمهر والشقة والجاهز والفرح.. وقبل كل ده لازم يجهز فلوس اليافطة اللي هيقولها بيه.. (تتجوزيني؟؟)..

أنا رأيي إن من باب المساواة لازم نطلب من البنات كمان إنها تكون على الدرجة ذاتها من الرومانسية.. والبنت من دول بعد ما تشوف اليافطة تطلب مهلة للتفكير.. بعدها تاخد الواد بتاعها ويقفوا على الكوبري الخشب (لإن الإعلانات عليه أرخص من كوبري المنيب).. وتقوله فتح عينك.. يروح مفتح عينه.. يلاقي يافطة مكتوب عليها.. (أنا موافقة)..

في فيلم السلم والتعبان وفي مشهد النهاية بعد ما ياسمين شافت اليافطة حضنت الواد حازم حضن جامد وكل العربيات اللي ماشية في الشارع قعدت تزمر(تشجيعا لا اعتراضا طبعا)..

لو الإخت هنايا (ده اسم بنت الإعلان) حاولت تحضن الواد بتاعها (زمانهم متجوزين دلوقتي).. أكيد هيتمسكوا آداب من أي ظابط من الكمين.. وأنتوا عارفين ظباط الكمين أنا مش هحكيلكم عنهم..

عموما بس أنا عايز أقول مبروك للعروسين.. وإن كان الموضوع لا يخلوا من الحقد والحسد.. بس والله أنا لو كان معايا فلوس.. أكيد كان ممكن أفكر في فكرة اليافطة دي.. متزعليش بقى يا دعاء..
- الصورة من عند شريف
- صورة نادي الصيد هتلاقيها عند ميشو

هناك 9 تعليقات:

ام مليكة يقول...

ياااااااااااااااااه
برافو عليك يابراء فضلت مركز في الموضوع لحد ما عملته انا فاكره اول مرة شاورت لي ع اليافطة دي كنا في العربية في ثاني يوم كتب كتابنا واول خروجه بعد كتب الكتاب وقبلها كنت حكيت لي عنها
بس تصدق فكرة جامدة قوي يابيرو بس احنا خلاص عدينا المرحلة دي من سنة تقريبا

وبعدين يا حبيبي بلاش مووضع انك زعلت ع العشرين جنيه دي احسن الناس تصدق ويفتكروا انك بخيل وانت الفوس اخر حاجة مهمة في حياتك

انا كمان بحب حاجات معينة زي اغنية حماقي اللي انت عارفها؟؟ظ

eZz يقول...

تصدق فكرة برضه لازم نشجع الولد :)

انا فكرت اعملها بس في عيد ميلادها العشرين لكن تتجوزيني !! صعب شوية تتعمل بالشكل ده :)

علي فكرة يا براء صورة نادي الصيد انت كاتب اللينك غلط مكرر الـ http

ظبط الحياة عندك ... بس تمام البوست ده شكلي هاضربه منك .. متخفش هارمي لينك عليك D:

Purple Rose of Cairo يقول...

انا شفت اليافطتين و على قد ما انا فرحانة بالرومانسية على قد ما انا مش قادرة احوش نفسى عن فكرة مش كان جابلها ثلاجة والا فرن بالفلوس دى احسن

عموما كثر خيره و خيرك لانه اكيد فى شباب حتستعمل يافطة المنيب و اهوه برضة قدم خدمة عامة للرومانسية

غير معرف يقول...

انا شخصياً باحسد هانيا بس بعد ماقولها مبروك شوفوا كام بنت في الوطن العربي ممكن تستمتع بلاحظات رومانسيه تجنن زي دي !! دي كفاية عليها الذكريات الحلوه بقيت عمرها مش كفايه هم الجواز و العيال اللي هاتشيله كمان هانستكتر عليها شوية ذكريات حلوه جتنا نيله في حظنا الهباب

غير معرف يقول...

مساء الفل

غير معرف يقول...

الحمد لله حدانا في الزجازيج ( عندنا في الزقازيق يعني )لا عندنا منيب ولا كمين على الكوبري بس حاول كدة تعلق إعلان حب للمزة بتاعتك و انتا تلاقي البلد كلها عارفاك و العيلة و عيلة العيلة واقفين قدامك بالشوم و شرف البنت زي عود الكبريت و الفضيحة لا يمحوها إلا الدم ... ناهيكم ( حلوه ناهيكم دي ) عن لو فكرت في الحضن بتاع السلم و التعبان قول عليه العوض حتى لو كانت مراتك كمان

شيمـــــاء يقول...

انا يا اخويا مصدقتش لما البنت اختى قالت لى .. ان فيه اوشاعه بتقول كده

كتر خيرك ...انك عرفتنى
ايشى خيال يا ناس

الحمد لله ان انت نفدت و كتب الكتاب
لان دلوقتى ممكن البنات يطالبوا بشبكة و مهر و يافطة و هتفرق من كوبرى المنيب عن نادى الصيد عن نادى 6 اكتوبر


والف مبروك يا هانيا
لوولولوللللللللللللللللللى

شيمـــــاء يقول...

لينك ميشو مش شغالة
ننكن تصلحوه لينا ؟؟
:D

معلش اعتبرنى من الضيوف و ضايفنى

غير معرف يقول...

ايه دا من ال صور اعلاني لحبيتي
هانييا
وحشتيني يا هانيا
بزمتك مش فكره ... وقريبا في المنصوره كمان
Montana master of love