الثلاثاء، يوليو 17، 2007

مش إسلامي



عايز حد يفهمهاني..

لقيت البانر اللطيف ده على مدونة كنت داخل عليها بالصدفة..

هتجنن..

افهم إن واحد يكون فخور إنه مدون إخواني وسط جيش المدونين اللي نازل تدوين عن الأسرة والكتيبة والمعسكر وذكريات مدرسة الجمعة واليوم الإسلامي وباب الطهارة في فقه السنة..

كل ده أفهمه..

إنما مدون .. "إسلامي"..

مش واسعة شوية دي..

إسلامي إزاي يعني.. بيكتب مراعاة لأحدث الكتب الإسلامية زي "فقة التدوين" و"التدوين بين الثواب والعقاب" و"التدوين كوسيلة للدعوة الفردية والعامة" و"ماذا خسر العالم بإنحطاط المدونين"..

إسلامي إزاي..

يعني هيكتب عن إيه ويسيب إيه.. ؟

يعني هيكتب ليه أصلاً؟؟

لولا إني موقع على وثيقة "لم يؤخذ الكلام للمحكمة" بتاعة عمرو عزت، كنت طالبت إن اللي عمل البانر العبقري ده يتاخد على المحكمة، أو على الأقل يتاخد على ندوة من ندوات الصالون الإسلامي للدفاع عن الحريات الإسلامية بنقابة الصحفيين المسلمين، يرأس اللجنة الكاتب الإسلامي محمد عبد القدوس.. نروح هناك.. ونفهم منه يقصد إيه حضرته بالتدوين الإسلامي..

لالالالا.. مش قادر أمنع نفسي..

أكيد قبل ما يبدأ يدون بيصلي ركعتين "حاجة للتدوين".. ويسمي الله.. وبيكتب من اليمين للشمال.. ولو نسي حاجة يتسعيذ من الشيطان الرجيم.. وبعد ما يخلص التدوينة يحمد ربنا ويسجد سجدتين شكر، ويقرأ بعدها شوية مدونات إسلامية صديقة...

مش عارف..

يمكن أكون مزودها..

بس عموماً أنا اتنرفزت لما شفت البتاعة دي..

يمكن أروح أكمل شغلي وأرجع تاني أكلم عنها بهدووووووء وتركيز..

بس لحد ما ده يحصل..

أقدر أقول إني فخور إني مدون (مش) إسلامي..

وهحط البانر ده على مدونتي.. بس بعد التعديل..


وأنا مالي..

هناك 35 تعليقًا:

غير معرف يقول...

انا مش عارف انت مضايق نفسك ليه يا عم براء

التدوين في حد ذاته مساحة حرة طليقة لا يقيدها قيود
يعني اللي عاوز يكتب حاجة يكتبها يعني اللي بيتكب تدوينة ضد كل الشرائع السماوية
واللي يكتب في الجنس الثالث ( مش عارف ليه بيعدوا على الاول والتاني ويدخلوا على طول في التالت )

يا سيدي اللي عايز يكتب نفسه اسلامي ولا مسيحي ولا يهودي
هو حر
واللي ما يعجبهوش ميدخلش ولا يشارك

ولا تتعب اعصابك يا ريس

اخوك

مجاهد شرارة

MariumaZ يقول...

أنا بضم صوتي لصوتك يا براء، بصراحة وعامةً أنا بتنرفز من أسلمة الأشياء دي ... مرة يقولك تدليفون إسلامي ومرة يقولك الساعة الإسلامية والمنبه الإسلامي والموبايل الإسلامي ... كمان حيبقى فيه مدونة إسلامية...

ورداً على الأخ مجاهد أنا أفهم لما واحد يحط في مدونته ويكتب إنه فخور إنه شاذ دي بصراحة ممكن أفهمها ... واحد معندوش دم .. جزمة أديمة وبيعترف بده .. وفي حرية رأي وبتنجان أزرق ... ماشي حخرس ومش حتكلم

لكن فخور بأني مدون إسلامي ... هو إيه مفهوم إسلامي دي؟؟؟
يعني فعلاً إيه اللي بيتكتب وإيه اللي ما بيكتبش مش فاهمة ... حيلخص لنا الإسلام كله في مدونة يعني؟؟

الصراحة ده رأيي ويمكن أكون محموءة برضه زي براء ويمكن أهدى شوية في تعليق تاني ... وسلام يا جدع

قضية عم أحمد Ahmed Case يقول...

بيرو مع إني كنت مش هعلق على البوست ده علشان حسيت انه رد فعل بس .

حبيبي انت صحفي وأول مبدأ تؤمن بيه حرية التعبير فأنا معنديش مشكله ان كل احد يعبر عن فكرة ما لم يتعدى على حقوق الناس ما تنساش الميثاق ده أولا .

ثانياً حبيبي ممكن الراجل يكون قصده التحلى بالاخلاق الاسلامية في الكتابة مثلاً مش هيشم مش هيغتاب هيتكلم عن الائممة عن فقه الطهارة عن اي موضوع يعبر يا بيرو زي ما هو عايز .

أخيرا صديقى أختلف معاك في حاجتين اولا انك اضايقك من تعريف واحد لنفسه وده شيئ خاص بيه زي ما انت تعرف نفسك بما شئت ، ثانبا ً أكتب وانت حيادي تطلع أحلى كلام .

سيبك انت من التدوين انت واحشني مش هتعزم عتدك قريبا ولى ايه .


تحياتي بيرو .

غير معرف يقول...

ههههههه
أوكيه
أنا عايز البلوج اللي اتحط فيه الصورة دي
وإلا هعتبر دي إفتعالة من إفتعالاتك

غير معرف يقول...

http://www.zakzook.blogspot.com/

Amr يقول...

مش اسم مدونتك "وأنا مالي"؟ يبقى وانت مالك فعلا؟ ده السؤال

غير معرف يقول...

مدون إسلامي قد تعني من منظور صاحب المدونة أن له رؤية للحياة منبثقة من الإسلام باعتباره دين يختلف في أشياء كثيرة جدا عن غيره من الديانات والفلسفات البشرية فربما يكون لهذا المدون رؤية للإنسان ومركزه في الكون تختلف عن رؤية المدون المسيحي أو اللاديني ففي حين أن الإسلامي قد يري أن الإنسان مسئول عن أفعاله فقط فقد يري المسيحي أن خطيئة آدم تلحقه بينما ينظر اللاديني إلي الأول والثاني علي أنهم معتوهين وأنه لا وجود للوحي أو الكتب المنزلة أصلا. هذه الرؤية ستلقي بتأثيرها ولا شك علي رؤية أحدهم للكون والإنسان والآخرة مما قد ينطبع علي الآراء الواردة في المدونة.

وقد يري المدون الإسلامي أنه يجب أن يعلي قيما وسلوكيات يراها هامة مثل التأكيد علي أن الأسرة ومؤسسة الزواج ضرورات اجتماعية بينما قد يري المدون ذو التوجهات الشيوعية أن مؤسسة الزواج هي عبارة عن استغلال ذكوري للنساء حسبما أورد المأسوف علي شبابه وشيبوبته فريدريك إنجلز.
ولعل أحدهم يؤمن بنظرية النشوء والارتقاء بينما يري آخر أن الخلق الوارد في الكتب المقدسة ليس فعلا رمزيا بل هو حقيقي، وعلي ذلك فالأول سيري أن هذه النظرية تؤكد أنه لا وجود لشئ اسمه "أخلاق مطلقة" لأننا مجرد مخلوقات تطورت عن الحيوان، وعليه فإن البشرية في حالة تطور مستمر والأخلاق الموجودة في المجتمع الإقطاعي قد تطورت لتصبح أخلاق القرن العشرين، إذن كل شئ في حالة تطور مستمر ودائم بما في ذلك الأخلاق. خذ عندك مثلا هناك رؤية للبغاء تذهب إلي أن المرأة كانت ترزح تحت هيمنة الرجل في المجتمع الزراعي وتعتبر إحدي ممتلكاته لذلك كان ممارسة المرأة للبغاء شيئا مقيتا يرفضه المجتمع بأخلاقياته آنذاك، بينما في المجتمع الحديث تحررت المرأة اقتصاديا فتغيرت النظرة للبغاء واعتبرت المرأة الساقطة حاليا عاملة جنس
Sex worker
أي أنها حسب الرؤية الماركسية تقوم ببيع جسدها باعتباره سلعة
Commodity
وبالتأكيد المدون الإسلامي لن يملك نظرة كهذه.

ولأن كل هذه الرؤي وأكثر منها يتعارض تعارضا جذريا وينبئ القارئ بوجود تنافر بين أصحاب المذاهب الفكرية والمعتقدات فقد حرص بعضهم مثلا علي أن يعلن فخره بأنه مدون إسلامي أو شاذ جنسيا أو ليبرالي أو مادي دون انتظار حتي يقوم القراء بتصنيفهم.

غير معرف يقول...

انا شخصيا مش بحب التقسيم بس البنر الي انت عملتة ده اية معناه

انك مش اسلامي يعني بدون رخامة كل يوم جمعة وقت صلاة الجمعة _ مش اسلامي _

او انك مثلا بتحب تكتب من فوق لتحت بدلا من اليمين للشمال _ مش اسلامي _

او انك مثلا نسيت حاجة فبتستعيذ بالله من الاسلامين _ الوحشين _

او انك مثلا لما تخلص التدوينة مش بتصلي ولا بتقول الحمد لله ولكن الحمد ... شوف مثلا عاوز تقول اية

بجد البنر الي انت عملتة ينرفز بجد ورخم

غير معرف يقول...

ايه يا بيرو في ايه
ايوة بجد في ايه
دا انت الصحفي المثقف الفاهم كاتب كده يبقى نقول على حرية الفكر والتوجه والتعبير نقول على دي كلها السلام انا حاسس انك زودتها حبتين يبدو انك كنت متنرفز من حاجة تانية خالص واول ما شفت البتاعة قمت مطلع زعلك كله ومنزله عالكيبورد
انا شايف انها حاجة عادية جدا ان يبفى في مدون توجهه اسلامي وواحد تاني مالوش خط معين يحصر نفسه فيه زي حضرتك
وواحد تاني ليه توجه علماني مثلا ودي حكمة ربنا في تعدد الاتجاهات والافكار لكن في النهاية الصح والحقيقة بتبقى باينة زي عين الشمس والشاطر يفرض نفسه بقى في وسط الزحمة دي كلها
ولا ايه يا عم البراء
على فكرة انا معجب بتدويناتك لكن حسيت ان الاخرانية دي خرجت عن النص حبة
تحياتي حمادة

الحلم العربي يقول...

ادخل على مدونته ....و ابعتله تعليق اسأله عن معناها ...
ساعتها .أكيد النرفزة اللى انت فيها هتروح لأنك على الاقل هتفهم وجهة نظره ...و جايز تقتنع و جايز ما تقتنعش ...انت حر ...و هو كمان حر

تحياتي

غير معرف يقول...

السلام عليكم
معلش يا استاذ براء في دي الكلمة بوستك و نرفزتك اللي مالها لزوم هيه اللي تنرفز
يا اخي كل واحد حرررررررر في التعبير عن مدونته و انت ليييييييييييه حرقاك كلمة اسلامي
سبحان الله الكلمة دي دلوقتي بقت بتنرفز بعض المسلمين نفسهم
احلي تعليق بتاع الاستاذ احمد رفعت ماشاء الله عليه ربنا يكمله بعقله

belal يقول...

أنا مش عارف ..الموضوع مضايقك في ايه ..
أنا مش عارف..أكنه داسلك على طرف
...
ما تاخد ايميله ..وتسأله عن معناها
....
وزي مانتا بتسأل هوا ازاي مدون إسلامي..
ازاي انت مدون مش اسلامي
....

أبوشنب يقول...

صباح الفل يا براء

دي اول معرفتك بيا

انا متابعك من زمان

عشان كفر الشيخ وناسها

المهم

لما حد يقول يقول انه مدون شئ ما

فهو يعني انه جعله دون المستوى المطلوب

فيمكن يقصد انه مدون اسلامه

وبيعرضه للنقد من خلال لزقه على كل تصرف وكل حركة وكل فعل

زي ورقة الدمغة اللي فقدت معناها معانا في الحياة

فأصبح هناك فرح اسلامي

وزي اسلامي

وتليفون اسلامي

وحذاء اسلامي

وعلاج اسلامي

وجنس اسلامي

وسينما اسلامية

وهلم جرا

وبذلك فجميعهم دونو اسلامهم

وجعلوه ادنى من مستواه الحقيقي كدين

ليرتبط بأشياء دنيويه

من ثم يا ابو الغايب

(أمي كانت تقول كدة للي مستني مولود)

عايزك تغير البانر

لا وتعمل بانر انقح منه

نكتب فيه بخط عريض

ونصحح البانر بتاعك

ونكتب

أنا مش مدون اسلامي

فاسلامي أسمى من كل أمور الدنيا مهما علت قدرا

أنا مش مدون اسلامي

وسلم لي عالواد عتريس

غير معرف يقول...

أعتقد أن هناك مشكلة في بعض التعليقات الرافضة لموقفك فهم يتكلمون وكأن براء اعتدي علي حرية التعبير للمدون المقصود بالتدوينة، في حين أن براء عبر عن رأيه في البانر دون دعوة لغلق أو حجب المدونة المقصودة أو مثلا محاكمة المدون المقصود أو توقيع غرامة مالية عليه...الخ أو أي شكل من أشكال الحد من حرية التعبير.
لذلك فعلي المعارض لرأي براء أن يحدد رفضه لموقف براء من خلال نقد أسلوب براء الساخر في التدوينة الحالية، لا أن يتم الإشارة لبراء علي أنه تعدّي علي حرية التعبير التي يتمتع بها المدون صاحب البانر.

علي كل حال براء وقّع علي عريضة تفيد أنه لا يجوز "جر" الكلام أو صاحبه للمحكمة.

AbdElRaHmaN Ayyash يقول...

سلامو عليكم
ازيك يابيرو
يارب تكون كويس
أعرفك بنفسي الاول .. انا عبدالرحمن .. المدون الاسلامي اللي صمم البانر ده
اللي انت ممكن تلاقيه في كذا مدونة مش مدونة واحده
:D يا مفتري عاوزني اتحاكم ؟
طيب نتفاهم بهدوء بعد اذنك يا فندم
دلوقتي انا مدون إسلامي . يعني ايه انا اقول مدون إسلامي ؟
هل يعني اني أصلي ركعتين قبل ما ادون ؟
لا و الله يا سيدي
دي معناها اني مدون بعتبر ان الاسلام هو المنهج بتاع الحياة كلها
هو المنهج اللي المفروض نمشي عليه
بكلمة اقرب لنا كلنا ... هو الحل .
انا افرق تماما بين اني اكون مدون اسلامي .. لما اكتب عن السينما اكتب من منطلق اني مسلم فاهم اني لما اكتب عنها لازم انقد نقد يبني و ما يهدمش
:D بس بصراحة عجبتني أسماء الكتب اللي انت مقترحها .. لكن الفكرة اني انا مش هكتب ده ولا حد مننا هيكتب ده
لأن مش ده معنى اسلامي
أقولهالك ببساطة
لو عمنا الفاجومي أحمد نجم قرر انه يكتب فخور بأني مدون يساري ,, مثلا يعني ,, هل حد يقدر يعترض ؟
مقصدش حرية التعبير
أقصد ان ده فكره اللي هو واخده مبدأ في حياته .
عموما .. معنى الاسلامي مش هي الرنه الاسلامية اللي تدخلك الجنة !
ده اسمه ضحك عالدقون ولا مؤاخذه
ولا التليفون الاسلامي و لا الحاجات اللي انا اسف في اوقات ممكن تكون ساذجة وسخيفة اكتر منها مقنعة .
لكن سينما اسلامية .. اه .. عمر المختار بتاع انطوني كوين انا بعتبره فيلم اسلامي من الدرجة الاولى .
و انا لما صممت البانر مش بقسم المدونين ابدا
لكن انا بعلن عن هويتي قدام العالم كله
بقول انا اهه .. مدون .. عارف ان ده طريقي و مش خايف و انا بعلن عنه
و ده اللي خللى الصحفي في الجارديان يكتب عن المدونين الاخوان .
مستر بيرو
انا على ايميلك و ضايفك , ممكن تكون شفتني بدخل باسم عبدالرحمن عياش اونلاين
بس لسه محصليش الشرف و كلمتك
بس واضح انه اول لما اكلمك هتبقى خناقه :D
يللا يا عريس
ربنا يوفقك
وسلامو

غير معرف يقول...

شفتوا بقا ؟؟

آدى آخرة اللى ما يسمعش النصيحة ويوقع على حرية ( سب الدين ) .. ضيع على نفسه فرصة محاكمة ( الفخور بالدين ) .. علشان محدش تاني يتسرع !

غير معرف يقول...

دة أنت كفرت يا ريس

كفرت
كفرت
كفرت

غير معرف يقول...

أنا كنت نسيت أجيب مثل مشهور جدا ومعظمنا يعرفه: عبدالمنعم صاحب مدونة

أنا إخوان

عادي مفيش مشكلة خالص ، وأنا مش إخوان باردو عادي الأولاني هيتحرك ويكتب بناء علي قناعاته المستقاة من الفكر اللي أعلن اقتناعه بيه، والتاني هيكتب نقد كاسح وماسح لما يقوله الأولاني.

أنا مش معاهم باردو كان عنوان كويس لفيلم اتعرض قريب سينمائيا وأنا مشفتوش بفضل الله
----
إلهامي : تعليقك ينفع مدخل لتدوينة شيقة.
التسرع فعلا في الحاجات دي بيخلي الواحد يندم علي بعض المواقف الفكرية السابقة، وقت لا ينفع الندم

غير معرف يقول...

مدون اسلامى يعنى بيحاول يراعى الاخلاق والادب والحياء فى كتاباته اى تطبيق الشريعة الاسلامية وطاعة الله
مش انت اللى كاتب تريقة
عرفت الفرق الكبير بينك وبينهم

غير معرف يقول...

رد على الاخ
AbdElRaHmaN Ayyash
اللى كبسك
ولا انت فالح بس تكتب وتجرى

AbdElRaHmaN Ayyash يقول...

ايه يا اخواننا في ايه
انا والله مش فاهم فعلا ليه كده
عادي جدا .. ده نقاش مفتوح
و مش من عادة براء انه يرد على التعليقات ابدا
ان شاء الله انا ممكن اكتب عندي و لو حب يناقشني مفيش مشاكل
لكن ان الاسلوب يبقى كفرت و حاجات من النوعية دي كتير اوي بجد
ربنا يكرمكم بلاش كده
سلام

غير معرف يقول...

التعليقات كتير يا بيرو و الأغلبية مش فى صالحك معلش أصل الواحد لما يحب حد بجد بيزعل منه بجد أما عن رأى أنا كمان معاهم أصلها كلمة جامدة برضو انا مش إسلامى ليه تنفى عن نفسك نعمة كبيرة فعلا رأيك كان صعب شوية بدون سبب قوى بس المهم سلم على دعاء وربنا يوفقكم

Amr يقول...

مكنتش أحب أرجع هنا تاني، بس اللي بيقول كفرت ولو حتى بهزار فمش مستحب خالص الموضوع يوصل لكدة، لأن بمنتهى البساطة براء مكفرش وفي نفس الوقت الكلمة دي هتتنسب لحد حاطط يافطة فخور بأني مدون إسلامي
على فكرة يا براء، فيه تدوينة عندي بتوضح وجهة نظري عن مصطلح إسلامي، ورغم اني مبحبش أدعو الناس اللي علاقتي بيهم سطحية لقراءة مدونتي بلينكات في الماسنجر أو عبر تعليقات في مدوناتهم، فأنا بس هعمل كدة المرة دي

belal يقول...

يا عبدالرحمن..دا هوا واحد فاضي..قاعد يعلق باسم مجهول
حتى مش مكلف نفسه يكتب ايم ويغيره

...
أنا بيتهيألي ...براء التعبير خانه ..والكلام جر بعضه
مش أكتر
.......

koukawy يقول...

طب انت زعلان ليه
ما هو حر يبقي مدون اسلامي او يبقي فخر هو حر
متنساش ان المدونين كلهم احرار و اللي مش عجبه مدونة حد ميدخلهاش
من غير ما تتنرفز
اوافك مجهول في رأيه

غير معرف يقول...

سلام يا براء
موضوعك دا مالوش اي معنى ولا داعي بصراحة وكمان الكلام في الدين بالشكل ده فيه تخطي للكثير من الخطوط الحمراءوما تنساش حديث الرسول "رب كلمة لا يلقي لها صاحبها بالا تهوي به في النار سبعين خريفا"
انا فاهم قصدك ان الواحد ما يكتبش عن نفسه اسلامي عشان يقدر الواحد يرد عليه من غير ما يحس انه بيهاجم كلمة عظيمة هي الاسلام لكن برضوانت تطرفت بشكل يساري لما قلت كلمة انك فخور بانك مدون مش اسلامي
مش تقيلة شوية حكاية مش اسلامي ديانت كده دخلت الاسلام (كاسم على الاقل وليس باضرورة ان يكون المقصود الدين الاسلامي)في موضوع هو عنه بعيد يعني الرد على الغلط او اللي انت شايفه غلط مايبقاش بالشكل العنيف ده يعني (الكلام يبقى بالراحة انت صوتك عالي كدا ليه) كما قالت نور لعوكل
سلام يا براء

أحمد الدريني يقول...

اله يسامحك يابراء
غمتني
وخلتني اقرا الكلام الاهبل ده تاني
يا اخي اتلم بقي واسكت هي ناقصاك
انا مرارتي اتفقعتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتت

Unknown يقول...

وأنت مالك يا عم براء
أنا كده أسلامي وغيظك أيه
أرتضيت منهج الإسلام حياه .. وأنت مالك

ماأنت مأنتخ دماغك ومكبر الطاسة
معلش على الكالام
بس بلغتك العامية أكلمك

والتاني اللي متغاظ من أسلمة كل حاجة
ده قصر ديل يا أزعر

وفخور ...وفخور...وفخور...وفخور....وفخور....وفخور...وفخور...وفخور....وفخور....وفخور .....وفخور إني مدون إسلامي

karamella يقول...

اوف............وانت مالك ماللي فخور فخور علي نفسه

غير معرف يقول...

للأسف الشديد فوبيا الاسلام إنتقلت من الغرب لتسكن قلوب وافئدة أبناء من هذا الوطن ، فأصبح عندهم حساسية لكل ما يمت أو يرتبط بالاسلام بصلة ، وحرية الرأى عندهم التى تتسع لكل شىء- تتسع للزنا وشرب الخمر- هذه الحرية الزائفة لا يعطون ربعها للمفكرين الاسلاميين للتعبير عن رايهم ، ثم يأتون ويستخدمون معهم أساليب الارهاب الفكرى فهذا إخوانى وهذا وهابى ..الخ من الاسماء التى يحاولون ان يلصقوها بكل مفكر أو كاتب إسلامي، وهم ابدا لا يرضون عن كاتب إسلامي إلا إذا اتبع منهجهم المنحرف فى التلقى والاستدلال ،وها هو جمال البنا المحسوب ظلما على المفكرين الاسلاميين تفتح له الاهرام والمصري اليوم ذراعهيما ليهدم ويخرف كيفما يشاء ، حتى وصل الامر الان ان شخص لا يفقه فى الاسلام كثيراأو قليلا ليجعل من مدونته منبرا للتطاول على شخص ارادة أن يصف تفكيره وكتاباته بالاسلامية فما الذى يغيظه ؟ إن الانتساب للإسلام شرف كبير والتمسح بهذا الاسم لهو الفضل والمنه من الله تبارك وتعالى على صاحبه ، فإذا اراد اى شخص ان يعالج قضايا مجتمعة السياسية والاقتصادية والتعليمية من منظور إسلامي ، ما الذى يغيظك أو يضايقك فى هذا الامر ، الاسلاميون عندما يرفعون شعار الاسلام هو الحل تقوم عليهم الدنيا لكن الماركسيون عندما يقولون الماركسية هى الحل أو الليبراليون عندما يقولون الليبرالية هى الحل لا يكلمهم احد ، كنت اود أن يوفر صاحب المدونة جهده وقلمه فى محاربه الافكار الهدامه التى يواجهها مجتمعنا والتغريب الذى يحدث للمجتمع لا ان يفرد موضوعا للرد على شعار إسلامي اتخده صاحبه لنفسه ، ولا حول ولا قوة إلا بالله

omar alaa يقول...

مواطن حر
عم براء خف تعوم
التدوين معلهوش جمارك
ثم انه من حقه يكيب ولا احنا بنيجي علي الجماعه دول ولسانه بيطول
ثم انك من حقك تكتب انك لا اسلامي ولا ليك في الدين برده مش عيب
كفايه كده لحسن تزعل
مواطن حر وسلام

محمود الدوح يقول...

انا اتنرفزت
بس لحاجة
ودعوة هدعيهالك

ربنا يجعلك مش اسلامى

ولا بلاش
ربنا يهديك

غير معرف يقول...

أنت فعلا رخم
وشكلك حاقد على الإسلام..
إيه التفاهة دي يا باشا
يعني قال مثقف وحر وإلخ
ولما يتعلق الأمر بمدون إسلامي
اعتبرته مش من حقه
أنت واحد رخم
تخين ورخم

اميرالعذاب يقول...

السلام عليكم ...
بصراحة انا مش عارف شو بدي احكي
بس برضو انتا رجعت وطبقت الانتقاد الي انتا انتقدتو في موضوعك
في الاول اتنرفزت من الاخ الي حاطط بانر انو مدون اسلامي وبقول يعني حيكتب في الاسلام والحجات دي وفي اخر موضوع رحت وعملت نفسك مدون مش اسلامي طيب بردو يعني ايه حتكتب في كل شي وحتبعد عن الدين
عموما انتا ناقدت نفسك
بتمنالك حياة سعيدة
اخوك ابو عدنان الفلسطيني
غزة

محمد صالح يقول...

لماذا تكون الحرقة والنرفذة مع كلمة مدون اسلامى لكن مدون شيوعى ماشى مدون علمانى مفيش مشاكل مدون شاذ وايه يعنى لكن اسلامى لا عيب أصل الاسلام بيعض
وبعدين ناس اللى بتقول الاسلام أسمى من ان يرتبط باشياء دنيوية يا أخى الاسلام فعلا أسمى لانه مرتبط بحياة المسلم فوضع القيود التى يسير عليها فى كل شىء ةكل لحظة يعيشها والدليل
قال تعالى : قُلْ إِنَّ صَلَاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ (الأنعام:162)
يعنى الاسلام يحكم كل كبيرة وصغيرة فى حياة المسلم لكن ليس كل مسلم بل المسلم الحقيقى