يا أسكندرية.. بحرك ناداني..
رايح هناك شوية.. هسيب القاهرة واللي فيها وأنطلق..
دي بجد أول أجازة أخدها في حياتي.. وأول مرة أسافر فيها مع دعاء بعد الجواز (نظراً لإننا معملناش شهر عسل)..
لأول مرة أنفض نفسي من القاهرة كدة..
هنطلق النهاردة باليل ومش عارف هرجع أمتى..
عارف إني يمكن أترفد من شغلي.. وإن يمكن حاجات كتير تتعطل..
بس لما أترفد من الشغل أحسن من لما أترفد من الحياة..
في إنتظار اقتراحاتكم بالنسبة للأماكن اللي ممكن تراح هناك.. ونفسي طبعاً ألاقي أصحاب أقابلهم هناك..
إدعولي..
هناك 17 تعليقًا:
أمممممم..يا بختك.
شوف يا سيدي..لازم تاكل طبعاً من عند جيلاتي عزة أو الصعيدي ..عزة فيه فرع منه جنب القلعة والتاني قبلها عند محطة الأتوبيس ..، و الطعم مش هقول لك..لو كلت عند اللي عند المحطة خش شمال من جنبها في تاني ناصية يمين هتلاقي قدورة بتاع السمك في أول فرع عمله ف حياته..اختار السمك بنفسك و خليهم يشووه سنجاري، وعيش حياتك مع السبيط بس المهم ما تروحش هناك بأقل من 200 جنيه..بعد كده اخرج قربع قزازة حاجة ساقعة والحق صلاة العشا في المرسي ابو العباس اللي هو بعده بمحطة ترام 14 بتاع راس التين..أخرج من المرسي وامشي يمين من على الكورنيش لحد ما توصل لميدان المنشية..حابب تتصور ماشي ويكون ده عند النصب التذكاري اللي هناك .. حابب تاكل برضو - حاكم انا عارفك طفس - روح عند محل أحمد حسنين بتاع الهريسة و هاتلك منه علبة كيلو ببتاع 7 جنيه و تكون بالمكسرات و الزبيب..وخد معاك شنطة لأنم مش هتلاقي عنده شنط و أغلب الظن انك هتشتري من الكشك اللي جنبه شنطة بربع جنيه لأن دي أقل حاجة عنده.طبعاً دعاء هتقول لك كفاية كدة أكل يا بيرو..إوعى تعترض، ولو عايز تاكل تاني ممكن تبتزها بإنك تقول لها انك هتوديها زنقة الستات اللي هي لو مشيت على نفس الصف و دخلت من بعد ابو ربيع يمين ومشيت بتاع خمس دقايق اسال عليها هيقولولك اهه..أغلب الظن بكرشك ده مش هتعرف تخش..تمام زي حالاتي،لذلك ادي للمدام الفلوس وسيبها قد يومين وارجع هتلاقيها لسة ما خلصتش، و الإفيه الكبير انك في النهاية هتلاقيها جايبة بتاع 356 توكة لكل القرايب و الجيران و الاخوات ويمكن لكفر الشيخ كلها.وطبعاً هتقول لك ان نصهم لاخواتك البنات عشان تخليك تشعر بتأنيب الضمير لو قلتلها : مش كدة كتير، وساعتها عينك هتدمع لأنك اسأت الظن بيها بينما هي بتفكر ازاي تهادي اخواتك البنات.المهم بعد كده خدها و روحو على محطة الرمل..يا سلاااام على محطة الرمل..هتقفوا طبعاً عند كل بتوع الجرايد اللي هناك، وبعدها هتخشوا الشارع اللي هو شبه شارع شريف بالظبط..هتمشي من صف و ترجع من الصف التاني وهتلاقي نفسكم جعتم..عليك يا معلم وعلى جاد..خد من عنده ساندوتش أي حاجة بحرية من غير ما تفكر واتحسر على فرع مصر اللي بيحطولك فيه عينات..كفاية كده النهاردة عشان انا جعت
عزيزى الأستاذ البراء لا أعلم هل هو من حسن حظك أم من حسن حظى أن
شاهدتك فى برنامج العاشرة مساءاًاول أمس
، لكن المهم يا معلم إن أننا إسكندرانى بعتنى القدر ليك
_______________
بص يا معلم نصائح أبو عمر تمام ،
لكن ضيف ليها شرب العصير
بص
أبو عمر قال
..أخرج من المرسي وامشي يمين من على الكورنيش لحد ما توصل لميدان المنشية
__
و انت ماشى حتلاقى محل عصير اسمه القبيصى و ده ماقولكش عليه خطير خطير خطير خطير عنده عصير مانجه انما ايه
_______
غير كده عندك محل كلاسيك
بتاع الحلويات لو عايز تحلى يعنى بس هو عادة مشهور بالتورت و الجاتوه .
____________
عندك شارع بقى اسمه شارع سعد زغلول ده بقى تخشله من عند الجندى المجهول حتعدى حتلاقى موقف المشاريع بعديه بشوية حتلاقى صيدلية اسمها محمود بعدها بشويه حتلاقى كشك مرور ساعتها خش يمين ،
هناك بقى فيه محل اسمه حلويات مصر يا مان مقولكش
اضرب واحد أيس كريم سوفت ب 2 جنيه و مقولكش
بس لو حتأخذ سوفت خد يا شيكولاته و لبن يا لبن بس عشان اللى بالفراولة أو المانجه عباره عن لو صناعى ،
و ممكن بنفس السعر تضربلك أيس كريم بسكوت البولة مشكلة و مخدومه ده غير الرز بلبن و غيره .
!
____
على فكره فيه فى بحرى(ناحيه القلعة) أشهر محل بيعمل كسكسى فى اسكندرية و هو الشيخ وفيق
_______
نصائح هامه :
1- لو غاوى تصوير بلاش تصورى عيال فى الشارع عشان ممكن يحصلك زى اللى حصل لهانى سلامة فى فيلم حالة حب .
2- من أول سنترال المنشية لحد محطة الرمل المنطقه ملبشه أمن عشان العيال اللى بيفرشوا فى الشارع و عشان فندق متروبول اللى فيه أجانب .
3- لو ناوى تضربلك كابتشينو عند البن البرازيلى اللى جنب الفندق اعمل حساب الفلوس عشان الكافيه اسعاره حلوة !
_______
و سلام يا معلم
و رحلة سعيدة
_______
و أهلا بيك فى بلدك التانى إسكندرية
, ان كل الاماكن الى اتقالك عليها, كلها اكل. جوعتونى حرام عليكوا
بس برضه اسكندرية مش كلها اكل,
يعنى لو عايز اماكن بقى تروق نفيك فيها بص يا سيدى
طبعا اولها البحر, عليك و على ميامى او المنتزة
لو عايز رحلة سياحية
الصبح بدرى كده, اركب الترام الجديد السياحى الى عملوه جديد و التذكرة بتاعته بجنية
اركب و اتمخطر لحد محة الرمل, انزل هناك, و اتمشى لحد محطة مصر. و من هناك اتفرج على المحطو الميدان, بعدين جنب المحطة حود على مدرج كوم الدكة ( الملقب بلامسرح الرومانى) اتفرج عليه شوية و بعدين اركب الترام الاصفر, متعه و اعمل نفسك سايح بقى ة بتاع اشترى شيكولاته و عصير و ابتسم و انت راكبه, و قل الكمسارى انك عايز تنزل عند عمود السوارى
انزل هناك و اتفرج على العمود و الانفاق, و اوعى تنسى تدخل الصهاريج, صحيح فى الحر ده هتبقى الرطوبه عاليه قوى فيها, بس بجد تجربة حلوه قوى, انك تمشى فى انفاض ضيقه و ضلمة كحل, و فجأه تلاقى نور جلى من فوقك,,, جرب و ادعيلى
خلصنا من عمود السوارى, امشى فى الشارع الى جنبه لحد ما توصل لمقابر كوم الشقافه.. بجد المعمار هناك روعة , يجنن
فى كمان بقى متحف اسكندرية القومى, وده كويش برضه طرق العرض و المعروضات فيه تجنن, و عملين هناك نموذج من مقبرة فرعونيه , احساسها عالى قوى, و هو موجوده فى اول شارع فؤاد
طبعا ما تنساش تتمشى فى شارع فؤاد و تتفرج على المععمار الى هناك, و تحس بروح الماضى الجميل
اخر شارع فؤاد العطارين و سوق النحاسين, يا سلاااااااام تجنن
لو عندك يوم كمان عايز تقضيه كده فى الرواقه
عليك و على المنتزة, مش مياه و بلبطة
لاء
اعملها رحلى خلويه, مفرش كاروهات على النجيلة و اقلع الجزمة و مدد على الزرع و اتفرج على البحر
سندوتشين فى السريع و لعب و تنطيط
تجنن
نروح النص التانى من اسكندرية, القلعة بس ماتدخلس متحف الاحياء المائية هتلاقى احواض فاضية, بس اتمشى على البحر هناك و ترمس و حرنكش و فى مراكب بتتأخر تاخدلك لفه فى اللسان تمام, و فى كمان من قدام عزة مراكب الصيد ممكن تتأجر بس حلى بالك بطريقه غير شرعيه, يعنى مش مسمحلوهم بيها, بس ممتعه اكتر من مراكب القلعة. يا سلام بقى لو عرفت تدخل نادى من النوادى الى قدام القلعة, نادى الصيد ولا النادى اليونانى, بس اسهلهم نادى اعضاء هيئه التدريس, هتشوف منظر روعه, قدامك اسكندرية كلها و مراكب الصيد وصوت البحر, احساس تانى خالص
كفايه عليك كده ولا عايز تانى؟؟؟
لو عملت كل ده, انا اقدر اقولك بقلب جامد انك شوفت اسكندرية بحق
كل سنة و انت طيب يا بيرو
انا مش من اسكندرية فمش هقدر افيدك
لكن بجد انا مش عاوزك اصلا تفتح كمبيوتر عشان تشوف المدونة
ريح اسبوع .. بدون اي اتصال بالدنيا
بس
لازم تاكل عند بلبع و كمان عند المرسى ابوالعباس مطعم سمك جامد اخر حاجه واسمه عروسة البحر و يارب تكون اجازه سعيد
ريهام
عندك اخطاء املائية
براء
لما ترجع من الأجازة الي كلها اكل دي..ولما تهدى و ترتاح كده..ابقى شقر على حملة معا ضد الكيف..الي موجودة عند صاحب البوابة هتلاقي التفاصيل هنا
www.elbawaba.blogspot.com
انتا واد بضااااااااااااااان كبير
bgad el sewar dy 7elwa awy...enta 5adt roo7 alex bel 3adasa w 7atetha fel blog...
اولا ... لو عايز مكان تحس فيه فعلا انك فى الاسكندرية
روح الكشافة البحرية ..و قضى هناك 3 ايام غاية فى الروعة
و متنساش تاكل فطيرم ن هناك روعة بس خلى بالك
من بحرى و بناتبحرى المزز للركب يعنى هتغرق
بيبو - محمد ممتاز
افضل كاتب تعليقات فى الدنيا
السلام عليكم
دي أول مرة اعدي على المدونة بتاعتك عشان انا شفت تسجيل حلقتك في العاشرة مساء وبصراحة اكتر حاجة شدتني اني ادخل هي عنوانها...
انا اسمي احمد من القاهرة وحاليا في الرياض :(
مش هاطول عليك عشان انا عارف انك هتسافر اسكندرية يلا يا عم هيص وعيش براحتك ... وفكرتني بشهر العسل بتاعي من سنتين كان في اسكندرية برده
لو عاوز اكلة سمك في الحنين ابقى انزل شارع القهوتين في بحري هتلاقي فيه محل اسمه جزيرة الملكة عيش فيه يا باشا وادعي لي
سلام وابقى اقابلك تاني على المدونة.
حبيبى تنور اسكندرية
لو احتجت حاجه متترددش
أتصل بيه
0100948439
ماشى
أخوك أسكندرانى
عيشوا حياتكوا
الشغل ملحوق عليه
نسيتم جيلاتى مكرم اقدم محل جيلاتى فى بحرى مكوناته كلها طبيعيهياه على طعمه جربه وقلى رايك
فين جيلاتى مكرم ده وصاحبه مين
dah blog fih amaken ketir fy alex momken tero7ha www.alexyouth.blogspot.com
dah blog fih amaken ketir fy alex momken tero7ha www.alexyouth.blogspot.com
إرسال تعليق