زي

1

زي ما أكون حاسس..

إنك وحشاني..

بس بجد..

في فرق كبير

بين الإحساس اللي بحسه زمان..

وإحساسي دلوقتي بإني..

زي..

ما أكون..

حاسس!

2

زي القمر إنتي

طول عمري أكره البنت اللي يقولوها كدة..

لإن مفيش بنت زي القمر..

ولإن القمر.. ملوش.. زي!

3

عايزنا نرجع زي زمان

قول للزمان.. إرجع يا زمان

4

بتحبها..؟؟

حاجة.. زي كدة!

5

صباحك زي الفل

بقيت بكرهها قوي..

صباحك فل.. أحلى

6

- عايزين فيلم زي ده..

حاضر

...

- إيه رأيكم في الفيلم.. ؟؟

حلو.. بس مش زي ما كنا عايزينه!

7

حاول توصفلي..

زي إيه كدة..

لا لا لا..

ده شيء..

ملوش زي

8

بني آدم عادي..

زينا كلنا..

بس الشيء اللي لازم نلاحظه..

إننا كلنا..

مفيناش واحد زيه..


..........................

+ لمواجهة طوفان "الغلاسة" الذي اشتم رائحته وأنا أكتب.. ما سبق لا هو شعر ولا ينبغي أن يكون.. وبالنسبة لي.. فإن ما له علاقة بكتابة الشعر داخلي قد "قتل" من زمان!