سوليتير!

- وإمتى تعرف – يا فالح – أنك وصلت للحالة دي..؟

- عايز الحق ولا ابن خالته.. هقولك من غير تريقة.. لما أسيب الدنيا كلها.. وأقعد قدام اللاب توب.. أسيب كل الأفلام اللي عليه.. مسمعش عليه أي أغاني من أي نوع.. أرمي السي دي مان على جنب رغم إن فيه اسطوانة جديدة فيه أغاني بحبها.. وأقعد في الأوضة البرد اللي أنا عارفها كويس.. اللي بروحها كل سنة وأنا بمتحن.. أوضة رقم 2.. اللي في الدور الثاني بفندق الياسمين عند بنزايون في قنا.. هناك.. بقفل النور.. وأتغطى كويس.. وأحط اللاب توب على رجلي.. وأقعد ألعب.. سوليتير!

- ياه.. ده أنت مكتئب قوي على كدة.. ده أنا يا ابني معرفش دي حتى بتتلعب إزاي..

- ولا أنا !!

..............................

* حمص شام.. قدام سينما جلاكسي..

دعاء : على فكرة بقى.. مش منطقي تماما إنك تبقى في الحالة دي في كل مرة نخرج فيها من السينما.. عادي يعني يا براء.. هييجي يوم وهتعمل أفلام أحلى من دي.. وهنروح نتفرج عليها سوا.. بلاش بقى الإكتئاب ده..

أنا : عندك حق.. بس ده ميمنعش إن الفيلم ده تافه قوي.. وإن الورشة بتاعتنا – اللي فشلت – تقدر تعمل أفلام أحسن منه 100 مرة..

دعاء : حقك عليا.. أنا مقتنعة والله.. بس أكيد اللي كتب الفيلم ده أكبر منك بعشرين سنة وتعب قوي على ما عرف يعمل أفلام سينما.. صدقني..

أنا (في سري) : والله إنتي لا مقتنعة ولا حاجة.. تلاقيكي بتقولي كدة عشان أعزمك على حمص الشام قدام سينما جلاكسي زي ما كنا بنعمل زمان.. ماشي يا دودو.. مش عازمك!

دعاء : مش هتعزمني بقى على حمص الشام

أنا : الراجل قافل..

أقترب منها وأحيطها بذراعي لعلها لا تراه وتكشف كذبتي.. نمر بجوار سيارة الراجل بتاع حمص الشام.. ينظر لي صاحبها في تودد..

الراجل : أيوة حمص حمص حمص.. تشرب حمص يا باشا.. حمص يا آنسة...

.....................................

* ليلة العيد الصغير.. شوارع وسط البلد..

دريني : صدقني كمان كام سنة.. هدخل الشركة بتاعتنا – اللي لسه متعملتش- واسأل السكرتيرة في تناكة، "في حد في مكتب براء؟؟".. تقولي لأ،.. فأدخل أنا أجيب ورق مهم من مكتبك عاشن عندنا اجتماع مع شركة كبيرة هتشتري مننا أفلام احنا اللي بنعملها..

أنا : صدقني أنت، لو فضلنا على حالنا، كمان كام سنة برضه، هفضل قاعد معاك أنت ومصعب وفؤاد وندا على البورصة.. ولو معانا فلوس يمكن نقعد في سيلانترو.. نحكي سوا على الأفلام اللي بنحبها.. ونفسنا نعمل زيها.. ونتفرج على حلقات جديدة مشفنهاش من سيت كوم أجنبي.. وتمصمص شفايفك يا دريني وتقول.. أما السيت كوم ده فن عظيم.. أمتى بقى نعمل سيت كوم.. ونعمل شركة كبيرة.. أدخل أنا من بابها.. واسأل السكرتيرة في تناكة، "في حد في مكتب براء؟؟".. تقولي لأ.....

.............................

* أمام سينما مترو..

أنا : بذمتك.. لو كان عمل المشهد اللي بقولك عليه.. القاعة كانت هتبقى عاملة إزاي..

فؤاد : كان في ناس هتنتحر من الضحك..

أنا : الله يرحمهم..


..........................

***** : وإيه رأيك في الفيلم..

أنا : هايل طبعا يا أستاذ

(في سري) : فيلم إيه يا ابن الـ........

* مقصدش حد بعينه!

..........................

أنا : قولي طيب.. بذمتك مش مفروض حد ابن حلال يمسك ورقة وقلم دلوقتي حالا يكتب فيلم عن صدام حسين..

دريني : يبقى سافل اللي يعملها والله...

أنا : طيب "ما تيجي" نعمله..

دريني : تاني "ما تيجي".. يا ابني طول ما احنا عايشين بطريقة "ما تيجي" دي مش هنعمل أي حاجة..

..........................


أمي : عايز تعمل مسلسل سيت كوم لوحدك.. وأنت كل رصيدك في الكتابة حلقة واحدة في "تامر وشوقية" منزلش عليها اسمك..

أنا : لا يا ماما مش عايز أعمل حاجة.. اقفلي الباب والنور.. وصحيني الصبح.. أروح الشغل أكتب موضوعات وأقبض 75 جنيه على الموضوع.. وأبوسهم قبل ما أبوس إيدي وش وضهر..

.......................

أنا : هي أغنية جديدة لمحمود العسيلي.. كلماتها بتقول..

"طول عمر حياتك مشغولة..

ومليانة بالناس..

قدرت أوصلك رغم كل الناس اللي بيحاوطوكي..

وخليتك تحبيني..

يا خسارة زي أخوكي..

وكان صعب عليا أخسرك لما أصارحك بالحقيقة..

وكان صعب اللي بنيته في سنين يروح في دقيقة"..

هو : وبعدين..

أنا : عندي ليها حتة سيناريو لفيديو كليب تحفة ليها.. بص هو هيبقى بـ...

هو : يا عم روح.. أنت مصدق نفسك ولا إيه..

..........................

* لسه بدري!!

المدير : وأنت بقى يا براء مواليد سنة كام..

أنا : 85

المدير : كام؟؟

أنا : 1985

المدير : ياه.. لسه بدري قوي..

أنا (في سري) : على إيه!!؟
........................

هم : أنت شبهه قوي لما كان صغير.. حاول تخليه قدوتك..

هو : بتفكرني نفسي وأنا صغير..

هو (واحد تاني) : شغلك ومرتبك وحجمك مناسبين جدا لسنك.. بلاش طموحك يسبق سنك.. اللي أنت سامعه ده مش صوتي.. ده صوت العقل يا براء..

هو (واحد تالت) : كل المراحل دي أنا مريت بيها وأنا صغير في سنك.. وأنت هتمر بيها لإننا من نفس البرج..

هو (واحد رابع) : أنا بشوف فيك مراهقتي.. مسيرك تعقل وتكبر وتبقى طبيعي..

هو (واحد خامس) : بلاش تحاول تكتب رواية دلوقتي.. أنت لسه صغير..

أنا : بقيت بفكركم بنفسكم لما كنتم صغيريين.. بس ولا واحد منكم بيفكرني بنفسي لما أكبر..

.......................

هو : نفسك تبقى زي مين لما تكبر؟؟..

أنا : ولا حد!

.....................

* يوم ما اتعملت السوليتير..

داليا (البنت اللي علمتهالي) : أجمد حاجة في السوليتير.. لما ترتب الورق كله صح.. ساعتها بس.. كل الورق هيتلخبط تاني من جديد.. وينزل قدامك على الشاشة شكل لطيف.. كدة زي ما أنت شايف.. أنا بحب السلويتير عشان اللخبطة دي..

أنا : يعني أنا أقعد أرتب وأنظم وأهندس وأفكر.. وييجي البيه الكومبيوتر في الآخر ويلخبطهم تاني.. يع!

........................

"لو مقدرتش تضحك.. مدمعش.. ولا تبكيش".. صلاح جاهين..

واللي ما يقدرش يبكي كمان يا عم جاهين.. يعمل إيه بس!