الاثنين، يناير 08، 2007

سوليتير!

- وإمتى تعرف – يا فالح – أنك وصلت للحالة دي..؟

- عايز الحق ولا ابن خالته.. هقولك من غير تريقة.. لما أسيب الدنيا كلها.. وأقعد قدام اللاب توب.. أسيب كل الأفلام اللي عليه.. مسمعش عليه أي أغاني من أي نوع.. أرمي السي دي مان على جنب رغم إن فيه اسطوانة جديدة فيه أغاني بحبها.. وأقعد في الأوضة البرد اللي أنا عارفها كويس.. اللي بروحها كل سنة وأنا بمتحن.. أوضة رقم 2.. اللي في الدور الثاني بفندق الياسمين عند بنزايون في قنا.. هناك.. بقفل النور.. وأتغطى كويس.. وأحط اللاب توب على رجلي.. وأقعد ألعب.. سوليتير!

- ياه.. ده أنت مكتئب قوي على كدة.. ده أنا يا ابني معرفش دي حتى بتتلعب إزاي..

- ولا أنا !!

..............................

* حمص شام.. قدام سينما جلاكسي..

دعاء : على فكرة بقى.. مش منطقي تماما إنك تبقى في الحالة دي في كل مرة نخرج فيها من السينما.. عادي يعني يا براء.. هييجي يوم وهتعمل أفلام أحلى من دي.. وهنروح نتفرج عليها سوا.. بلاش بقى الإكتئاب ده..

أنا : عندك حق.. بس ده ميمنعش إن الفيلم ده تافه قوي.. وإن الورشة بتاعتنا – اللي فشلت – تقدر تعمل أفلام أحسن منه 100 مرة..

دعاء : حقك عليا.. أنا مقتنعة والله.. بس أكيد اللي كتب الفيلم ده أكبر منك بعشرين سنة وتعب قوي على ما عرف يعمل أفلام سينما.. صدقني..

أنا (في سري) : والله إنتي لا مقتنعة ولا حاجة.. تلاقيكي بتقولي كدة عشان أعزمك على حمص الشام قدام سينما جلاكسي زي ما كنا بنعمل زمان.. ماشي يا دودو.. مش عازمك!

دعاء : مش هتعزمني بقى على حمص الشام

أنا : الراجل قافل..

أقترب منها وأحيطها بذراعي لعلها لا تراه وتكشف كذبتي.. نمر بجوار سيارة الراجل بتاع حمص الشام.. ينظر لي صاحبها في تودد..

الراجل : أيوة حمص حمص حمص.. تشرب حمص يا باشا.. حمص يا آنسة...

.....................................

* ليلة العيد الصغير.. شوارع وسط البلد..

دريني : صدقني كمان كام سنة.. هدخل الشركة بتاعتنا – اللي لسه متعملتش- واسأل السكرتيرة في تناكة، "في حد في مكتب براء؟؟".. تقولي لأ،.. فأدخل أنا أجيب ورق مهم من مكتبك عاشن عندنا اجتماع مع شركة كبيرة هتشتري مننا أفلام احنا اللي بنعملها..

أنا : صدقني أنت، لو فضلنا على حالنا، كمان كام سنة برضه، هفضل قاعد معاك أنت ومصعب وفؤاد وندا على البورصة.. ولو معانا فلوس يمكن نقعد في سيلانترو.. نحكي سوا على الأفلام اللي بنحبها.. ونفسنا نعمل زيها.. ونتفرج على حلقات جديدة مشفنهاش من سيت كوم أجنبي.. وتمصمص شفايفك يا دريني وتقول.. أما السيت كوم ده فن عظيم.. أمتى بقى نعمل سيت كوم.. ونعمل شركة كبيرة.. أدخل أنا من بابها.. واسأل السكرتيرة في تناكة، "في حد في مكتب براء؟؟".. تقولي لأ.....

.............................

* أمام سينما مترو..

أنا : بذمتك.. لو كان عمل المشهد اللي بقولك عليه.. القاعة كانت هتبقى عاملة إزاي..

فؤاد : كان في ناس هتنتحر من الضحك..

أنا : الله يرحمهم..


..........................

***** : وإيه رأيك في الفيلم..

أنا : هايل طبعا يا أستاذ

(في سري) : فيلم إيه يا ابن الـ........

* مقصدش حد بعينه!

..........................

أنا : قولي طيب.. بذمتك مش مفروض حد ابن حلال يمسك ورقة وقلم دلوقتي حالا يكتب فيلم عن صدام حسين..

دريني : يبقى سافل اللي يعملها والله...

أنا : طيب "ما تيجي" نعمله..

دريني : تاني "ما تيجي".. يا ابني طول ما احنا عايشين بطريقة "ما تيجي" دي مش هنعمل أي حاجة..

..........................


أمي : عايز تعمل مسلسل سيت كوم لوحدك.. وأنت كل رصيدك في الكتابة حلقة واحدة في "تامر وشوقية" منزلش عليها اسمك..

أنا : لا يا ماما مش عايز أعمل حاجة.. اقفلي الباب والنور.. وصحيني الصبح.. أروح الشغل أكتب موضوعات وأقبض 75 جنيه على الموضوع.. وأبوسهم قبل ما أبوس إيدي وش وضهر..

.......................

أنا : هي أغنية جديدة لمحمود العسيلي.. كلماتها بتقول..

"طول عمر حياتك مشغولة..

ومليانة بالناس..

قدرت أوصلك رغم كل الناس اللي بيحاوطوكي..

وخليتك تحبيني..

يا خسارة زي أخوكي..

وكان صعب عليا أخسرك لما أصارحك بالحقيقة..

وكان صعب اللي بنيته في سنين يروح في دقيقة"..

هو : وبعدين..

أنا : عندي ليها حتة سيناريو لفيديو كليب تحفة ليها.. بص هو هيبقى بـ...

هو : يا عم روح.. أنت مصدق نفسك ولا إيه..

..........................

* لسه بدري!!

المدير : وأنت بقى يا براء مواليد سنة كام..

أنا : 85

المدير : كام؟؟

أنا : 1985

المدير : ياه.. لسه بدري قوي..

أنا (في سري) : على إيه!!؟
........................

هم : أنت شبهه قوي لما كان صغير.. حاول تخليه قدوتك..

هو : بتفكرني نفسي وأنا صغير..

هو (واحد تاني) : شغلك ومرتبك وحجمك مناسبين جدا لسنك.. بلاش طموحك يسبق سنك.. اللي أنت سامعه ده مش صوتي.. ده صوت العقل يا براء..

هو (واحد تالت) : كل المراحل دي أنا مريت بيها وأنا صغير في سنك.. وأنت هتمر بيها لإننا من نفس البرج..

هو (واحد رابع) : أنا بشوف فيك مراهقتي.. مسيرك تعقل وتكبر وتبقى طبيعي..

هو (واحد خامس) : بلاش تحاول تكتب رواية دلوقتي.. أنت لسه صغير..

أنا : بقيت بفكركم بنفسكم لما كنتم صغيريين.. بس ولا واحد منكم بيفكرني بنفسي لما أكبر..

.......................

هو : نفسك تبقى زي مين لما تكبر؟؟..

أنا : ولا حد!

.....................

* يوم ما اتعملت السوليتير..

داليا (البنت اللي علمتهالي) : أجمد حاجة في السوليتير.. لما ترتب الورق كله صح.. ساعتها بس.. كل الورق هيتلخبط تاني من جديد.. وينزل قدامك على الشاشة شكل لطيف.. كدة زي ما أنت شايف.. أنا بحب السلويتير عشان اللخبطة دي..

أنا : يعني أنا أقعد أرتب وأنظم وأهندس وأفكر.. وييجي البيه الكومبيوتر في الآخر ويلخبطهم تاني.. يع!

........................

"لو مقدرتش تضحك.. مدمعش.. ولا تبكيش".. صلاح جاهين..

واللي ما يقدرش يبكي كمان يا عم جاهين.. يعمل إيه بس!

هناك 11 تعليقًا:

محمد السيد..مش حاسكت يقول...

آآآآآآآآآآآآه يابلد ...

ليه بس يا ابني .. الحاجات الوحشة دي ؟؟

هي ناقصاك ؟؟

مش كفاية الامتحانات ... والمستقبل الجميل .. والهم ده كله ؟؟؟

الكبار دول ... الواحد نفسه ياخدهم كلهم ويحطهم في مركب كبير في عرض المحيط .. ويقعد ينفخ ينفخ ينفخ ... لغاية ما يبقوا في وسط المحيط ويبطل نفخ ساعتها ...
ويروح ويسيبهم ...

استحمل يا سيدي .... حنعمل كل حاجة بنفسنا ... قريب أوي

مُصْعَب إِبْرَاهِيم يقول...

مجرم كالعادة..

واحشني يا براء

ام مليكة يقول...

والنبي قطعت فلبي من الضحك والحزن في نفس الوقت انت هتفضل كده على طول مش عايز تبطل تفكير ولا ثانية حرام عليك نفسك يااستاذي العزيز عامل جرد لحياتك وانت في قنا ماشي ياعمنا كل ما احس اننا اخر السنة ابعتك هناك عشان الجرد يطلع كبيرررررررركده
ايه يابيرو مالك كبر دماغك اللي قالها مكذبش بصراحة وبعدين ايه موضوع حمص الشام ده ماشي ياجوزي طيب انا هاشهد عليك صحابك وحبايبك هنا ينفع يعني ميعزمنيش على حمص الشام وانا كل ما نمشي في ميدان الجيزة اشتري له لب ابيض وسوبر كمان؟؟؟

ام مليكة يقول...

معلش يا حبيبي انا مش عارفه اعمل ايه عشان تفرح بس من فضلك بلاش تزعل وحياتي عندك انا مش عارف انام من يوم ما سافرت وقلقانة قوي عليك مش من المذاكرة خالص انا قلقانة على نفسيتك بس ان شاء الله هتكون كويس وهترجع كلك حماس وتعمل كل اللي نفسك فيه في التوقيت اللي انت عايزة سيبك مني ومنهم وخليك في نفسك

بحبك..........وحشتني ........قوي قوي قوي

غير معرف يقول...

بص يا سيدي..
ابتدي اكتب في كل إلي انت عايزة..سيناريو ..شتيمة ..خواطر
قول إلي في نفسك..بس بين نفسك ونفسك..ومتصرحش لحد عن احلامك..متصرحش..نفذ احلامك من غير ما تقول لحد..من غير ما تستهلك احلامك في كلام...اعملها على الارض "الواقع طبعاً"..الاحلام طبعاً مش حاجة تاني ..ابتدي

على فكرة انا اكبر منك بسبع سنين...ووقعت في نفس إلي انت عمال لامؤخزة تبعبع بيه ده..بس صدقني..ابتدي من غير كلام

لأن الكلام بيستهلك الاحلام !!

salahalden_eng@hotmail.com

Abd El Rahman Magdy يقول...

ليه الحزن ده والله يا ابني ما تستاهل، وبعدين صحيح إنت ليه تتكلم كتير؟؟؟
أقصر الطرق لإنجاز العمل إنك تتكلم قليل وتشتغل كتير....
مستنيين مشاريعك

غير معرف يقول...

ايه يا عم براء.. وحد الله
طب اقولك خبر حلو هايفرحك..؟ تقض على الظابط بتاع قسم بولاق ::بتاع العصاي:: وكمان وائل عباس و دماغ ماك عامليين حملة جامدة عشان نفضح الباشا وانا مشارك فيها على قدى
طب اقولك خبر هايضحكك شوية وبعدين يبكيك .. اتحكم على عماد- االى اغتصبوه فى القسم بالحبس 3 شهور لمقاومة الشرطة اثناء الاعتقال..
لاااااااااااا تعليق

غير معرف يقول...

براء..
أنت رائع.!..
بوست أجمل منه مفيش..و يمكن بقول كده لإنه جه فى وقت حلو بجد و فى الجون..
الله يفتح عليك
.
شقلوطة

Haitham Abu Akrab يقول...

عندي ليها حتة سيناريو لفيديو كليب تحفة ليها.. بص هو هيبقى بـ...
---------------------------------
واضح ان ابمشكله مش في اننا نحقق احلامنا


المشكله الاكبر اننا نلاقي حد
يسمعهـــــــــــــــــــا

Abdallah kamal يقول...

انا البوست ده قريته اول مانزل فعلا اثر فيا والله كنت هعيطلك انت عارف لما تلاقيها مقفله من كل ناحية وكل اما تيجى تعمل حاجة انت فعلا بتحبها متعرفش
لحد ماتلاقى نفسك بتدرس فى كليه مبتطيقش اسمها وعايش حياة مفيهاش ولا حاجة بتحبها
ساعتها بيبقى حلك الوحيد انك تخطف شوية من اللى انت معرفتش تحققهم فى احلامك
تقول انا بس لو كنت وتعيش شوية مع الحلم ده
فعلا عمار يامصر

خدمات متميزة يقول...

نقدم لكم عملائنا الكرام افضل شركة تنظيف ومكافحة حشرات بالمنطقة الشرقية والتي من خلالها تستطيعون الحصول علي افضل خدمات التنظيف الشاملة لجميع اركان المنزل فمع شركة المثالية للتنظيف انتم دائما في امان فتعد شركة المثالية للتنظيف بالقطيف افضل شركة متخصصة في تنظيف المنازل والشقق والفلل والمجالس والبيوت والكنب والسجاد والمفروشات بالقطيف وكذلك بجميع مدن ومحافظات المنطقة الشرقية بالمملكة العربية السعودية , تعتمد شركة المثالية للتنظيف بالقطيف علي افضل واحدث اجهزة التنظيف المثالية والتي من خلالها نسنطيع نقديم افضل خدمات التنظيف الشاملة للمنازل والمجالس بافضل جودة ممكنة وبارخص الاسعار المثالية فعندما نبحث عن افضل شركة تنظيف بالمنطقة الشرقيو فنحن بحاجة الي شركة المثالية للتنظيف التي لديها الخبرة الكبيرة والامكانيات الكبيرة والقدرة الهائلة علي خدمة عملائها بالاستعانة بامهر العمالة ذات الخبرة الكبيرة في مجالات التنظيف منذ عشرات السنوات ولم تغفل شركة المثالية للتنظيف فروعها الاخري بل اننا نقدم افضل خدماتنا بالاحساء من خلال شركة المثالية للتنظيف بالاحساء التي تستطيع توفير كافة الامكانيات اللازمة لتنفيز خدمات النظافة الشاملة بالاحساء وكذلك مدن محافظات المنطقة الشرقية فكل هذا تستطيعون الحصول علية من خلال
شركة المثالية للتنظيف بالاحساء
كما ان شركة المثالية للتنظيف لم تغفل افضل الخدمات واكثرها اهمية لعملائها وهي خدمة مكافحة الحشرات فلدينا شركة المثالية لمكافحة الحشرات التي تسستطيع تقديم خدمة ابادة الحشرات الطائرة والزاحفة بجميع انواعها باستخدام افضل المبيدات الامنة والنظيفة ذات التاثير القوي والفعال علي الحشرات والتي من خلالها نضمن لعملاء شركة المثالية لمكافحة الحشرات بالاحساء العيش في منزل امن خالي من الحشرات بجميع انواعها فلدينا الخدمات الاتية
شركة المثالية لمكافحة الحشرات
شركة المثالية لمكافحة الحشرات بالاحساء
شركة المثالية لمكافحة الحشرات بالدمام