الأربعاء، أغسطس 01، 2007

باسم براء..



2004 - 2006 عشرينات

- والأوردر باسم مين يا فندم.. ؟

- باسم علي عبد المنعم

19/4/2007 – 31 /7/2007 mbc

- والأوردر باسم مين يا فندم..

- باسم أحمد فؤاد..

بعدها بنص ساعة..

الأمن : حد يا جماعة طالب أوردر باسم أحمد فؤاد..

أنا : أيوة يا عمي.. أنا.. بص لما يجيلك أوردر باسم أحمد فؤاد يبقى أنا..

امبارح :

موظف الأمن قرب من مكتبي وسألني : عم عيد بيقول إن اسمك الحقيقي أحمد.. أومال إيه حكاية براء..

أنا : أحمد.. إزاي يعني.. أنا اسمي براء.. ومكتوب كدة في البطاقة..

موظف الأمن : يبقى بتطلب ليه الأكل باسم أحمد فؤاد..

أنا : هههههههههههههه

........

الحكاية وما فيها إني لما بدات أطلب الأكل باسمي أول ما اشتغلت في عشرينات، كان شيء مزعج جداً إني أكرر اسمي 3 مرات لموظف المطعم، إحساس غريب بحسه.. إني قادم من كوكب تاني.. أو اسمي "حنتيرة" مش براء.. وكان الحل الوحيد هو استغلال اسم صديقي علي عبد المنعم باعتباره زميلي في نفس المكتب.. وهو الشيء نفسه اللي حصل لما بدأت اشتغل في mbc، والمرة دي الإستغلال كان من نصيب أحمد فؤاد... صديقي وزميلي في المكتب نفسه..

لكن بما إن النهاردة أول تمانية 2007، وبمناسبة اقتراب عيد ميلادي يوم 22 من نفس الشهر، قررت إني أعلن التمرد.. وكانت النتيجة مفاجأة..

........

1/8/2007

- الأوردر باسم مين يا فندم؟

- براء..

- مسافة السكة ويكون عندك..

...........

موظفة المطعم لم تستعجب على الإطلاق.. وسمعت الاسم من أول مرة.. شيء رائع جداً إنك تشعر بالفخر باسمك.. خاصة وإن اسمك مش "مبارك" مثلاً عشان حد يتريق عليه..

بكتب دلوقتي بعد ما طلبت الأوردر... ربنا يستر موظف الأمن هيعمل إيه لما الدليفري يوصل ويسأله عن موظف اسمه براء.. أكيد هيقوله : "تقصد أحمد فؤاد؟؟"..

هناك 6 تعليقات:

عمر افندى و ابوه يقول...

ازيك يا احمد يا فؤاد....

انتا هتتحول و تقولى براء و موش براء ...اطلع ياد بالفلوس اللى عليك

عملتلى قبل كده على عبدالمنعم و عديتهالك بمزاجى...

اطلع ياد بالفلوس اللى عليك

طمنى على الاوردر يا محمود يا شوكت الله يخليك ...وصلك ولا لسه

علي عبد المنعم يقول...

كم من الجرائم ارتكبت باسمي:
سافو - شبراوي - جاد - شعراوي جمعة - سفسطة - كوك دوور - لاكزيتا - سوبر ماركت بابل - سمر..

ومرتكب الجريمة مرة ذكر.. مرة أنثى.. وهكذا دواليب!

مصـ( الخير )ـعب يقول...

يا عزيزي علي لا تنس أنني قمت بحملة لإصلاح صورتك الذهنية عند أصحاب المطاعم دي :

إلا قل لي يا براء
هو الأوردر وصل؟!

مصـ( الخير )ـعب يقول...

بس خد هنا يا علي

"سمر" عمرنا ما طلبنا منه دليفري ؟... أنت هتعيش وللا ايه؟
:)

BulBul يقول...

لا جامدة يا عم براء
ثم ايه يا عني انت في مصر
انا في دبي طالع عيني كل ما نتصل بعم اشكناني بتاع السوبر ماركت اللي تحت البناية يقولي مافي معلوم عربي مع انه لبلب انما في الكلام بس انما السمع لازم ترطمله بالعنجليزي وده كله ليه علشان يطلعلي جالون مياه معدنية اصل عقبال املتك معندناش مية من بتاع مصر والحمد لله المهم واخ لو حبيت مثلا ناكل مغلغلة(كبدة معيز بالبصل والطماطم) والخ..

BulBul يقول...

نسيت اكمل معلش
اه الراجل بتاع المغلغلة ده بقي ايه حدق يمني واقعد في دبي بقاله زمن يوم نقله يا حبيبي عاوزين واحد مغلغلة ببناية....... شقة 606
الراجل بقي اخر حلاوة عرف يقول بتوع مبارك اقوله لا يا عمي بتوع مصر بلاش غلط في الراجل.
انا خنقتك صح معلش..