حب بالمايوة

الدكتور : جربت قبل كدة حب المصايف.. ؟؟

أنا : مرة أو مرتين..

الدكتور : ورأيك فيه؟؟

أنا : اجمل حب في حياتي..

الدكتور : كان فيه جنس؟

أنا : أبداً..

الدكتور : أومال حلو إزاي.؟؟

أنا : تعرف حلاوة حب المصيف، لما ترجع تاني لشغلك في القاهرة، تقضي الشتا في المعتاد، ولما ييجي الصيف ترجع تاني تصيف، ويكون عندك أمل تلاقي البنت بتاع الصيف اللي فات.. وكل محاولاتك تنتهي بالفشل.. تليفون بيتهم اتغير، وأكيد زمان مكنش فيه موبايلات، وهتعرف بعد كدة إنها وأهلها مش هيصيفوا السنة دي لأن عندهم حالة وفاة في العيلة.. المهم.. تفضل تدور.. لحد ما تلاقي بنت تانية شبهها.. تحبها طول الصيف، وترجع بعدها بسنة تدور عليها ومتلاقيهاش..

الدكتور : أنا مش فاهمك قوي..

أنا : أنا برضه يمكن مش فاهم قوي.. بس عارف.. نقدر نقول إن أحلى حاجة في حب المصايف.. إنه ليه وقت محدد.. وإنه بيبدأ وينتهي بدون أي إلتزامات من الطرفين..

الدكتور : أقولك أنا إيه أحلى حاجة في الحب ده..

أنا : قول يا عم..

الدكتور : إنه بدون ملابس رسمية.. يبدأ وينتهي.. وأنت وهي لابسين المايوة..


*من جلسة علاج نفسي مررت بها في حلم الأمس، والتدوينة إهداء لأصدقائي الذين شاركوني نزوتي في الحلم نفسه.