الأحد، يونيو 03، 2007

دعوة للسرمحة..


ممكن لما أرجع..

نشرب سوا فنجان شاي بعد الفجر في البلكونة..

ونروح عروض المسرح البلجيكي في الأوبرا..

والعرض الختامي لمهرجان المسرح التجريبي..

وعروض الفن التشكيلي في قاعات الزمالك..

بيقولك مرة فنان "تشكيلي".. وفنان "أشكيلك"

هههههههههه

ونروح سينما رادوبيس الصيفي.. والفانتزيو..

ونتمشي على كورنيش المعادي.. ونقف نشرب حمص

ونسافر طنطا ودمنهور..

ممكن لما أرجع..

نغسل سجاجيد الشقة..

ونتطنط عليها عشان تتعصر..

أبويا وأمي كانوا بيعملوا كدة..

وننضف حوض السمك وقفص العصافير..

ونرش العصافير بالمية ونشوفهم وهما بيتنفضوا..

ونتفرج على "حديث المدينة" أو"حديث الروح"..

ممكن لما أرجع..

نقرر سوا إننا منروحش الشغل في يوم

ونقضيه كله نوم.. ونقوم تعبانين..

ممكن لما أرجع..

تشتري لي بيجامة كستور..

وننزل سوا الفجالة نجيب ورق دشت

والوكالة نجيب هدوم للصيف

ممكن أروح معاكي "التوحيد والنور"..

ونطلع الدور الرابع..

نجيب ترابيزة مكواة..

ومشاية صغيرة لأوضة النوم

ممكن لما أرجع..

تجيبيلي بارفان تقيل تركيب..

تتمشي معايا في شوارع حتتنا القديمة..

ونروح السوق.. نجيب علب صلصة..

ومشمش ينفع تعمليه مربي.. وجزر..

ومكرونة ورز يكفونا بقية الشهر

وسمك مكرونة..

وكيلو حرنكش..

ممكن لما أرجع..

نتفسح في القناطر..

ونجرب ناكل بطاطا بالملح من ع العربية..

ونروح البرج..

أصل أنا عمري ما روحت البرج..

ولا الهرم..

(!!)

ممكن لما أرجع..

ناكل يوم على عربية فول..

ونسهر للفجر في السيدة بعد ما نتعشى في "بحة"..

ونروح "فرحات".. و"البرنس" بتاع الكبدة في إمبابة..

ونشتري مانجة من المزاد بتاع "كرداسة"، وناكلها من الليل للصبح..

ممكن لما أرجع..

نبطل نعيش عيشة الحبيبة..

ونبدأ في السرمحة..

هناك 10 تعليقات:

محمود علي يقول...

يعيني يا براء
كل ده
انت كده فعلا بقيت عود دره وحداني
ربنا يوصلك بالسلامه
وتروح التوحيد والنور

shaimaa يقول...

ممكن يابراء اقلك انك جوعتني

:-DD
ترجع بالسلامه
مفيش احلي من السرمحه

الحلم العربي يقول...

لا خليكوا في عيشة الحبيبة شوية
لسة بدري عليكوا من عيشة السرمحة ...مستعجل على ايه؟؟
هتيجي إن شاء الله بعدين عيشة السرمحة لما ربنا يرزقكوا بعيال و ساعتها .....هتحنوا لعيشة الحبيبة
تحياتى

غمض عينيك يقول...

ربنا يرجعك بالسلامة يابراء ويلم شملك انت وكل اللي بتحبهم

تحياتي ليك
محمد سمير

مصـ( الخير )ـعب يقول...

طيب
على رأي المثل الشهير :

هو احنا كنا لقينا حاجة ومالقيناهاش!

وبما إن "من حسن إسلام المرء تركه ما لايعنيه"، أسيبك تكلم الجو بتاعك براحتك :)

فرصة سعيدة يقول...

مش بحب كتير أستخدم أفعل التفضيل وبقاومها دايما فيما أكتب أو أقول
لكن بجد ده أروع ما قريته لك يا بيرو يمكن لانه أصدق ما كتبت
والله أعلم

radwa osama يقول...

يا ابن الذين خلتنى اعيط

ihapoof يقول...

hi bara2

awel marra a3raf en el sarma7a 7aga kwayessa .. really

terga3 bel salam isa ..

salam

fanan fa2eer يقول...

يارب ترجع بالسلامة يارب
وتتسرمح زي مانت عاوز سرمحتك الجميلة دي
تحياتي

غير معرف يقول...

ياريت كنت تقول الكلام ده من زمان انا كان نفسى افكر فى حاجات كتيره تتعمل بس ماكنتش عارفه بالظبط انا عايزه ايه
علشان اغير انا كمان الرتم بتاع حياة الحبييبه
اشكرك