الثلاثاء، أغسطس 21، 2007

بايني كبرت


[1]

الزفة اشتغلت .. واشتغلت
ف دماغي الذكرى ف لحظتها
مين كان يتخيل أن أختي ..
الليلة فرحها ودخلتها
كت تركب كتفي وتتنطط
لو أرفض .. تزعل وتبوز
جريت أيامنا المجنونة
والليلة بشوفها بتتجوز
يا ما كتبي اتقلبت لمراكب
والباقي بأجيبه من الشارع
وأنا خارج تمسك رجليّ
وتعيط .. ما أقدرش أمانع
سيبت المعازيم .. سيبت الزفة
وأخدت الذكرى ف أحضاني
وركنّا ف ركن لوحدينا
جريت أسئلتي ملحقاني
هو احنا زماننا اللي استعجل؟!
والا احنا كبرنا وبنداري ؟!
طب ليه مش قادر تستوعب ؟ّ!
ما تكونش كبرت ومش داري ؟؟

[2]
ومعدي الشارع فلمحته
ف الأول ما عرفتش شكله
اترقّص قلبي من الفرحة
فكرني بعهد انا مشتاق له
أستاذ العربي ف اعدادي
كان أصغر واحد ف الهيئة
الضحك ملازم لشفايفه ..
وملامحه تمللي كانت رايقة
وبقرّب منه ما صدقتش
ودماغي دي لفت ميت لفة
الشيب متبسم ف شعوره
وشه ف تجاعيده بيتخفى
عديت له الشارع وحضنته
بصعوبة اتذكر أيامي
سلمت لعقلي ف سرحانه
وسؤالي اتنطط قدامي
هو احنا زماننا اللي استعجل؟!
والا احنا كبرنا وبنداري ؟!
طب ليه مش قادر تستوعب ؟ّ!
ما تكونش كبرت ومش داري ؟؟

[3]
ف المترو لقيتها بتتقدم
بتمد إيديها وبتسلم
طاقة اتفتحت لي على الذكرى
أول ما ابتدأت تتكلم
أيام كان لسه البال رايق
لو ح أنسى لا يمكن ح أنساها
وهمومنا كانت لسه بتحبي
أسوار الجامعة محاوطاها
كان طعم الضحك ما مررشي
ولا حد مكشّر ولا سارح
أيام باللحظة وعشناها
وكإني سايبها من امبارح
قطعت سرحاني بكلمتها
"سلم على أونكل يا حبيبي"
إبنك ؟! جاوبتني ابتسامتها
حسيت العمر بيجري بي
بصيت له لقيته مادد إيده
عفريت بيسلم ويلاغي
سلمت وبوسته وف دقيقة
أسئلتي اشتغلت ف دماغي
هو احنا زماننا اللي استعجل؟!
والا احنا كبرنا وبنداري ؟!
طب ليه مش قادر تستوعب ؟ّ!
ما تكونش كبرت ومش داري ؟؟
دا باينّي كبرت ومش داري !!
----------
قصيدة لأحمد عبيد منشورة على عشرينات من زمن، أنشرها كإحتفال شخصي بعيد ميلادي الـ22.. والعاقبة عندكم في المسرات

هناك 10 تعليقات:

weswes يقول...

كل سنه وانت طيب يا براء
انا مبسوطه ان اول واحده اقولهالك هنا
بس يا براء انت مش كبرت اوى كده يعنى
كل سنه وانت طيب وعقبال مليووووووووووون سنه وتحقق كل احلامك

yas يقول...

القصيده جميلة جدا
وكل سنة وانت طيب

الحلم العربي يقول...

كل سنة و انت طيب

قصيدة جميلة و اختيار رائع ...احنا فعلا كبرنا و مش داريين

تحياتي

مُصْعَب إِبْرَاهِيم يقول...

كل سنة وأنت .. يا راجل يا أنت

مُصْعَب إِبْرَاهِيم يقول...

(f)

مُصْعَب إِبْرَاهِيم يقول...

(k)

radwa osama يقول...

كل سنة وانت طيب ..لمش لازم تكبر انا عارفه انك هتلعب مع الاستاذ القادم ..مش متخيلاك اب يا براء بس متخيله دعاء ام لطفلين انت وهو او هى ..يا رب السنة اللى جايه تحقق كل احلامك

أنا حره يقول...

بجد كلمة تحفة قليلة عليها.. الكلام هايل و معبر جداً.

و كل سنة و انت طيب و مش بتدارى

عمر أفندى و أبووه يقول...

كل سنة و انتا طيب يا معلم و انا بالمناسبة دى جبتلك قصيدة معرفشى بتاعت مين و لا مين الفقرى اللى الفها....
بس تحفة و هى رسالة من بابا حسنى الى براء فى عيد ميلاده ال 22



يابراء يا حبيبي ياروحي يابيبي ياحاطك في جيبي يابن الحلال
يابراء ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
يا براء اللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال
واحب اللي يكدب واحب اللي ينهب احب اللي ينصب ويسرق تلال
واحب اللي شايف وعارف وخايف وبالع لسانه وكاتم ماقال
واحب اللي قافل عيونه المغفل واحب البهايم واحب البغال
واحب اللي فاضي واحب اللي راضي واحب اللي عايز يربي العيال
واحب اللي يائس واحب اللي بائس واحب اللي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها حجيبك لايمكن اسيبك وراح تبقى عبره وتصبح مثال
حبهدل جنابك وادل اللي جابك وحيكون عدابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جمااااال


اميرة هشام يقول...

معلش جيت متأخرة ..المواصلات زحمة

كل سنة وانت طيب يابراء وعقبال مليون لحظة سعيدة تقضيها انت ودودو وولي العهد اللي هيشرفنا بالسلامة ان شاء الله