الخميس، يونيو 28، 2007

شعر حسني مبارك .. إهداء الى شعب مصر



ياشعبي حبيبي ياروحي يابيبي

ياحاطك في جيبي يابن الحلال

ياشعبي ياشاطر ياجابر خواطر

ياساكن مقابر وصابر وعال

ياواكل سمومك يابايع هدومك

ياحامل همومك وشايل جبال

ياشعبي اللي نايم وسارح وهايم

وفي الفقر عايم وحاله ده حال

احبك محشش مفرفش مطنش

ودايخ مدروخ واخر انسطال

احبك مكبر دماغك مخدر

ممشي امورك كده باتكال

واحب اللي ينصب واحب اللي يكدب

واحب اللي ينهب ويسرق تلال

واحب اللي شايف وعارف وخايف

وبالع لسانه وكاتم ماقال

واحب اللي قافل عيونه المغفل

واحب البهايم واحب البغال

واحب اللي راضي واحب اللي فاضي

واحب اللي عايز يربي العيال

واحب اللي يائس واحب اللي بائس

واحب اللي محبط وشايف محال

واحبك تسافر وتبعد تهاجر

وتبعت فلوسك دولار او ريال

واحبك تطبل تهلل تهبل

عشان مطش كوره وفيلم ومقال

واحبك تأيد تعضض تمجد

توافق تنافق وتلحس نعال

تحضر نشادر تجمع كوادر

تلمع تقمع تظبط مجال

لكن لو تفكر تخطط تقرر

تشغلي مخك وتفتح جدال

وتبدأ تشاكل وتعمل مشاكل

وتنكش مسائل وتسأل سؤال

وعايز تنور وعايز تطور

وتعمللي روحك مفرد رجال

ساعتها حجيبك لايمكن اسيبك

وراح تبقى عبره وتصبح مثال

حبهدل جنابك واذل اللي جابك

وحيكون عذابك ده فوق الاحتمال

وامرمط سعادتك واهزأ سيادتك

واخلي كرامتك في حالة هزال

وتلبس قضيه وتصبح رزيه

وباقي حياتك تعيش في انعزال

حتقبل ححبك حترفض حلبك

حتطلع حتنزل حجيبلك جمااااال

* كاتب القصيدة مجهووول

هناك 22 تعليقًا:

خيرالدين يقول...

معبره عن برنامج الرئيس مبارك الانتخابى ومدى التقدم فى تحقيقه
لا والنهايه منطقيه ترضى كل المشاهدين والسياسيين

abderrahman يقول...

تحياتي إلى الشاعر المجهول
أول مرة أشوف انونيموس بيقول كلام حكم

الحلم العربي يقول...

شعر جامد جدا
اتبعتلى على الايميل قبل كده و فكرت انزله على مدونتى بس لم أجرؤ

تحياتي على الجرأة
و عايزة اقول للى كتبه بجد أحلى حاجة فيه نهايته....نهاية منطقية جدا

هههههههههههههه

مجلة لوتـس الإلكترونيـة يقول...

الأخ الفاضل
تحياتي لك وتحياتي للمجهول صاحب القصيدة المعبرة جداً
وتحياتي أيضاً للشرطة المصرية التي تحولت من خدمة الشعب إلي خدمة سيادته

عربي حر يقول...

معلش , أنا لازم أنزله على المدونة بتاعتي

Ana keda يقول...

شعر مينفعش منمجهول بجد لازم يقول اسمه معرفش ازاى بس لازم يقوله

اول حاجة حمد لله عالسلامة ومبروك عالفرح انا عارفةجات متاخر اوى بس معلش بقى عندى دى

احييك على الشعر ده وبجد جاب من الاخر يعنى

rana 3amra يقول...

ههههههههههههههههههههههههه

دة جامد اوى
بس انا عايزة اعرف مين الاخ المجهول دة رخامة بس

غير معرف يقول...

el mafrood tekol el masdar ela eza kont enta el maghol

da zolm lel masdar enak matektebosh

vision يقول...

حتقبل ححبك حترفض حلبك

حتطلع حتنزل حجيبلك جمااااال

---------------------
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

كلللللللللها وهميييييييييييييييييييييييييييييييييييييييييييييييييييييه

شقاوة شعب يقول...

تحياتى للمجهول صاحب الشعر المعبر ذو النظرة المبعدية الثاقبة والكلمات الرنانة الخالدة
واضح جدا ان فعلا الشعب كله بدأ يتشاقة ...
وزروا مدونتى الوليدة :شقاوة شعب
www.shawetsha3b.blogspot.com

hamsawy يقول...

please add me to ur list
www.hamsawy.blogspot.com

!!! الراس الكبيرة منة يقول...

والله العظيم.....
مش عايزة اتكلم احسن

بس انا اهلل لكاتب القصيدة دى و بقوله ايه الحلاوة دى اشطة

ابقى قولى فى انهى سجن عشان اجيبلو عيش وحلاوة

سلام

غير معرف يقول...

رسالة من الحزب
الحاكم
نسلم نصبح على كل الجدعان......وبعد اللى جرى وبعد اللى كان.....نحب نغير فهم الأخوان......طول عمر استفتاءنا مليان با الأمان....... واذا كان حضرتكم ما يعجبكوش.......او حتى حضرتكم ما يلزمكوش.....ما ترحوش لصناديق اللجان..... نسلم نصبح على كل الجدعان......قاطعوا قاطعوا يا اخوان.......مش خايفين من البرلمان ......على طول حزبنا مليان.......واذا كان حضرتكم ما يعجبكوش ......اوحتى حضرتكم ما يلزمكوش......كدة كدة حزبنا كسبان....... نسلم نصبح على كل الجدعان......وبعد اللى جرى وبعد اللى كان......نحب ننبه كل الشبان.....كله ياحبيبى الا الأخوان...
واذا كان حضرتكم ما يعجبكوش......
اوحتى حضرتكم مايلزمكوش......
حتتمسكوا من كل البوليس واللجان...... نسلم نصبح على كل الجدعان.....واللى حيروح صناديق اللجان......حياخد حلاوة رشيدى الميزان......واذا كان حضرتكم ما يعجبكوش ....... او حتى حضرتكم ما يلزمكوش......حنبيع الحلاوة فى اقرب مكان..........
نسلم نصبح على كل الجدعان........حزبن دة لا عفريت ولا جان .......يعدل يغير وياكل لبان......واذا كان حضرتكم ما يعجبكوش......او حتى حضرتكم ما يلزمكوش......حتموت جعان يا شعب يا غلبان......... نسلم نصبح على كل الجدعان...

أحمد سلامــة يقول...

مشممكن مش ممكن بجد
خطيييييييرة
ودمها زي العسل يودي في داهية
:)
بجد تسلم ايد اللي كاتبها

غير معرف يقول...

احمد فؤاد نجم

ramy يقول...

الشاعر مش مجهووووووووووووول
القصيدة لاحمد فؤاد نجم

غير معرف يقول...

يا جماااعه اللى كاتب القصيده
الشااااعر احمد فؤاد نجم
الشششششكر ليه هو

soso يقول...

جميلة جدا تسلم ايد اللى كتبها

غير معرف يقول...

جميلة جدا جدا جدا احيك بارك الله فيك

انا بحب مبارك يقول...

حرام عليكوا بتبهدلوا مبارك ليه؟ حد يرد عليا كان عملكوا حاجة حراااااااااااااام عليكوا هاتروحه من ربنا فين؟
انتو هاتروحوا اكبر نار هاتروحوا الجحيم حدف انتو مش بتحبوا مبارك ليه حرام عليكوا بجدحراااااااااااااام عليكو سلااااااااااااااااااااام يا اللى ظالمين مبارك

غير معرف يقول...

حرام عليكوا بتبهدلوا مبارك ليه؟ حد يرد عليا كان عملكوا حاجة حراااااااااااااام عليكوا هاتروحه من ربنا فين؟
انتو هاتروحوا اكبر نار هاتروحوا الجحيم حدف انتو مش بتحبوا مبارك ليه حرام عليكوا بجدحراااااااااااااام عليكو سلااااااااااااااااااااام يا اللى ظالمين مبارك

مصريا ليا حقوق فى البلد بحب مبارك يقول...

العالم كله بوشين لما كان مبارك موجود كنتم بتحبوه وبتدفعوا عنوا جايين دلوقتى بعد 30 سنة بتقوله مش عايزينه حرااااااااااااااااااااام عليكوا انا بعترف كا مصريه محترمة وليا حقوق فى الدوله انا بحب مبارك